ഡാളസ്, ടെക്‌സാസ്: ഗ്ലോബല്‍ ഓര്‍ഗനൈസേഷന്‍ ഓഫ് പീപ്പിള്‍ ഓഫ് ഇന്ത്യന്‍ ഒറിജിന്‍(ഗോപിയോ) ഡാളസ് ചാപ്റ്ററിന്റെ ഉദ്ഘാടനം ടെക്‌സാസിലെ ഡാലസിലുള്ള ഭാരതീയ നിവാസില്‍ നടന്ന ചടങ്ങില്‍ ഔദ്യോഗികമായി നടന്നു. ഉത്തര ടെക്‌സാസിലെ ഇന്ത്യന്‍ വംശജനായ സമൂഹത്തിന്റെ സംഘടനാപരമായ ഇടപെടലുകളും പ്രതിനിധിത്വവും ശക്തിപ്പെടുത്തുന്നതില്‍ നിര്‍ണായക ഘട്ടമായാണ് ഈ പരിപാടി വിലയിരുത്തപ്പെടുന്നത്.

ചടങ്ങില്‍ ഹ്യൂസ്റ്റണിലെ ഇന്ത്യന്‍ കോണ്‍സല്‍ ജനറല്‍ ഡി.സി.മഞ്ജുനാഥ് മുഖ്യാതിഥിയായി പങ്കെടുത്തു. ഡോ.തോമസ് എബ്രഹാം (ഗോപിയോ ഇന്റര്‍നാഷണല്‍ ചെയര്‍മാന്‍), പ്രകാശ് ഷാ (ഗോപിയോ ഇന്റര്‍നാഷണല്‍ പ്രസിഡന്റ്) എന്നിവരും ചടങ്ങിന് നേതൃത്വം നല്‍കി. ഡാളസ് ചാപ്റ്റര്‍ പ്രസിഡന്റ് മുത്തു മുദലിയാര്‍, എക്‌സിക്യൂട്ടീവ് വൈസ് പ്രസിഡന്റ് വിനോദ് മാണി, ജോയിന്റ് ട്രഷറര്‍ ഭാരത് ഭക്ത എന്നിവരും പങ്കെടുത്തു.

പരിപാടിയുടെ ഭാഗമായി ഐക്യത്തിന്റെയും പുതിയ തുടക്കത്തിന്റെയും പ്രതീകമായി നിലവിളക്ക് തെളിയിക്കല്‍ ചടങ്ങ് സംഘടിപ്പിച്ചു. അമേരിക്കയും ഇന്ത്യയും ദേശീയഗാനങ്ങള്‍ ആലപിച്ചതോടെ പരിപാടി ആരംഭിച്ചു. തുടര്‍ന്ന് മസ്തി അക്കാദമി ഡാന്‍സ് ഗ്രൂപ്പ് അവതരിപ്പിച്ച ബോളിവുഡ് നൃത്തപ്രകടനം ശ്രദ്ധേയമായി.

മുഖ്യപ്രഭാഷണം നടത്തിയ കോണ്‍സല്‍ ജനറല്‍ ഡി.സി. മഞ്ജുനാഥ്, 36 വര്‍ഷത്തെ ഗോപിയോയുടെ പ്രവര്‍ത്തന പാരമ്പര്യം പ്രശംസിക്കുകയും ഡല്ലാസ് ചാപ്റ്റര്‍ പ്രാദേശിക സമൂഹത്തെയും ആഗോള പദ്ധതികളെയും ബന്ധിപ്പിക്കുന്ന നിര്‍ണായക വേദിയായിരിക്കുമെന്ന് അഭിപ്രായപ്പെട്ടു. ഇന്ത്യന്‍ പ്രവാസികള്‍ ഇന്ത്യ-അമേരിക്ക ബന്ധം ശക്തിപ്പെടുത്തുന്നതില്‍ വഹിക്കുന്ന പങ്കും അദ്ദേഹം ചൂണ്ടിക്കാട്ടി.

ഗോപിയോ സ്ഥാപകനും ചെയര്‍മാനുമായ ഡോ. തോമസ് എബ്രഹാം സംഘടനയുടെ ആഗോള നേട്ടങ്ങളും ചരിത്രപരമായ വളര്‍ച്ചയും വിശദീകരിച്ചു. സംഘടനയുടെ ഭാവി ദിശയെക്കുറിച്ച് ഗോപിയോ ഇന്റര്‍നാഷണല്‍ പ്രസിഡന്റ് പ്രകാശ് ഷാ സംസാരിച്ചു. പ്രാദേശിക തലത്തില്‍ സമൂഹത്തിന്റെ സജീവ പങ്കാളിത്തം ഉറപ്പാക്കേണ്ടതിന്റെ ആവശ്യകത ചാപ്റ്റര്‍ പ്രസിഡന്റ് മുത്തു മുദലിയാറും ജോയിന്റ് ട്രഷറര്‍ ഭാരത് ഭക്തയും വ്യക്തമാക്കി.

ഫ്രിസ്‌കോ കൗണ്‍സില്‍ അംഗമായ ബര്‍ട് താക്കൂര്‍, അസംബ്ലി സ്ഥാനാര്‍ഥിയായ സഞ്ജയ് നാരായണ്‍ എന്നിവരും ആശംസകള്‍ നേര്‍ന്നു. ഹ്യൂസ്റ്റണ്‍ സമൂഹനേതാവായ സാം കണ്ണപ്പനെ ചടങ്ങില്‍ ആദരിച്ചു.

പ്രവാസി സമൂഹത്തിന്റെ സാംസ്‌കാരിക വൈവിധ്യം പ്രതിഫലിപ്പിക്കുന്ന കലാപരിപാടികളും സമൂഹ സംഘടനാ നേതാക്കളുടെ സാന്നിധ്യവും ചടങ്ങിന് നിറം പകര്‍ന്നു. ഡല്ലാസ്‌ഫോര്‍ട്ട് വര്‍ത്ത് മേഖലയിലെ ഇന്ത്യന്‍ ജനസംഖ്യയുടെ വേഗത്തിലുള്ള വര്‍ധനയെ പരിഗണിച്ചാണ് പുതിയ ചാപ്റ്റര്‍ ആരംഭിച്ചതെന്ന് സംഘാടകര്‍ അറിയിച്ചു.

ഉദ്ഘാടനത്തിന് പിന്നാലെ മാര്‍ച്ച് 30-ന് ചെറുകിട-ഇടത്തരം വ്യവസായികളും പ്രൊഫഷണല്‍ മേഖലയിലുള്ള പ്രവാസികളുമായി പ്രത്യേക ലഞ്ച് മീറ്റിംഗും സംഘടിപ്പിച്ചു. ഗോപിയോ ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രി(ജിസിസിഐ) ഡാളസ് ചാപ്റ്റര്‍ രൂപീകരിക്കാനുള്ള സാധ്യതകളും ഈ യോഗത്തില്‍ ചര്‍ച്ചയായി.

സമൂഹത്തിന്റെ പ്രൊഫഷണല്‍ നെറ്റ്വര്‍ക്കിംഗ്, സാമൂഹിക ഇടപെടല്‍, സാംസ്‌കാരിക പൈതൃക സംരക്ഷണം, യുവജന പ്രവര്‍ത്തനങ്ങള്‍ എന്നിവ ശക്തിപ്പെടുത്തുന്നതിനുള്ള വിവിധ പദ്ധതികള്‍ നടപ്പാക്കാനാണ് ഗോപിയോ ഡാളസ് ചാപ്റ്റര്‍ ലക്ഷ്യമിടുന്നതെന്ന് ഭാരവാഹികള്‍ അറിയിച്ചു.