ഗുരുവിന്റെ കവിളിൽ ചുംബനം നൽകി
ശത്രുവിനു കാട്ടിക്കൊടുക്കുക എന്നത്
നിന്റെ നിയോഗമാണ്

ആ നിയോഗം നീ ഏറ്റെടുക്കുക
നിന്റെ ജോലി നീ പൂർത്തിയാക്കുക
അതിന്റെ പ്രതിഫലം അനുഭവിക്കാൻ  
നിനക്കു യോഗമില്ല.

അത് രക്തനിലം വാങ്ങാനുള്ളതാണ് 
ശവംനാറി പൂവുകളും, കള്ളിമുള്ളും 
കഴുകൻമാരും അവിടെ വസിക്കും  

നീതിമാന്റെ രക്തം വിറ്റ
മുപ്പതു വെള്ളിക്കാശിന്റെ കിഴി   
പുരോഹിതന്മാരുടെ മുന്നിൽ
ദേവാലയത്തിലെ അൾത്താരയിൽ
ചിതറിത്തെറിച്ചു വീണപ്പോൾ മുഴങ്ങിയത്
നിന്റെ ദുരന്തത്തിന്റെ മണിനാദമാണ് 
അതു വീണ ഇടവും ചാവുനിലമാകും

അവസാനം, ഒരു മുഴം കയറിൽ
വൃക്ഷക്കൊമ്പിൽ തൂങ്ങി ആടുമ്പോഴും 
ദുരന്തം അവസാനിക്കുന്നില്ല

വഞ്ചകന്റെ പിൻമുറക്കാരെന്ന് 
ലോകാവസാനം വരെയും അറിയപ്പെടും
അവരുടെ കൈരേഖകളിലും, ശിരോരേഖകളിലും അത് 
നിത്യമുദ്രയായി പതിക്കപ്പെടുകയും ചെയ്യും!