1
ശാരദ ചന്ദ്രിക ചൊരിയും ഒരാഴത്തിൽ
ആതിരയായി വിരിയും കവിത,
ഏഴാം കടലിന്നുമപ്പുറം കേൾക്കുമൊ-
രേകാന്ത സംഗീതമാണെൻ കവിത...
2
പാലാഴി മഥനത്തിൽ പാലു കറന്നോരാ -
പാന പാത്രത്തിലെ അമൃതല്ലേ നീ,
താളിൽ ഒതുങ്ങാത്ത തങ്ക ലിപികളിൽ
താനേ തെളിയുന്ന മന്ത്രമല്ലേ?
3
സൂര്യകാന്തി പൂവിൽ പ്രണയ വശ്യത്തിലായ്
സൂര്യൻ ജ്വലിക്കുന്ന് മൗനം
നീഹാര ബിന്ദുവിൽ നീർപ്പൊട്ടായ് മാറിയ
നെഞ്ചോടു ചേർക്കുന്നു - ന്മത്തവും...
4
മന്ദാരപ്പൂവിൻ മകരന്ദ വാഹിനിയായ്
മന്ദം ചരിക്കുന്നതാരെൻ സഖീ?
വാക്കിന്റെ വാതായനം തുറന്നീടുമ്പോൾ
വാസന്തമായിന്നു ലാവണ്യവും...
5
ആകാശപ്പൊയ്കയിൽ വെൺമേഘ ഹംസമായ്
ആത്മാവിലൊഴുകുന്നൊരോർമ്മ നീയും 
നീഹാര ബിന്ദുവിൽ നീല നിലാവിന്റെ
നെഞ്ചോടു ചേർക്കുന്ന നൊമ്പരം നീ...
6
കാലമാം കാട്ടിലെ കരിയില ക്കൂട്ടത്തിൽ
കനലായ് ഒളിച്ചിരുന്നെൻ പ്രണയവും,
കാറ്റായ് വന്നെന്റെ കാവ്യ ശകലങ്ങളിൽ
കാട്ടു തീയായ് പടരുന്നല്ലോ.?
7
ശിലയായ് മാറിയ അഹല്യയെ പ്പോലെ ഞാൻ
ശ്രുതിമീട്ടി നിൽക്കുന്ന തംബുരു നീ 
നിൻ പദസ്പർശം ഏൽക്കും നിമിഷത്തിൽ
നിർവ്വാണമരുളുന്ന കാവ്യമല്ലോ...
8
അനന്തമീ അക്ഷര കാവ്യ പ്രപഞ്ചത്തിൽ
അർദ്ധനാരീശ്വര സങ്കല്പമോ 
ഞാനെന്ന വരിയിലും അർത്ഥമായ് മാറി നീ
കാവ്യ ദിനത്തിൽ കവിതയല്ലോ...