പ്രതീക്ഷകൾ നിറഞ്ഞ പുതുവർഷത്തെ വരവേൽക്കാൻ ലോകം ഒരുങ്ങിക്കഴിഞ്ഞു. 2025 നോട് യാത്ര പറഞ്ഞ് ആഘോഷങ്ങളോടെ 2026 നെ സ്വീകരിക്കാൻ  ലോകം പ്രതീക്ഷാപൂർവം  കാത്തിരിക്കുകയാണ്. ജീവിതത്തിൽ നിന്ന് ഒരു വർഷം  കൂടി കൊഴിഞ്ഞു പോകുന്നു. ആയുസ്സിൽ നിന്നിതാ ഒരു വർഷം  കൂടി കുറഞ്ഞിരിക്കുന്നു. എങ്കിലും ഒരു പുതുവർഷം സമ്മനമായി ലഭിക്കുന്നു.

മേഘങ്ങളേക്കാള്‍ വേഗത്തില്‍ മറയുന്ന ഋതുക്കള്‍, മഞ്ഞുപെയ്യുന്ന ശൈത്യവും പൂക്കൾ നിറയുന്ന വസന്തവും ഇലപൊഴിയുന്ന ഹേമന്തവും ഒന്നിനൊന്നു മാറ്റുകൂട്ടുന്ന പ്രകൃതിയുടെ വിസ്മയകാഴ്ചകൾ നടത്തികൊണ്ട് അതിവേഗം കടന്നുപോകുന്നു.  അതിനിടയിൽ  ജീവിതത്തിലെ ഓരോ ദിനവും കടന്നു പോകുന്നത് വ്യത്യസ്തമായ അനുഭവങ്ങൾ നൽകിക്കൊണ്ടാണ്.  അതിൽ    എനിക്ക് ഏറ്റവും ഇഷ്‌ടമുള്ള  മാസമാണ് ഡിസംബര്‍. നഷ്ടങ്ങളുടെയും ലാഭങ്ങളുടെയും ഒരുപാട് ഓര്‍മ്മകള്‍ നല്‍കി കടന്നുപോകാനുള്ള ഒരുക്കത്തില്‍ ഡിസംബര്‍ നില്‍ക്കുമ്പോള്‍.. കടന്നുവരുന്ന ജനുവരി എന്താണ്  കൊണ്ടുവരിക എന്നത് പ്രതീക്ഷയിൽ ഹൃദയം തുടിക്കുന്നു.

ബാല്യത്തിലെ ശീലങ്ങളോ ചിന്തകളോ ഒരിക്കലും എന്നെ വിട്ടു പോകുന്നതായിരുന്നില്ല. അതിനാലാകാം വര്‍ഷങ്ങള്‍ പോകുന്തോറും എന്നിലെ കുട്ടിത്തം  എന്നോടൊപ്പം തന്നെ യാത്ര തുടര്‍ന്നത് . ഡിസംബറിനെ  ഏറെ പ്രിയങ്കരമാക്കുന്നത്  കിട്ടുന്ന  സമ്മാനങ്ങൾ ആണ്. സമ്മാനങ്ങള്‍ വലുതോ ചെറുതോ ആകട്ടെ അത് കൊടുക്കുന്ന ആളിനും കിട്ടുന്ന ആളിനും ഉണ്ടാകുന്ന ആഹ്ലാദം ഒരു പക്ഷെ ആ പൊതിക്കുള്ളിലെ സമ്മാനത്തേക്കാള്‍ മൂല്യമുള്ളതായിരിക്കും എന്ന്  തോന്നിയിട്ടുണ്ട് .  അതിൽ ഒരു സമ്മാനമാണ് പുതു വർഷവും.

സന്തോഷവും, ദുഖവും, ഉയര്‍ച്ചയും, താഴ്ച്ചയും, പ്രണയവും, വിരഹവും,  ചിരിയും, കരച്ചിലും, ആത്മസംതൃപ്തിയും  എല്ലാം പകര്‍ന്നു തന്ന 12 മാസങ്ങള്‍. ഓര്‍മ്മിക്കാനും, ഓമനിക്കാനും എത്രയോ നല്ല നിമിഷങ്ങള്‍. വർണ്ണശഭളമായ എത്ര എത്ര ആഘോഷങ്ങൾ.!! നമ്മിൽ എത്ര പേർക്ക് ഈ കഴിഞ്ഞ വര്‍ഷം മറക്കാന്‍ കഴിയും, നമ്മുടെ ജീവിതത്തിലേക്ക് നടന്നു കയറിയവർ, വേർപിരിഞ്ഞു പോയവർ- എണ്ണിയാൽ ഒടുങ്ങാത്ത സമ്മിശ്ര വികാരങ്ങൾകൊണ്ട് നിറഞ്ഞതാണ് കഴിഞ്ഞ വർഷം.

ഇന്നലെയുടെ തെറ്റുകളില്‍ നിന്നും പാഠം ഉള്‍ക്കൊണ്ടു  ശുഭപ്രതീക്ഷയോടെ പുതിയൊരു വര്‍ഷത്തിലേക്ക് കടക്കാം  . തെറ്റുകള്‍ തിരുത്താനും പൊറുക്കാനും മറക്കാനും സ്നേഹം വഴിയൊരുക്കുന്നു എങ്കിൽ അതുതന്നെ ആയിരിക്കട്ടെ നമ്മുടെ ലക്ഷ്യം.

ഓരോ കാത്തിരിപ്പിനും വിരഹത്തിന്റെ ചൂടുണ്ട്. സംഗമത്തിന്റെ സംഗീതമുണ്ട്. ഓരോ ദിനം കഴിഞ്ഞു പോകുന്നതും മുടിയിഴകൾ വെളുക്കുന്നതും ഉടൽ ചുരുങ്ങുന്നതും ചർമം ചുളിയുന്നതുമൊന്നും കാത്തിരിപ്പിന്റെ ഓളങ്ങളിൽപ്പെട്ട്  നമ്മൾ അറിയുന്നില്ല .  നമ്മളിൽ പലരുടെയും ജീവിതം ഒരു കാത്തിരിപ്പാണ്. ഒരിക്കൽ എല്ലാം ശരിയാകും എന്ന കാത്തിരിപ്പ് ... ഓരോ കാത്തിരിപ്പും പ്രതീക്ഷയാണ്.. സ്വപ്‌നമാണ്.. സ്‌നേഹമാണ്. എല്ലാവരും കാത്തിരിക്കുകയാണ്. എല്ലാം ശരിയാവുന്ന ഒരു ദിനത്തിന് വേണ്ടി. ആ ദിനം പുതുവർഷത്തിൽ ഉണ്ടാകട്ടെ എന്ന് പ്രാർത്ഥിക്കാം.

പോകുന്ന  വർഷം നിങ്ങൾക്ക് സന്തോഷിക്കാനും അഭിമാനിക്കാനും എന്തെങ്കിലും നൽകിയിട്ടില്ലെങ്കിൽ, വിഷമിക്കേണ്ട. ഡിസംബർ 31 എന്നത് ഒരു വർഷത്തിന്റെ അവസാനത്തെ അർത്ഥമാക്കുന്നുവെങ്കിൽ, ജനുവരി 1 എന്നാൽ ആരംഭമാണ്. നിങ്ങൾക്ക് ജീവിതമുണ്ട്, നിങ്ങൾക്ക് പ്രതീക്ഷയുണ്ട്,  നിങ്ങൾ ആഗ്രഹിക്കുന്നതെല്ലാം നേടുവാൻ  ഒരു പുതുവർഷം  വരുകയാണ്. നമുക്ക് നേടാൻ സാധിക്കാത്തതെക്കെ ഈ പുതുവർഷത്തിൽ നേടും എന്ന് വിശ്വസിക്കാം.

വിട പറഞ്ഞ  വർഷങ്ങൾ.  സ്നേഹവും  വൽസല്യവും   സംരക്ഷണവും പകർന്നു നൽകിയ  പലരുടേയും നഷടപെടിലുകളുടെ  തീരാവ്യഥ  പലർക്കും   ജീവിത അനുഭവമാണ്.   കഴിഞ്ഞ വർഷത്തെ പല  കാഴ്ചകളും  കാണാമറയത്തേക്കു മായുമ്പോള്‍ അതിന്റെ മധുരം ഇരട്ടിയാകും. ഒരിക്കല്‍ കൂടി കാണാനും കേള്‍ക്കാനും ആസ്വദിക്കാനും ഒക്കെ കൊതിപ്പിക്കുന്ന ചില കാഴ്ചകള്‍ നമ്മുടെ മനസ്സിൽ കൂടെ കടന്നു പോകും . ആ കാഴ്ചകൾ  ഒന്നുകൂടെ കാണുവാൻ   നമ്മുടെ മനസ്സ് അറിയാതെ  ആഗ്രഹിക്കും . പെയ്തൊഴിയാതെ  എത്രയോ മഴമേഘങ്ങൾ നമുക്കുള്ളപ്പോൾ ആഗ്രഹങ്ങൾക്ക് ഒരു കുറവും ഉണ്ടാവില്ല .

സ്വയം ഉരുകി തീരുമ്പോളും  ചുറ്റുപാടും പ്രകാശം ചൊരിയുന്ന മെഴുകു തിരിയുടെ കഥ ഒരു പക്ഷേ നമുക്ക്  പ്രചോദനം ആയിരിക്കാം .  നല്ല നാളെകൾ തന്നെയാകട്ടെ നമ്മുടെ പ്രതീക്ഷകൾ. ഇല പൊഴിയുന്ന ശിശിരത്തിന് അപ്പുറം വസന്തം ഒരു വർണ്ണ പൂത്താലവുമായി നിൽക്കുന്നുണ്ടാവും . ഓരോ ഉദയവും അസ്തമയത്തിൽ അവസാനിക്കുന്നു എന്ന ചിന്തക്ക് പകരം ഓരോ അസ്തമനവും പുതിയ ഉദയത്തിന്റെ തുടക്കം എന്ന് ചിന്തിക്കാം.

മോഹഭംഗങ്ങളില്ലാത്ത ജീവിതങ്ങള്‍ കാണില്ലായിരിയ്ക്കാം, പല സ്വപ്നങ്ങളും യാഥാര്‍ത്ഥ്യമാകാറില്ലായിരിയ്ക്കാം.. എന്നാലും പുതു വർഷം  പുത്തൻ സ്വപ്നങ്ങൾ  കാണുവാൻ  നമ്മെ പ്രേരിപ്പിക്കും.  കാലം മാറുമ്പോള്‍,  പ്രായമേറുമ്പോള്‍ സ്വപ്നങ്ങളുടേയും രൂപഭാവത്തിലും വ്യത്യാസങ്ങൾ വന്നേക്കാം,  അല്ലെങ്കിൽ തന്നെ  കാലത്തിന്റെ സൂചികൾ പിന്നോട്ട് തിരിച്ച് വെക്കാനുള്ള മാന്ത്രിക ശക്തി നമ്മുടെ  കരങ്ങൾക്കില്ലല്ലോ. മുന്നോട്ടു ചിന്തിക്കാൻ മാത്രമല്ലേ നമുക്ക് കഴിയു.

പിന്നിട്ടു  പോകുന്ന  വര്‍ഷത്തെപറ്റിയുള്ള വിശകലനങ്ങളും, തിരിഞ്ഞുനോട്ടവും, ഗുണദോഷങ്ങള്‍ വിലയിരുത്തലും നടത്തേണ്ടുന്നത്  ഒരു സമൂഹത്തിന്‌ ആവശ്യമാണ്‌. വീഴ്‌ചകള്‍ പാഠമാകാന്‍, തെറ്റുകള്‍ തിരുത്താന്‍, മികവുകള്‍ വളര്‍ത്താന്‍ തുടര്‍ ജീവിതത്തിലേക്ക്‌ ആസൂത്രണം ചെയ്യാന്‍ അങ്ങനെ  വർഷാവസാനത്തിന്റെ  ഒരു കണക്കെടുപ്പ് ജീവിതത്തിലും ആവശ്യമാണ്.  പോയ വര്‍ഷം ഏറെ കഷ്ടതകള്‍ ഓരോരുത്തര്‍ക്കും സമ്മാനിച്ചുവെങ്കിലും വരും വര്‍ഷം ആ കഷ്ടതകളൊക്കെ മായ്ക്കുന്ന,  നമ്മുടെ  ആഗ്രഹങ്ങൾക്ക് അനുസരിച്ചുള്ള ഒരു വർഷമാക്കാനും  നമുക്ക് ശ്രമിക്കാം.

ഈ പുതുവര്‍ഷ പുലരിയില്‍ മനസ്സിന്റെ ജാലകങ്ങള്‍ തുറക്കുമ്പോള്‍,  സൗഹൃദങ്ങൾ  പനിനീര്‍ മുകുളങ്ങൾ ആയി നമുക്കു ചുറ്റും വിടരട്ടെ . സ്നേഹത്തിന്റെ മഞ്ഞുതുള്ളികള്‍ അവയെ കുളിരനിയിക്കട്ടെ . അങ്ങനെ ഒരിക്കലും വാടാത്ത പനിനീര്‍ മലരുകളായി നമ്മുടെ സൗഹൃദങ്ങൾ  സ്നേഹത്തിന്റെ പരിമളം പരത്തട്ടെ. ലോകം  മുഴുവനും നന്മകൾ വിരിയട്ടെ എന്ന് പ്രാർത്ഥിക്കാം.

സാഫല്യമാക്കുവാൻ സർവാത്മനാ തുനിഞ്ഞിറങ്ങി പ്രവൃത്തിപഥത്തിൽ ബാക്കിയായ കഴിഞ്ഞു പോയ   വർഷത്തിന്റെ അടരുകൾ... ആത്മാഭിമാനത്തോടെ ആരതിയുഴിഞ്ഞു ആഗ്രഹ സാക്ഷാത്കാരത്തിനായി നമുക്ക് നവയുഗത്തെ സ്വാഗതം ചെയ്യാം.  പുതിയ കാലം പുതു പ്രതീക്ഷകളുമായി വരുബോൾ , 2026    നമ്മളുടെ  ജീവിതത്തിലെ ഏറ്റവും മികച്ച വർഷമായിരിക്കട്ടെ എന്ന് ആശംസിക്കുന്നു.

സന്തോഷത്തിന്റെയും , സമാധാനത്തിന്റെയും, പ്രത്യാശയുടെയും, ഐശ്വര്യത്തിന്റെയും, പ്രതീക്ഷയുടെയും  ഒരു നവവത്സരം ഏവര്‍ക്കും ആശംസിക്കുന്നു...

ഏവർക്കും  എന്റെ  ഹൃദയം നിറഞ്ഞ പുതുവത്സര ആശംസകൾ