Image

മനസ്വിനി ( കവിത : ഷൈലാ ബാബു )

Published on 16 November, 2026
മനസ്വിനി ( കവിത : ഷൈലാ ബാബു )

മോഹന സ്വപ്നങ്ങൾ
താലോലിച്ചവളെന്നും,
മാനസ വാടിയിൽ
കുളിരണിഞ്ഞു!

പതിനേഴിൻ പടികട-
ന്നെത്തിടും കാലവും
പഞ്ചാമൃതത്തിൻ
മധു പകർന്നു!

പ്രിയമുള്ളൊരാളി-
ന്നിണക്കിളിയായിടാൻ,
മനതാരിലാശകൾ
തിരയിളക്കി!

കനവിന്റെ മഞ്ചലിൽ
പന്തലൊരുക്കിയാൾ
കല്യാണനാളിന്നായ്,
കാത്തിരുന്നു!

കതിർമണ്ഡപത്തിലെ
കനക പ്രതീക്ഷകൾ
കതിരൊളി വർഷമായ്, 
കരളിന്നുള്ളിൽ!

നിറപൊലി നാളമായ്
മധുവിധുരാവുകൾ
അനുരാഗമഴയി-
ലൂടൊഴുകി നീങ്ങി!

അനുഭൂതിത്തെന്നലാ-
യരികിലായെപ്പോഴും
അതിലോല മകരന്ദ
നിർവൃതിയായ്!

വിരിമാറിലഴകായി,
ശ്രീവത്സമായവൾ
ആലിലത്താലിയി-
ലാശ്വസിക്കേ;

കാലപ്രവാഹിനി-
ക്കുള്ളിലമരവേ,
കാർമുകിൽ മൂടി
ചുരുളുകളായ്!

തേനും വയമ്പുമാം
മധുരച്ചിമിഴുകൾ
കയ്പിൻ രസമൂറും
കുമ്പിളായി!

വിശ്വാസ സത്യങ്ങൾ
മണ്ണിലൊലിച്ചതാൽ,
ജീവിതനൗക-
യുലഞ്ഞിടുന്നു!

തളിരിട്ട ശാഖികൾ
വേരറ്റു വീഴവേ,
മംഗള കമലങ്ങൾ
മിഴിയടച്ചു!

ചിറകറ്റ പതഗമാ-
യിരുവഴിത്താരയിൽ
തേങ്ങും മനസ്വിനി
യാത്രയായി..!

    

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക