Image

നവരമ്യ ദീപാവലി... ദീപാവലി ആശംസകൾ (അൻവർ ഷാ ഉമയനല്ലൂർ)

Published on 08 November, 2026
നവരമ്യ ദീപാവലി... ദീപാവലി ആശംസകൾ (അൻവർ ഷാ ഉമയനല്ലൂർ)

ഇരുൾനീക്കി പൊരുളിൻ വെളിച്ചമായ് നിറയുവാൻ
കരളിലായ് നന്മാർദ്ര തിരിതെളിക്കുംവിധം
തുലാമാസമമാവാസി നാളിൽ നാം നന്മതൻ
ദീപോത്സവം തെളിക്കുന്നു ഹൃദയങ്ങളിൽ.

അന്ധകാരത്തിൽനിന്നുള്ള വിമോചനം,
ബന്ധുര ചിന്താചെരാതായ് തെളിച്ചു നാം,
തിന്മയ്ക്കുമേൽ നന്മ വിജയിച്ച സുദിനത്തെ-
യോർത്തു വന്ദിക്കുന്നു, ഹൃദയാർദ്രമാംവിധം.

സ്മരണാമരന്ദമായ് നിറയുന്ന ചിന്തകൾ
ഉണരട്ടെയോരോ മനസ്സുകൾക്കുള്ളിലും
മധുരാർദ്രമാകട്ടെയോരോ പുലരിയും
മഹിതാർദ്രമാകട്ടെയിന്നിൻ രജനിയും.

മഹാലക്ഷ്മിതന്നവതാര ദിനമാകയും
നരകാസുരനെ വധിച്ചുദയമേകിയും
മഹനീയ ചിന്തയേകുന്നില്ലെ ദർശനം;
ഭഗവത്പാദങ്ങളോർക്കുന്നില്ലെ, സാദരം.

പ്രകാശപൂരിതമാകട്ടെ പാരിടം
ധനലക്ഷ്മിയായിത്തിളങ്ങട്ടെ; വത്സരം
പങ്കുവയ്ക്കാം മധുരഹൃദയബന്ധങ്ങളും
തിങ്കൾസ്മിതംപോൽ തെളിയ്ക്ക ദീപങ്ങളും.

ഒരു തിരിയിൽനിന്നനേക നാളങ്ങളായ്
തെളിയുന്നു; ജ്‌ഞാനംകണക്കെത്തിളങ്ങുന്നു
അണയാതിരിക്കട്ടെയറിവിൻ പ്രകാശവും;
കരുണാമയന്റെയാ, മഹനീയ രൂപവും.

പ്രകാശം കൊതിക്കുന്ന യേതു ഹൃദയത്തിലും
പ്രഭാതം വിടർത്തുന്നുണർവ്വിൻ മഹാസ്മിതം
പ്രദോഷമായീടിലുമേകുന്നുടയവൻ
നക്ഷത്രജാലമായലിവിൻ ശുഭസ്മിതം.

തമോമയമായതൊന്നാകേയകറ്റിടും
തേജോമയമായ ഹൃദയപ്രകാശവും
സദയം തെളിച്ചുണർത്തീടാം ശുഭസ്മിതം;
തമസ്സകന്നുണരട്ടെ, ഹൃദയമന്ദസ്മിതം...

 

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക