ബഹ്റൈന്‍ : കൊല്ലം പ്രവാസി അസോസിയേഷന്റെ  ആഭിമുഖ്യത്തില്‍ സംഘടിപ്പിച്ച പൊന്നോണം 2026 അദാരി പാര്‍ക്കില്‍ വച്ചു അതിവിപുലമായി ആഘോഷിച്ചു.  കെപിഎ യുടെ ബഹ്റൈനിലെ പത്തു ഏരിയകളില്‍ നിന്നുള്ള അംഗങ്ങള്‍ പങ്കെടുത്ത ആഘോഷം പ്രവാസി മലയാളികളുടെ ഒത്തൊരുമയുടെയും കേരളീയ സംസ്‌കാരത്തിന്റെയും സ്‌നേഹസംഗമമായി മാറി.

ആയിരത്തിമുന്നൂറിലധികം പേര്‍ക്ക് വിഭവസമൃദ്ധമായ ഓണസദ്യ ഒരുക്കി. മുതിര്‍ന്ന കലാകാരന്മാരുടെയും, പ്രവാസശ്രീ അംഗങ്ങളുടെയും, കുട്ടികളുടെയും കലാപരിപാടികളും കെപിഎ സിംഫണിയുടെ ഗാനമേളയും ആഘോഷത്തിന് മാറ്റുകൂട്ടി. വിവിധ കലാപരിപാടികളും സംഗീതവിരുന്നും നിറഞ്ഞുനിന്ന ആഘോഷം കുടുംബാംഗങ്ങള്‍ക്കും കുട്ടികള്‍ക്കും ഒരുപോലെ ആവേശകരമായി.

ബഹ്റൈന്‍ കേരളീയ സമാജം പ്രസിഡന്റ് പി.വി. രാധാകൃഷ്ണപിള്ള ആഘോഷം ഉദ്ഘാടനം ചെയ്തു. കെപിഎ പ്രസിഡന്റ് നിസാര്‍ കൊല്ലം അധ്യക്ഷത വഹിച്ചു. പൊന്നോണം 2026 ജനറല്‍ കണ്‍വീനര്‍ സന്തോഷ് കാവനാട് സ്വാഗതം പറഞ്ഞു.

ബഹ്റൈന്‍ കേരളീയ സമാജം ജനറല്‍ സെക്രട്ടറി വര്‍ഗീസ് കാരയ്ക്കല്‍, സാമൂഹിക പ്രവര്‍ത്തകന്‍ സുബൈര്‍ കണ്ണൂര്‍, കെപിഎ രക്ഷാധികാരി ചന്ദ്രബോസ്, ന്യൂ ഇന്ത്യന്‍ സ്‌കൂള്‍ പ്രിന്‍സിപ്പല്‍ ഗോപിനാഥ് മേനോന്‍, കെപിഎ ജനറല്‍ സെക്രട്ടറി ജഗത് കൃഷ്ണകുമാര്‍ എന്നിവര്‍ ആശംസകള്‍ അറിയിച്ചു.

കെപിഎ വര്‍ക്കിംഗ് പ്രസിഡന്റ് രാജ് കൃഷ്ണന്‍, ഓര്‍ഗനൈസിങ് സെക്രട്ടറി അനൂബ് തങ്കച്ചന്‍ തുടങ്ങിയ ഭാരവാഹികള്‍ ചടങ്ങില്‍ സന്നിഹിതരായിരുന്നു. അസിസ്റ്റന്റ് ട്രഷറര്‍ സിദ്ദീഖ് ഷാന്‍ നന്ദി രേഖപ്പെടുത്തി.

ബഹ്റൈനിലെ സാമൂഹിക-സാംസ്‌കാരിക രംഗത്തെ നിരവധി പ്രമുഖരുടെ സാന്നിധ്യവും കെപിഎ അംഗങ്ങളുടെയും കുടുംബങ്ങളുടെയും സജീവ പങ്കാളിത്തവും പൊന്നോണം 2026-നെ അവിസ്മരണീയമായ ആഘോഷമാക്കി മാറ്റി. സംഘാടകരുടെയും പ്രവര്‍ത്തകരുടെയും കൂട്ടായ പരിശ്രമം ആഘോഷത്തിന്റെ വിജയത്തിന് കരുത്തായി.