മത്സരത്തിലെ ഏറ്റവും ശ്രദ്ധേയമായ നിമിഷമായി മാറിയത് വിജയിയെ പ്രഖ്യാപിച്ച ചടങ്ങായിരുന്നു. 'ആഘോഷം' എന്ന മലയാള സിനിമയുടെ നിര്‍മ്മാതാവ് ഡോ. ലിസി കെ. ഫെര്‍ണാണ്ടസ് വിജയിയുടെ പേര് പ്രഖ്യാപിച്ചു. 'ആഘോഷം' ഉള്‍പ്പെടെയുള്ള സിനിമകള്‍ നിര്‍മ്മിച്ചിട്ടുള്ള ഡോ. ലിസി കെ. ഫെര്‍ണാണ്ടസ്, വിജയിക്ക് തന്റെ അടുത്ത ചിത്രത്തില്‍  അരങ്ങേറ്റം കുറിക്കാന്‍ അവസരം നല്‍കുമെന്ന് പ്രഖ്യാപിച്ചതോടെ വേദി ആവേശത്തിലായി.

സൗന്ദര്യമത്സരത്തിന്റെ പരിധികള്‍ക്കപ്പുറം, മലയാളി യുവതികളുടെ കലാപരമായ കഴിവുകള്‍ക്കും ആത്മവിശ്വാസത്തിനും സിനിമയിലേക്കുള്ള പുതിയ സാധ്യതകള്‍ക്കും വാതില്‍ തുറക്കുന്ന വേദിയായി 'മിസ് ഫൊക്കാന' മാറുകയായിരുന്നു. വിജയിക്ക് ലഭിച്ച സിനിമാ അവസരം ഈ കണ്‍വന്‍ഷനിലെ മത്സരത്തെ കൂടുതല്‍ ശ്രദ്ധേയമാക്കി.

മത്സരം മൂന്ന് റൗണ്ടുകളിലായാണ് നടന്നത് - കേരളീയ വേഷവും പരിചയപ്പെടുത്തലും, ടാലന്റ് റൗണ്ട്, സാരി-ചോദ്യോത്തര റൗണ്ട്. കേരളീയ സംസ്‌കാരത്തോടുള്ള ബന്ധം, വ്യക്തിഗത പ്രതിഭ, ആശയവിനിമയ കഴിവ്, ആത്മവിശ്വാസം, സ്റ്റേജ് പ്രസന്‍സ് എന്നിവ പ്രകടിപ്പിക്കാന്‍ ഓരോ റൗണ്ടും മത്സരാര്‍ത്ഥികള്‍ക്ക് അവസരം നല്‍കി.

മിസ് ഫൊക്കാന 2026 മത്സരത്തില്‍ അശ്വതി മേനോന്‍ കിരീടം ചൂടി. വര്‍ഷ ലിജോ ഒന്നാം റണ്ണര്‍ അപ്പായും ജൊന്നാ മനോജ് രണ്ടാം റണ്ണര്‍ അപ്പായും തിരഞ്ഞെടുക്കപ്പെട്ടു.

ഒന്നാം റണ്ണര്‍ അപ്പിനും രണ്ടാം റണ്ണര്‍ അപ്പിനും ക്യാഷ് പ്രൈസുകള്‍ ഉള്‍പ്പെടെയുള്ള പുരസ്‌കാരങ്ങള്‍ നല്‍കുന്ന രീതിയിലാണ് മത്സരം ഒരുക്കിയിരുന്നത്. ഫൊക്കാന വനിതാ ഫോറം ചെയര്‍പേഴ്‌സണ്‍ രേവതി പിള്ളയുടെ നേതൃത്വത്തിലുള്ള സമിതിയാണ് മത്സരം ഏകോപിപ്പിച്ചത്. സരൂപ അനില്‍ ചെയര്‍പേഴ്‌സണായും പ്രിയ ലൂയിസ് കോ-ചെയറായും പ്രവര്‍ത്തിച്ചു.

പ്രത്യേക പുരസ്‌കാരങ്ങള്‍

മത്സരാര്‍ത്ഥികളുടെ വ്യത്യസ്ത കഴിവുകളും വ്യക്തിത്വ സവിശേഷതകളും പരിഗണിച്ച് നിരവധി പ്രത്യേക പുരസ്‌കാരങ്ങളും നല്‍കി:

Best Talent - ഐറിന്‍ തട്ടത്തില്‍
Best Hair - ഒലിവിയ ഷാജി
Best Personality - സിന്റ ബെനി
Best Walk - അഫ്ര സൂനി
Best Traditional Elegance - സ്റ്റെഫാനി സ്റ്റീഫന്‍
Best Smile - ലിയാന വര്‍ഗീസ്

വിമന്‍സ് ഫോറം നേതാക്കളും വിശ്വാസ ബ്രാന്‍ഡ് സഹഉടമ നിഷ പിള്ളയും ചേര്‍ന്നാണ് സബ്കാറ്റഗറി പുരസ്‌കാരങ്ങള്‍ സമ്മാനിച്ചത്.

സബ്കാറ്റഗറി ട്രോഫികള്‍ മുഴുവന്‍ വിശ്വാസ ബ്രാന്‍ഡിന്റെ Samrddhi Hair Growth Oil സ്‌പോണ്‍സര്‍ ചെയ്തു. രേവതി പിള്ള, നേഹ പിള്ള, നിഷ പിള്ള എന്നിവരാണ് വിശ്വാസ ബ്രാന്‍ഡിന്റെ ഉടമകള്‍.

മത്സരാര്‍ത്ഥികളെ വിലയിരുത്തുന്നതിനായി പ്രമുഖരായ മൂന്ന് അംഗങ്ങളടങ്ങിയ ജഡ്ജിംഗ് പാനലാണ് ഉണ്ടായിരുന്നത് - മിനി സജന്‍, രാജന്‍ ചീരന്‍, ഡോ. ആലിസ് മാത്യു. മത്സരാര്‍ത്ഥികളെ വിലയിരുത്തുന്നതിന് അവര്‍ നല്‍കിയ സമയം, പരിചയം, ശ്രദ്ധ, വൈദഗ്ധ്യം എന്നിവയ്ക്ക് വിമന്‍സ് ഫോറം നന്ദി അറിയിച്ചു.

ഫൊക്കാന വിമന്‍സ് ട്രെയില്‍ബ്ലേസര്‍ അവാര്‍ഡ് ബിനു പിള്ള-അബ്ദുലിന്

പരിപാടിയുടെ ഇടവേളയില്‍ നടന്ന ഏറ്റവും ശ്രദ്ധേയമായ ചടങ്ങുകളിലൊന്നായിരുന്നു ഫൊക്കാന വിമന്‍സ് ട്രെയില്‍ബ്ലേസര്‍ അവാര്‍ഡ് സമ്മാനിച്ചത്. ന്യൂയോര്‍ക്ക് പോലീസ് ഡിപ്പാര്‍ട്ട്‌മെന്റില്‍ (NYPD) ആദ്യ മലയാളി വനിതാ ഡിറ്റക്ടീവ് എന്ന ചരിത്രനേട്ടം കൈവരിച്ച ബിനു പിള്ള-അബ്ദുലിനെ ആദരിച്ചുകൊണ്ടാണ് പുരസ്‌കാരം നല്‍കിയത്.

പ്രശസ്ത ചലച്ചിത്ര സംവിധായകനും പദ്മവിഭൂഷണ്‍ പുരസ്‌കാര ജേതാവുമായ അടൂര്‍ ഗോപാലകൃഷ്ണന്‍ ആണ് പുരസ്‌കാരം സമ്മാനിച്ചത്. ഇതോടെ ചടങ്ങ് കൂടുതല്‍ അവിസ്മരണീയമായി. ഫൊക്കാന പ്രസിഡന്റ് സജിമോന്‍ ആന്റണി ഉള്‍പ്പെടെയുള്ള നേതാക്കള്‍ സന്നിഹിതരായിരുന്നു.

ഫൊക്കാനാ കണ്‍വന്‍ഷന്റെ വേദിയില്‍ നിന്ന് മലയാള സിനിമയിലേക്കുള്ള ഒരു പുതുവാതില്‍ തുറന്നുകൊടുത്ത 'മിസ് ഫൊക്കാന 2026', അമേരിക്കന്‍ മലയാളി സമൂഹത്തിലെ യുവതലമുറയുടെ സ്വപ്നങ്ങള്‍ക്കും കഴിവുകള്‍ക്കും പുതിയ ആകാശം സമ്മാനിച്ച ശ്രദ്ധേയമായ വേദിയായി.