1
ഒട്ടിയൊട്ടി നട്ടെല്ല് തൊട്ട വയറ് സുന്ദരകാണ്ഡം വായിക്കുന്നു
ബുള്ളറ്റ് വേണ്ട
ബാലറ്റ് വേണ്ട
കടമെങ്കിൽ കടമായി
തൽക്കാലം ആര് തരും
കത്തലടക്കാൻ ഒരു ഓംലെറ്റ് !
2
ചൂതാട്ടത്തിൽ
നമുക്ക് നഷ്ടപ്പെടാനുള്ളത്
ഒരു ചൂതുപടവും
കുറച്ച് കരുക്കളും
കളത്തിൽ രാജാവും മന്ത്രിയും എന്നും
കാലാൾപ്പടക്ക് പിറകിലായിരിക്കും.
3
വിരലിൽ മഷി
പടരുമ്പോൾ ഒരു സുഖമുണ്ട്
ഇനി ഒരു മരിച്ചവനും
ക്യൂവിൽ വരി നിന്ന് ദംഷ്ട്രകളുമായ്
എന്റെ അവകാശത്തിനു
കത്തി വെക്കില്ലല്ലോ!
4
ആസുരമത്സരമാ
ലൈസൻസ് വേണ്ട
കോമൺ സെൻസ് വേണ്ട
നോൺ സെൻസ് തട്ടി വിടാം
ഡ്രൈവിങ്ങ് ലൈസൻസില്ലാത്ത കിളി
ആറുവരി പാതയിൽ
ഇരുപത്തി നാല് ചക്രമുള്ള
കൺടെയിനർ ഓടിക്കും
ചിഹ്നങ്ങളിൽ നന്മയെ തിരഞ്ഞ്
അവസാനം തിന്മയെ വീട്ടിലേക്ക്
എഴുന്നള്ളിക്കരുത്.
5
എന്റെ വീട്ടിലെ കറുത്ത കോഴി
ഇതിനകം പതിനാറ് വെളുത്ത മുട്ടയിട്ടു
നിന്റെ വീട്ടിലെ ചുവന്ന മച്ചിക്കോഴി
മുട്ടയിട്ട ചരിത്രമില്ല
ആ ഒറ്റക്കാരണം പറഞ്ഞ്
ആർക്കും നിഷേധിക്കാനൊക്കില്ല
ഓംലെറ്റിനുള്ള നിന്റെ അവകാശത്തെ
പ്രത്യേകിച്ചും വയറൊട്ടിയ
ഈ തിരഞ്ഞെടുപ്പ് കാലത്ത്!
6
നാവിനും കൈക്കും
ചരണങ്ങളിലും
പ്രചാരണങ്ങളിലും
നല്ല ഊക്കായിരിക്കും
സിംഹാസനത്തിൽ
ആരുഢമുറപ്പിക്കുമ്പോൾ
അവയവങ്ങൾ
തളർവാതം പിടിപെട്ട്
തളരരുത്!
7
ആരെയും അധികം
ഒക്കത്ത് എടുക്കണ്ട
ഓമനിക്കേണ്ട
അധികാരം കിട്ടുമ്പോൾ
മട്ട് മാറും
ചുങ്കമധികം ചുമത്താൻ വരുമ്പോൾ
അങ്കത്തട്ടിൽ കണ്ട ആളായിരിക്കില്ല.
8
വിഗ്രഹങ്ങളെയും
പൊൻതിടമ്പുകളെയും
എടുത്തു പൊക്കുമ്പോൾ
സ്വന്തം പോക്കറ്റടിക്കപ്പെടാതെ സൂക്ഷിക്കുക.
പൊക്കപ്പെടുന്നവരുടെ
കാലുകൾ പോളിയൊ ബാധിച്ചതു
പോലെയാകും
ഇന്ന് പോളിങ്ങ് ദിനമാണ്
കഴിയുമെങ്കിൽ സ്വന്തം കാലിൽ തന്നെ
നടന്നു പോയി
അടിപൊളിയായി ബട്ടൻ അമർത്തുക
നിങ്ങളെ അടിച്ചമർത്താൻ
ആരെയും അനുവദിക്കരുത്!
9
കവികൾ മുൻകൂറായി
ചരമക്കുറിപ്പെഴുതി വെച്ച
ഇളംനീലക്കുത്തായ നമ്മുടെ ഭൂമി,
അതിന്റെ ചിഹ്നത്തിൽ, ഒരു വോട്ട്
നിങ്ങളിൽ നിന്ന് പ്രതീക്ഷിക്കുന്നുണ്ട്.
ബൂത്തിലേക്കു തിരിക്കുമ്പോൾ
ഇക്കാര്യവും ഒന്ന് ശ്രദ്ധിക്കുക:
ഹരിതഗൃഹവാതകങ്ങൾക്കും
പ്ലാസ്റ്റിക്കിനും നോ വോട്ട്!