പ്രസിഡന്റ് ജോ ബൈഡന്റെ അപ്പ്രൂവൽ റേറ്റിംഗ് കഴിഞ്ഞ നവംബറിനു ശേഷമുള്ള ഏറ്റവും ഉയർന്ന 43 ശതമാനത്തിൽ എത്തി. അതേ സമയം, 10 വ്യത്യസ്‌ത സർവേകളിൽ അദ്ദേഹം ഡൊണാൾഡ് ട്രംപിനെതിരെ വ്യക്തമായ ലീഡും നേടി. 

ഫൈനാൻഷ്യൽ ടൈംസ്/ യൂണിവേഴ്സിറ്റി ഓഫ് മിഷിഗൺ റോസ് സ്കൂൾ ഓഫ് ബിസിനസ് എന്നിവയുടെ പുതിയ പോളിംഗിലാണ് തൊഴിൽ മികവിനുള്ള അംഗീകാരം കുതിച്ചുയർന്നത്. മാർച്ചിലെ നിലയിൽ നിന്നു 4% വർധനയാണ് ഏപ്രിലിൽ അദ്ദേഹം നേടിയത്. 

റജിസ്റ്റർ ചെയ്ത വോട്ടർമാരിൽ 41% അദ്ദേഹം സമ്പദ് വ്യവ്‌സഥ കൈകാര്യം ചെയ്യുന്ന രീതി അംഗീകരിച്ചു. മാർച്ചിൽ നിന്നു 5% വർധന. ട്രംപിനെ ഇക്കാര്യത്തിൽ അംഗീകരിക്കുന്നവർ 35% മാത്രം. 

സമീപകാലത്തു ബൈഡൻ 40% കടക്കുന്നത് ഇതാദ്യമാണ്. ജനുവരിയിൽ എബിസി ന്യൂസ്/ ഇപ്‌സോസ് നടത്തിയ പോളിംഗിൽ അദ്ദേഹം 33% വരെ കൂപ്പുകുത്തി. ഫെബ്രുവരി ഗാലപ് പോൾ കണ്ടത് 38% ആണ്. നവംബറിൽ ഹാർവാർഡ് സി എ പി എസ്-ഹാരിസ് സർവേയിൽ ബൈഡൻ 45% നേടിയിരുന്നു. അന്നു 44% പേർ സാമ്പത്തിക രംഗത്തെ നേട്ടത്തെ മാനിച്ചാണ് അദ്ദേഹത്തെ പിന്താങ്ങിയത്. 

ട്രംപിനെ പിന്നിലാക്കുന്നു 

തിരഞ്ഞെടുപ്പിന് ഏഴു മാസം മാത്രം ബാക്കി നിൽക്കെയാണ് ബൈഡൻ കഴിഞ്ഞ മാസത്തെ 10 സർവേകളിൽ ട്രംപിനെ പിന്നിലാക്കുന്നത്. 

റോയിട്ടേഴ്‌സ്/ഇപ്‌സോസ് പോളിംഗിൽ ബൈഡൻ 41% പിന്തുണ നേടുമ്പോൾ ട്രംപിനു കിട്ടുന്നത് 37% ആണ്. സർവെയ്‌ക്കു 4% മാർജിൻ ഓഫ് എറർ ഉണ്ടാവാം. ഏപ്രിൽ 5-9 നു  റജിസ്റ്റർ ചെയ്ത 833 വോട്ടർമാരാണ് പങ്കെടുത്തത്. 

ക്വിനിപ്പിയാക് യൂണിവേഴ്സിറ്റി മാർച്ച് 27നു നടത്തിയ സർവേയിൽ റജിസ്റ്റർ ചെയ്ത 1,407 വോട്ടർമാർ പങ്കെടുത്തു. 48% പിന്തുണയാണ് ബൈഡൻ നേടിയത്. ട്രംപിനു 45%. എറർ +/- 2.6%. 

ഫ്ലോറിഡ അറ്റ്ലാന്റിക് യൂണിവേഴ്സിറ്റി/ മെയിൻസ്ട്രീറ്റ് സർവേയിൽ പ്രസിഡന്റ് 47% പിന്തുണ കാണുമ്പോൾ ട്രംപ് 45% നേടുന്നു. മാർച്ച് 15-17നു 1,053 മുതിർന്ന വോട്ടർമാരെ കണ്ട സർവേയിൽ പിഴവ് +/- 3.0% ആണ്. 

ആർ എം ജി റിസർച് 1,679 വോട്ടർമാർക്കിടയിൽ ഏപ്രിൽ 1 മുതൽ 4 വരെ നടത്തിയ പോളിംഗിൽ ബൈഡൻ 44%, ട്രംപ് 43% എന്നിങ്ങനെയാണ് നില. മാർജിൻ ഓഫ് എറർ 2.4%. 

ഡേറ്റ ഓഫ് പ്രോഗ്രസ് 1,200 വോട്ടർമാരെ കണ്ടപ്പോൾ 47% ബൈഡനെ പിന്തുണച്ചു. ട്രംപിനു 46%.  

മാർകിറ്റ് ലോ സ്കൂൾ മാർച്ച് 18-20നു നടത്തിയ സർവേയിൽ 45% ബൈഡനെ തുണച്ചു, ട്രംപിനെ 44% പേരും. റജിസ്റ്റർ ചെയ്ത വോട്ടർമാരിൽ 44% ബൈഡനു വോട്ട് ചെയ്യുമെന്നു പറഞ്ഞപ്പോൾ ട്രംപിന് ആ ഉറപ്പു നൽകുന്നത് 42% ആണ്. 

എം പി ആറിനു വേണ്ടി മാറിസ്റ്റ് കോളജ് 1,305 റജിസ്റ്റർ ചെയ്ത വോട്ടർമാരോട് സംസാരിച്ചപ്പോൾ ബൈഡനു 50%, ട്രംപിനു 48% എന്നിങ്ങനെയാണ് പിന്തുണ. മാർച്ച് 25-28 പോളിംഗിൽ  1,199 പേർ പങ്കെടുത്തു. 

ഐ&ഐ/ടിപ്പ് പോളിംഗിൽ റജിസ്റ്റർ ചെയ്ത  1,265 വോട്ടർമാരിൽ 43% ബൈഡനെയും 40% ട്രംപിനെയും പിന്താങ്ങി. എറർ +/- 2.8%. 

നോബിൾ പ്രെഡിക്റ്റിവ് റജിസ്റ്റർ ചെയ്ത 2,510 വോട്ടർമാരെ സർവേ ചെയ്തപ്പോൾ 44% ബൈഡൻ, 43% ട്രംപ് എന്നിങ്ങനെ കണ്ടു. 

ഡെമോക്രാറ്റിക് സൂപ്പർ പി എ സി പ്രോഗ്രസ് ആക്ഷൻ ഫണ്ടിന്റെ സർവേയിൽ ബൈഡൻ 46%, ട്രംപ് 45%. എറർ +/- 3.4%. മാർച്ച് 12-13 നു റജിസ്റ്റർ ചെയ്ത 837 വോട്ടർമാരോട് സംസാരിച്ചു. 

Biden leaps in surveys