ഹ്യൂസ്റ്റൺ: ജോൺസ് സി വർഗീസ് (സലിം) പിന്മാറുകയും ബേബി മണക്കുന്നേൽ   രംഗത്തു വരികയും  ചെയ്തതോടെ ഫോമാ ഇലക്ഷൻ രംഗം സജീവമായി. പാനലും ബേബി പ്രഖ്യാപിച്ചു. ബൈജു വർഗീസ്, ന്യു ജേഴ്‌സി (സെക്രട്ടറി),  ഷാലു പുന്നൂസ്, ഫിലാഡൽഫിയ (വൈസ് പ്രസിഡന്റ്)  സിജിൽ പാൽക്കലോടി , കാലിഫോർണിയ (ട്രഷറർ), പോൾ  ജോസ്, ന്യു യോർക്ക് (ജോ. സെക്രട്ടറി) അനുപം കൃഷ്ണൻ (ഒഹായോ) എന്നിവരാണ് പാനലിലെ മറ്റംഗങ്ങൾ 

തോമസ് ടി ഉമ്മൻ നേതൃത്വം നൽകുന്ന പാനലാണ് എതിർ ഭാഗത്ത്. സലീമിന് അനുകൂലമായി ബേബി മണക്കുന്നേൽ പിന്മാറും എന്ന ധാരണയുണ്ടായിരുന്നുവെങ്കിലും സലിം പിന്മാറിയതോടെ ബേബി സജീവമായി രംഗത്തു വരികയായിരുന്നു. 

ബേബി മണക്കുന്നേല്‍ ഔദ്യോഗികമായി സ്ഥാനാര്‍ത്ഥിത്വം പ്രഖ്യാപിച്ചതോടെ മത്സരം ആവേശകരമാകുമെന്ന് ഉറപ്പായി.

ഹ്യൂസ്റ്റണില്‍ സൗത്ത് ഇന്ത്യന്‍ യുഎസ് ചേമ്പര്‍ ഓഫ് കൊമേഴ്സിന്റെ പ്രസിഡന്റും ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ് യുഎസ് പ്രസിഡന്റുമായ ബേബി ചേമ്പര്‍ ഓഫ് കൊമേഴ്‌സിന്റെ കോര്‍പ്പറേറ്റ് ഓഫീസില്‍ നടന്ന യോഗത്തിലാണ് സ്ഥാനാര്‍ഥിത്വം പ്രഖ്യാപിച്ചത്. ഫോമയുടെ ആദ്യ കണ്‍വന്‍ഷന്‍ ചെയര്‍മാന്‍,  കെസിസിഎന്‍എ മുന്‍ പ്രസിഡണ്ട്,  ഹ്യൂസ്റ്റണ്‍ മലയാളി അസോസിയേഷന്‍ മുന്‍ പ്രസിഡന്റ്, രണ്ടു തവണ ഫോമ സതേണ്‍ റീജിയണ്‍ റീജിണല്‍ വൈസ് പ്രസിഡന്റ്, ഹ്യൂസ്റ്റണ്‍ ക്‌നാനായ കാത്തലിക് സൊസൈറ്റിയുടെ പ്രസിഡന്റ്, ക്‌നാനായ റിട്ടയര്‍മെന്റ് കമ്മ്യുണിറ്റി സ്ഥാപകാംഗം തുടങ്ങി നിരവധി മേഖലകളില്‍ തിളങ്ങിയ വ്യക്തിത്വമാണ് ബേബി.

നാട്ടില്‍ അധ്യാപകനായിരുന്ന അദ്ദേഹം സാമുഹ്യ-രാഷ്ട്രീയ രംഗങ്ങളില്‍ സജീവമായിരുന്നു. യുഎസില്‍ വന്നതിനുശേഷം സ്വന്തം ബിസിനസ് സാമ്രാജ്യം കെട്ടിപ്പെടുത്തി.  

15 വര്‍ഷത്തിന് മുമ്പ് ഫോമ എന്ന സംഘടന ഹ്യൂസ്റ്റണില്‍ ആണ് പിറന്നത്. ഫോമയുടെ പിറവി അമേരിക്കന്‍ മലയാളികളുടെ കുടിയേറ്റ ചരിത്രത്തില്‍ വളര്‍ച്ചയുടെ മുന്നേറ്റത്തിന് വഴികാട്ടിയായി. 15 വര്‍ഷത്തിന് ശേഷം വീണ്ടും ഹ്യൂസ്റ്റണില്‍ കണ്‍വഷന്‍ വരണമെന്ന് ഫോമയിലുള്ള ഭൂരിപക്ഷം ആളുകളും ആഗ്രഹിക്കുന്നു. ഇതിന്റെ പശ്ചാത്തലത്തില്‍ ബേബിയുടെ സ്ഥാനാര്‍ഥിത്വം അനിവാര്യമാണെന്ന്  അദ്ദേഹം  ഏതാനും ആഴ്ച മുൻപ് ചേമ്പര്‍ ഓഫ് കൊമേഴ്‌സിന്റെ കോര്‍പ്പറേറ്റ് ഓഫീസില്‍ നടന്ന യോഗത്തിൽ  സ്ഥാനാർത്ഥിത്വം  പ്രഖ്യാപിച്ചപ്പോൾ പിന്തുണ അര്‍പ്പിച്ച് സംസാരിച്ച എല്ലാവരും ഊന്നി പറഞ്ഞു.

ഫോമ സതേണ്‍ റീജിയണ്‍ വൈസ് പ്രസിഡന്റ് മാത്യു മുണ്ടയ്ക്കലിന്റെ അധ്യക്ഷതയില്‍ കൂടിയ യോഗത്തില്‍ ഫോമയുടെ പ്രഥമ പ്രസിഡന്റ് ശശിധരന്‍ നായര്‍, പ്രഥമ ട്രഷറര്‍ എംജി മാത്യു, ഫോമ നാഷണല്‍ കമ്മറ്റി മെമ്പേഴ്സ് ആയ രാജന്‍ പത്തനാപുരം, ജിജു കുളങ്ങര, ബാബു മുല്ലശ്ശേരി, സണ്ണി കാരിക്കല്‍, ജോയി എം. സാമുവേല്‍, മൈസൂര്‍ തമ്പി, കേരള കണ്‍വന്‍ഷന്‍ ചെയര്‍മാനായിരുന്ന തോമസ് ഒലിയാങ്കുന്നേല്‍, ഹിമി ഹരിദാസ്, എസ്.കെ. ചെറിയാന്‍ തുടങ്ങിയവര്‍ ബേബിയുടെ സ്ഥാനാര്‍ത്ഥിത്വത്തിന് പിന്തുണ പ്രഖ്യാപിച്ച് സംസാരിച്ചു.

മാഗ് പ്രസിഡന്റ് ജോജി ജോസഫ്, ക്നാനായ സമുദായത്തെ പ്രതിനിധീകരിച്ച് ജിമ്മി കുന്നശ്ശേരി, ബാബു മുളയാനിക്കല്‍, പേള്‍ലാന്‍ഡ് അസോസിയേഷനെ പ്രതിനിധീകരിച്ച് ജോമോന്‍ ഇടയാടി, 'മന്ത്ര'യെ പ്രതിനിധീകരിച്ച് രമേശ് അടിയോടി, സോമന്‍ നായര്‍, പത്രമാധ്യമങ്ങളെ പ്രതിനിധീകരിച്ച് ജീമോന്‍ റാന്നി, സൈമണ്‍ വാളച്ചേരി, അജു വാരിക്കാട് എന്നിവര്‍ സംസാരിച്ചു.

സൗത്ത് ഇന്ത്യന്‍ യു.എസ് ചേമ്പര്‍ ഓഫ് കൊമേഴ്സിനെ പ്രതിനിധീകരിച്ച് ഡോ. ജോര്‍ജ് എം. കാക്കനാട് ഉള്‍പ്പെടെയുള്ളവര്‍ ആശംസ അറിയിച്ചു. സൗത്ത് ഇന്ത്യന്‍ യു.എസ് ചേമ്പര്‍ ഓഫ് കൊമേഴ്സ് ബ്രൂസ് കൊളമ്പേല്‍ പരിപാടികളുടെ എംസിയായി പ്രവര്‍ത്തിച്ചു. ഫോമ സതേണ്‍ റീജിയണ്‍ സെക്രട്ടറി രാജേഷ് മാത്യു നന്ദി പറഞ്ഞു