വാഷിംഗ്ടൺ, ഡി.സി:  യുഎസ് വൈസ് പ്രസിഡന്റ് കമല ഹാരിസും   പ്രധാനമന്ത്രി നരേന്ദ്ര മോദിയും തമ്മിൽ  വിവിധ മേഖലകളെപ്പറ്റി  ചർച്ച നടത്തി. 

വൈസ് പ്രസിഡന്റിന്റെ പ്രസംഗത്തിന്റെ കോപ്പി മാധ്യമങ്ങൾക്കു നൽകിയിരുന്നു.

"മിസ്റ്റർ പ്രധാനമന്ത്രി, നിങ്ങളെ വൈറ്റ് ഹൗസിലേക്കും വാഷിംഗ്ടൺ ഡിസിയിലേക്കും സ്വാഗതം ചെയ്യുന്നത്തിൽ ഞാൻ അഭിമാനിക്കുന്നു. കഴിഞ്ഞ 16 മാസങ്ങളിൽ ദക്ഷിണേഷ്യയ്ക്ക് പുറത്തുള്ള നിങ്ങളുടെ ആദ്യ യാത്രയാണ് ഇത് എന്നാണ് എന്റെ ധാരണ. പ്രസിഡന്റിന്റെയും എന്റെയും പേരിൽ  നിങ്ങളെ സ്വാഗതം ചെയ്യുന്നതിൽ  അഭിമാനിക്കുന്നു.

അമേരിക്കയുടെ വളരെ പ്രധാനപ്പെട്ട പങ്കാളിയാണ് ഇന്ത്യ. നമ്മുടെ ചരിത്രത്തിലുടനീളം, നമ്മുടെ രാഷ്ട്രങ്ങൾ ഒരുമിച്ച് പ്രവർത്തിച്ചിട്ടുണ്ട്. ലോകത്തെ സുരക്ഷിതവും ശക്തവുമാക്കി മാറ്റാൻ നാം ഒരുമിച്ച് നിന്നു.

മിസ്റ്റർ പ്രധാനമന്ത്രി, നിങ്ങളും ഞാനും അവസാനമായി ജൂണിൽ സംസാരിച്ചപ്പോൾ,  ലോകം കൂടുതൽ പരസ്പരബന്ധിതവും പരസ്പരാശ്രിതവുമാകുന്നതിനെ പരാമർശിക്കുകയുണ്ടായി. ഇന്ന് നമ്മൾ അഭിമുഖീകരിക്കുന്ന വെല്ലുവിളികൾ ആ വസ്തുത ഉയർത്തിക്കാട്ടുന്നു-കോവിഡ് -19, കാലാവസ്ഥാ പ്രതിസന്ധി,  ഇന്തോ-പസഫിക് മേഖലയിലെ നമ്മുടെ പങ്കിട്ട വിശ്വാസത്തിന്റെ പ്രാധാന്യം.

കോവിഡ് -19 ൽ, നമ്മുടെ രാജ്യങ്ങൾ ഒരുമിച്ച് പ്രവർത്തിച്ചിട്ടുണ്ട്. പകർച്ചവ്യാധിയുടെ തുടക്കത്തിൽ, ഇന്ത്യ മറ്റ് രാജ്യങ്ങൾക്ക് വാക്സിന്റെ  സുപ്രധാന ഉറവിടമായിരുന്നു. കോവിഡ്  ഇന്ത്യയിൽ കൂടിയപ്പോൾ  പ്രതിരോധ കുത്തിവയ്പ്പ് നൽകേണ്ടതിന്റെ ആവശ്യകതയിലും ഉത്തരവാദിത്തത്തിലും ഇന്ത്യയെ പിന്തുണയ്ക്കുന്നതിൽ അമേരിക്ക മുന്നിലുണ്ടായിരുന്നതിൽ വളരെ അഭിമാനിക്കുന്നു.

വാക്സിൻ കയറ്റുമതി ഉടൻ പുനരാരംഭിക്കാൻ കഴിയുമെന്ന ഇന്ത്യയുടെ പ്രഖ്യാപനത്തെ ഞാൻ സ്വാഗതം ചെയ്യുന്നു. ഇന്നത്തെ കണക്കനുസരിച്ച്, ഇന്ത്യ നിലവിൽ ഒരു ദിവസം ഏകദേശം 10 ദശലക്ഷം ആളുകൾക്ക് പ്രതിരോധ കുത്തിവയ്പ്പ് നൽകുന്നുവെന്നത് പ്രത്യേക ശ്രദ്ധയും പ്രശംസയുമർഹിക്കുന്നു.

കാലാവസ്ഥാ പ്രതിസന്ധിയുടെ വിഷയത്തിൽ, ഇന്ത്യയും നിങ്ങളും ഈ വിഷയം വളരെ ഗൗരവമായി എടുക്കുന്നുവെന്ന് എനിക്കറിയാം. ഇന്ത്യയും അമേരിക്കയും ഒരുമിച്ച് പ്രവർത്തിക്കുന്നത് നമ്മുടെ രാജ്യങ്ങളിലെ ജനങ്ങളിൽ മാത്രമല്ല, ലോകത്തിൽ തന്നെ ആഴത്തിലുള്ള സ്വാധീനം ചെലുത്തുമെന്ന് പ്രസിഡന്റും ഞാനും വളരെ ശക്തമായി വിശ്വസിക്കുന്നു.

അവസാനമായി, ലോകമെമ്പാടുമുള്ള ജനാധിപത്യ രാജ്യങ്ങൾ ഭീഷണി നേരിടുന്നതിനാൽ, അതാത് രാജ്യങ്ങളിലും ലോകമെമ്പാടുമുള്ള ജനാധിപത്യ തത്വങ്ങളെയും സ്ഥാപനങ്ങളെയും സംരക്ഷിക്കേണ്ടത് അത്യാവശ്യമാണ്.  കൂടാതെ  ജനാധിപത്യത്തെ ശക്തിപ്പെടുത്താൻ നമ്മൾ  ചെയ്യേണ്ടത്  ചെയ്യണം. തീർച്ചയായും, നമ്മുടെ രാജ്യങ്ങളിലെ ജനങ്ങളുടെ താൽപ്പര്യാർത്ഥം ജനാധിപത്യത്തെ സംരക്ഷിക്കേണ്ടത് നമ്മുടെ  കടമയാണ്.

മിസ്റ്റർ പ്രധാനമന്ത്രി, നമ്മുടെ  പരസ്പര ഉത്കണ്ഠകൾ, നമ്മൾ അഭിമുഖീകരിക്കുന്ന വെല്ലുവിളികൾ എന്നിവയെക്കുറിച്ചും  നമ്മുടെ ബന്ധം ശക്തിപ്പെടുത്തുന്നതിനായി എങ്ങനെ മികച്ച രീതിയിൽ ഒരുമിച്ച് പ്രവർത്തിക്കാൻ കഴിയുമെന്നും  ചർച്ച ചെയ്യാൻ ഞാൻ ആഗ്രഹിക്കുന്നു.

ജനാധിപത്യത്തോടും സ്വാതന്ത്ര്യത്തോടുമുള്ള ഇന്ത്യൻ ജനതയുടെ പ്രതിബദ്ധതയെക്കുറിച്ച് വ്യക്തിപരമായ അനുഭവത്തിൽ നിന്നും എന്റെ കുടുംബത്തിൽ നിന്നും എനിക്കറിയാം-അവർ പറഞ്ഞു