റോം: തേടുന്നവര്ക്ക് ദൈവത്തെ കണ്ടെത്തുവാനുള്ള വഴി, ‘വിശ്വാസ വത്സരം’
തെളിക്കുമെന്ന്, നവസുവിശേഷവത്ക്കരണത്തിനായുള്ള പൊന്തിഫിക്കല്
കൗണ്സിലിന്റെ പ്രസിഡന്റ്, ആര്ച്ചുബിഷപ്പ് റെയ്നോ ഫിസിക്കേല്ലാ
പ്രസ്താവിച്ചു. വിശ്വാസ വത്സരത്തിന്റെ പ്രവര്ത്തന പദ്ധതികള്
പ്രസിദ്ധീകരിച്ചുകൊണ്ട് ജൂണ് 21-ാം തിയതി രാവിലെ വത്തിക്കാനില് നടത്തിയ
വാര്ത്താ സമ്മേളനത്തിലാണ് ആര്ച്ചുബിഷപ്പ് ഫിസിക്കേല്ലാ ഇപ്രകാരം
പ്രസ്താവിച്ചത്.
മനുഷ്യനെ തന്നിലേയ്ക്കുതന്നെ ഒതുക്കിക്കളഞ്ഞ
ആനുകാലിക പ്രതിസന്ധകളുടെ പ്രത്യാഘാതമാണ് ഇന്നത്തെ വിശ്വാസ
പ്രതിസന്ധിയെന്നും, എല്ലാ മേഖലകളിലും ആധുനിക മനുഷ്യന് അന്വേഷിക്കുന്ന
വ്യക്തി സ്വാതന്ത്ര്യം ഈ ഭൂമിയില് ‘ദൈവം ഇല്ലാത്തതുപോലെ’ ജീവിക്കാന് അവനെ
പ്രേരിപ്പിക്കുന്നതെന്നും ആര്ച്ചുബിഷപ്പ് ഫിസിക്കേല്ലാ ചൂണ്ടിക്കാട്ടി.
സഭയുടെ പ്രായോഗിക തീരുമാനങ്ങളില് സജീവമായി പങ്കുചേര്ന്നുകൊണ്ട്, വിശ്വസ
പാതയിലേയ്ക്ക് തിരിച്ചുവരാന് ആഗ്രഹിക്കുന്നവരെ, ക്രൈസ്തവ മക്കള്
ഉത്തരവാദിത്വത്തോടെ സഹായിക്കുകയും അവരെ കൈപിടിച്ചുയര്ത്തുകയും ചെയ്യണമെന്നും ആര്ച്ചുബിഷപ്പ് ഫിസിക്കേല്ലാ തന്റെ പ്രസ്താവനയിലൂടെ അഭ്യര്ത്ഥിച്ചു.