തിരുവനന്തപുരം: നിയമസഭാ തിരഞ്ഞെടുപ്പിന് മുന്നോടിയായി പിസി ജോര്ജിന്റെ ജനപക്ഷം പാര്ട്ടി എന്ഡിഎ ഘടക കക്ഷിയായേക്കും. യുഡിഎഫില് ഘടക കക്ഷിയാക്കുന്നതിനോട് കോണ്ഗ്രസ് പ്രാദേശിക നേതൃത്വം എതിര്പ്പുയര്ത്തിയതോടെയാണ് പിസി ജോര്ജ് നിലപാട് മാറ്റത്തിനൊരുങ്ങുന്നത്. 27 ന് രാഷ്ട്രീയ നിലപാട് പ്രഖ്യാപിക്കുമെന്നും പിസി ജോര്ജ് വ്യക്തമാക്കിയിട്ടുണ്ട്.
പിസി ജോര്ജിനെ മുന്നണിയിലെടുത്താല് സമാന്തര സ്ഥാനാര്ഥിയെ നിര്ത്തുമെന്ന് കോണ്ഗ്രസ് നേതാക്കള് പറഞ്ഞതോടെ പൊതു സ്വതന്ത്രനായി മത്സരിച്ചാല് പിന്തുണ നല്കാമെന്നാണ് ഒടുക്കം യുഡിഎഫ് നിലപാടെടുത്ത്. എന്നാല് ഇതിനോട് പിസി ജോര്ജിന് താതപര്യമില്ല. ഇതേതുടര്ന്നാണ് മറ്റ് മാര്ഗങ്ങള് നോക്കാന് പിസി ജോര്ജ് നിര്ബന്ധിതമായത്.
പിസി ജോര്ജിന്റെ ബിജെപി ബാന്ധവവും സമീപകാലത്ത് നടത്തിയ മുസ് ലിം വിരുദ്ധ പരാമര്ശവും മറ്റും തിരിച്ചടിയാകുമെന്ന് ചൂണ്ടിക്കാട്ടിയാണ് പ്രാദേശിക നേതൃത്വം എതിര്പ്പ് ഉയര്ത്തിയത്. എന്നാല് ഇപ്പോഴത്തെ പ്രശ്നങ്ങള്ക്ക് കാരണം മുന് മുഖ്യമന്ത്രി ഉമ്മന് ചാണ്ടിയാണെന്നാണ് പിസി ജോര്ജ് പറയുന്നത്.
നിലവില് ഒരു മുന്നണിയുടെയും ഭാഗമല്ലാതിരിക്കുന്ന പിസി ജോര്ജിനെ എന്ഡിഎയിലേക്ക് തിരികെ കൊണ്ടുവരാന് ബിജെപി ശ്രമിക്കുന്നുണ്ട്.