കോവിഡ് 19 ന് കാരണമാകുന്ന വൈറസിന്റെ അതിജീവനവുമായി ബന്ധപ്പെട്ട് നടത്തിയ ഏറ്റവും പുതിയ പഠനം നൽകുന്ന ഫലം ആശങ്ക വളർത്തുന്നു. കറൻസി നോട്ടുകൾ , മൊബൈൽ ഫോൺ സ്ക്രീനുകൾ , ഗ്ലാസ് പ്രതലങ്ങൾ , സ്റ്റെയിൻലെസ്സ് സ്റ്റീൽ എന്നീ ഇടങ്ങളിൽ കോറോണവൈറസ് 28 ദിവസങ്ങൾ വരെ രോഗം പടർത്താൻ പര്യാപ്തമായ വീര്യത്തോടെ നിലനിൽക്കുമെന്നാണ് ഗവേഷകർ കണ്ടെത്തിയത്. മുൻപത്തെ പഠനങ്ങളിൽ വൈറസിന് ഇത്രമാത്രം ദിവസങ്ങൾ അതിജീവിക്കാമെന്ന് കണ്ടെത്തിയിരുന്നില്ല. ഫ്ലൂവിന് കാരണമാകുന്ന വൈറസ് സമാന പ്രതലത്തിൽ പതിനേഴ് ദിവസങ്ങളാണ് അതിജീവിച്ചതെന്നും താരതമ്യ പഠനത്തിൽ വ്യക്തമായി. ഓസ്‌ട്രേലിയയുടെ സയൻസ് ഏജൻസിയായ സി എസ് ഐ ആർ ഓ ആണ് പരീക്ഷണം നടത്തിയത്. കൊറോണ വൈറസിനെ ഇരുട്ടിൽ 68 ഡിഗ്രി ഊഷ്മാവിലാണ് പരീക്ഷണവിധേയമാക്കിയത്. സൂര്യപ്രകാശത്തിൽ നിന്നുള്ള അൾട്രാ വയലറ്റ് രശ്മികൾ വൈറസിനെ നിർവീര്യമാക്കുമെന്ന് ചില പഠനങ്ങളിൽ കണ്ടതുകൊണ്ടാണ് പരീക്ഷണം ഇരുട്ടിൽ നടത്തിയത്.