കൊട്ടാരക്കര: എംസി റോഡില് മൂന്നു വാഹനങ്ങള് കൂട്ടിയിടിച്ച് തീപിടിച്ചു. കൊട്ടാരക്കര ലോവര് കരിക്കത്ത് കഴിഞ്ഞ ദിവസം രാത്രിയായിരുന്നു അപകടമുണ്ടായത്. അപകടത്തില് മൂന്ന് പേര്ക്ക് പരിക്കേറ്റു. ഇതില് രണ്ടു പേരുടെ നില ഗുരുതരമാണ്.
കൊട്ടാരക്കര ഭാഗത്ത് നിന്നും തിരുവനന്തപുരം ഭാഗത്തേക്ക് പോയ പിക്കപ്പ് വാനും അതേദിശയില് സഞ്ചരിച്ച കാറും എതിര്ദിശയിലെത്തിയ ഓട്ടോറിക്ഷയുമായാണ് കൂട്ടിയിടിച്ചത്. പിക്കപ്പ് കാറുമായി ഇടിച്ചശേഷം നിയന്ത്രണം വിട്ട് ഓട്ടോയിലേക്ക് ഇടിച്ച് കയറുകയായിരുന്നു. ഇടിയുടെ ആഘാതത്തില് തീപിടിച്ച ഓട്ടോറിക്ഷ പൂര്ണമായും കത്തിനശിച്ചു. കൊട്ടാരക്കര, പത്തനാപുരം എന്നിവടങ്ങളില് നിന്നുമെത്തിയ നാല് യൂണിറ്റ് ഫയര്ഫോഴ്സുകളാണ് തീനിയന്ത്രണ വിധേയമാക്കിയത്.
ഓട്ടോ ഡ്രൈവര് സാജന് ഫിലിപ്പ്, കാര് ഓടിച്ചിരുന്ന ടോണി എന്നിവരെ ഗുരുതര പരിക്കുകളോടെ തിരുവനന്തപുരം മെഡിക്കല് കോളജ് ആശുപത്രിയിലും പിക്കപ്പിന്റെ ഡ്രൈവര് തമിഴ്നാട് സ്വദേശി രാജേഷിനെ കൊട്ടാരക്കര താലൂക്ക് ആശുപത്രിയിലും പ്രവേശിപ്പിച്ചു. അപകടത്തെ തുടര്ന്ന് എംസി റോഡില് മണിക്കൂറുകളോളം ഗതാഗതം തടസ്സപ്പെട്ടു.