ഞാന് എന്റെ ഫേസ്ബുക്ക് പേജില് എന്തെങ്കിലും രാഷ്ട്രീയം എഴുതിയാല് ഉടന് തന്നെ ഒരു യുവസുഹൃത്ത് വന്ന് കമന്റ് ബോക്സില് ചോദിക്കും; രാഹുലിന് ഗാന്ധിയെന്ന പേരുപയോഗിക്കാന് എന്ത് അവകാശമാണെന്ന്. ഞാനെന്ത് പറയാനാണ്. എനിക്ക് യാതൊരു ഉത്തരവാദിത്തവും ഇല്ലാത്ത കാര്യം.
ഗാന്ധിഎന്ന പേര് രാഹുല് ഉപയോഗിക്കുന്നതില് അദ്ദേഹത്തിന് വലിയ എതിര്പ്പാണ്. നാട്ടിലെ ഏറ്റവും വലിയ പ്രശ്നം അതാണിപ്പോള്. പാകിസ്ഥാന് പ്രശ്നം അല്പം ഒന്ന് കെട്ടടങ്ങിയപ്പോള്. 'ഞങ്ങടെ സര്ക്കാര് വീണ്ടും വന്നാല് രാഹുലിന്റെ പേരിലെ ഗാന്ധി മാറ്റിയില്ലെങ്കില് എന്റെ പേര് മാറ്റിക്കോ' എന്നൊക്കെ അദ്ദേഹം വെല്ലുവിളിച്ചേക്കും, ഉടനെ തന്നെ
ഇനി എന്റെ പേടിയുടെ കാര്യം. അത് വീട്ടുകാര്യമാണ്. നാട്ടിലെ എന്റെ ബന്ധുക്കള് ആരെങ്കിലും ആക്രമിക്കപ്പെടുമോ എന്നൊരു ഭയം. ഞാന് അദ്ദേഹത്തോട് ഒരു അഭ്യര്ത്ഥന നടത്തിയിരിക്കുകയാണ്. അവരെ ആക്രമിക്കരുതെന്ന്. ഫേസ്ബുക്കില് തപ്പിയാല് അവരുടെ പേരുകള് എന്റെ സുഹൃത്തിന് പ്രശ്നമാകും. അതാണ് പേടി.
ചിറയിന്കീഴുള്ള എന്റെ ഒരു ചിറ്റപ്പന്റെ പേര് സുഭാഷ് ചന്ദ്ര ബോസ് എന്നാണ്. അദ്ദേഹത്തിന്റെ അച്ഛന്, എന്റെ അന്തരിച്ച മുത്തച്ഛന്, വിശ്വംഭരന് ആണ്. അല്ലാതെ ബോസ് അല്ല. എനിക്ക് ഉറപ്പാണ്. മറ്റൊരു ബന്ധു ജവഹര് ആണ്. അദ്ദേഹത്തിന്റെ സഹോദരങ്ങളില് ഒരാള് മോഹന്ദാസും മറ്റൊരാള് കാള് മാര്ക്സും ആണ്. അവരും ചിറയിന്കീഴുകാര് തന്നെ.
കോളേജില് പഠിച്ചിരുന്നപ്പോള് വര്ക്കലക്കാരന് ഒരു കെ.എസ്.യു. സുഹൃത്തിന്റെ പേര് മോഹന്ദാസ് ഗാന്ധി എന്നായിരുന്നു. കോണ്ഗ്രസുകാരനായ അദ്ദേഹത്തിന്റെ പിതാവിന്റെ പേര് കേശവന് നായര് എന്നോ മറ്റോ ആയിരുന്നു. സാത്വികനായ ഒരു നായര്ക്ക് ജനിച്ച ഗാന്ധി. ആ സുഹൃത്തിന്റെ ഭാര്യ ഗിരിജ ഗാന്ധിയോ മറ്റോ ആണ്. മക്കളും ഗാന്ധിമാര്.
ഈ പാവപ്പെട്ട മനുഷ്യരൊക്കെ ജനിച്ചപ്പോള് എന്റെ സുഹൃത്തിന്റെ പാര്ട്ടി ജനിച്ചിട്ടില്ലാതിരുന്നത് എന്തൊരു ഭാഗ്യം. അവര്ക്ക് ഈ നല്ല പേരൊക്കെ അങ്ങനെ ലഭിച്ചു. ഇന്നായിരുന്നെങ്കിലോ? ഇഷ്ടമുള്ള ഭക്ഷണം കഴിക്കാന് പറ്റാത്തതുപോലെ ഇഷ്ടമുള്ള പേരും ഇടാന് പറ്റാതായേനെ.
എന്റെ സുഹൃത്തിനോട് എന്റെ വിനീതമായ അഭ്യര്ത്ഥന ഇതാണ്. ഈ പേരുകള് ഉള്ളതുകൊണ്ട് മേല്പറഞ്ഞവരെയൊന്നും വെടിവച്ചിടരുത്. അവരെല്ലാം നല്ല മനുഷ്യരാണ്. തീര്ത്തും നല്ല മനുഷ്യര്.
വാലറ്റം: ചിലരൊക്കെ ഗാന്ധിയുടെ പേരെങ്കിലും സംരക്ഷിക്കാന് ശ്രമിക്കുന്നത് കാണുമ്പോള് സന്തോഷം കൊണ്ട് ഇരിക്കാന് വയ്യ. 48-ലെ വെടിയുണ്ടയുടെ മണം ഇപ്പോഴും അന്തരീക്ഷത്തില് തങ്ങി നില്ക്കുന്നുണ്ട്. നമ്മളെയൊക്കെ വേദനിപ്പിച്ചുകൊണ്ട്.