കേരളത്തിലെ പ്രളയ ബാധിതര്ക്കായി ധനസമാഹാരം നടത്തുന്നതിന് ലോകം മുഴുവനുമുള്ള മലയാളി സംഘടനകള് നെട്ടോട്ടമോടുമ്പോള് എവിടെപ്പോയി നമ്മുടെ മത നേതാക്കന്മാര്? പ്രളയബാധിതര്ക്കു വേണ്ടി പ്രാത്ഥിക്കണമെന്ന അഭ്യര്ത്ഥനകളല്ലാതെ നാട്ടിലെ നമ്മുടെ സഹോദരങ്ങള്ക്കു ഒരു കൈത്താങ്ങു നല്കുവാന് ഒരു മതപുരോഹിതരും ആഹ്വാനം ചെയ്തതായി കേട്ടില്ല. പ്രാത്ഥിക്കുന്നതു നല്ലതാണ്. ഒപ്പം അവര്ക്കു സ്വാന്ത്വനമേകാന്, നഷ്ടപ്പെട്ടതെല്ലാം വീണ്ടെടുക്കാന്, പഴയ പ്രതാപത്തോടെ തന്നെ ദൈവത്തിന്റെ സ്വന്തം നാടിനെ പുനര് നിര്മ്മിക്കാന് ദൈവത്തിന്റെ പ്രതി പുരുഷരെ നിങ്ങള് എവിടെ പോയി?
ഞാന് ഒരു തികഞ്ഞ ദൈവ വിശ്വാസിയും പ്രാത്ഥനയില് വിശ്വസിക്കുന്ന വ്യക്തിയുമാണ്. സര്വോപരി സഭയിലും സഭയുടെ നേതൃത്വത്തിലും അടിയുറച്ചു വിശ്വസിക്കുന്ന വ്യക്തികൂടിയാണ്. ഇതൊരു കുറ്റപ്പെടുത്താലോ വിമര്ശനമോ ആയി കാണേണ്ടതുമില്ല. മറിച്ചു ഒരു സ്വയം വിമര്ശനമായി കാണുക.
കഴിഞ്ഞ ഏതാനും ആഴ്ചകളായി കേരളത്തിലെ നമ്മുടെ സഹോദരങ്ങള് പ്രളയക്കെടുതിയുടെ ദുരിതക്കയത്തിലാണെന്ന് എല്ലാവര്ക്കും അറിയാം. ഞാന് ഉള്പ്പെടുന്ന കത്തോലിക്ക സഭ കേരളത്തിലെ പ്രളയത്തില് ജീവന് പൊലിഞ്ഞ ആത്മാക്കള്ക്കു വേണ്ടിയും ദുരിതമനുഭവിക്കുന്നവര്ക്കു വേണ്ടിയും വെള്ളിയാഴ്ച ഉപവസിച്ചു പ്രാര്ത്ഥിക്കാന് ആഹ്വാനം ചെയ്തിരുന്നു. അതല്ലാതെ ഞായറാഴ്ച്ച പള്ളികളില് നേര്ച്ച പിരിവുകള് ഉദാരമായി നല്കി അവ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കാനുള്ള ആഹ്വാനമൊന്നും കേട്ടില്ല. ഇനിയത് ഞായറാഴ്ചത്തെ അറിയിപ്പിനൊപ്പം വായിക്കാന് ഇരിക്കുകയാണോ എന്നിറിയില്ല.
പ്രാര്ത്ഥന നല്ലതാണ്. പക്ഷേ, അത് മാത്രം മതിയോ? കേരളത്തിലെ എല്ലാ മതവിശ്വാസത്തില്പ്പെട്ട ആളുകളും പ്രളയ ദുരിതത്തില്പ്പെട്ടിട്ടുണ്ട്. ഇവര്ക്കൊക്കെ മുഖം നോക്കാതെയാണ് വിവിധ ക്രിസ്തീയ മത നേതൃത്വവും മറ്റു മത നേതൃത്വവും സഹായവും അഭയവും നല്കിവരുന്നത്. നിരവധി പള്ളികള് ജാതി മതവ്യത്യാസമില്ലാതെ ആളുകള്ക്ക് അഭയകേന്ദ്രം നല്കിയപ്പോള് കുട്ടനാട്ടിലെ ചില യുവ വൈദികരുടെ നേതൃത്വത്തിലാണ് ആദ്യത്തെ രക്ഷാപ്രവര്ത്തങ്ങളും ഭക്ഷ്യ-വസ്ത്ര വിതരണങ്ങളും ആരംഭിച്ചത്.
എന്നിട്ടും എന്തേ അമേരിക്കയിലെ പള്ളികളും അമ്പലങ്ങളുമൊന്നും പ്രളയ ദുരിതാശ്വാസ നിധിയിലേക്ക് ധനസമാഹാരണം വേണ്ട പോലെ നടത്തുന്നില്ല? ഇതിനിത്ര കൂടിയാലോചനകളോ അനുമതികളോ വേണോ? സഹായം ഉടനടിയാണ് വേണ്ടത്. കാത്തിരിക്കാന് നേരമില്ല.
അമേരിക്കയിലെ ക്രൈസ്തയ മത മേലധ്യക്ഷന്മാരോട് ഒരപേക്ഷയുണ്ട്. എല്ലാ ഞായറാഴ്ച്ചകളിലും എല്ലാ പള്ളികളിലും നേര്ച്ച പണം സ്വീകരിക്കാറുണ്ട്. കത്തോലിക്ക ദേവാലയങ്ങളില് ചില ഞായറാഴ്ചകളില് സെക്കന്ഡ് കളക്ഷന് എന്ന പേരില് ഒരു പിരിവ് കൂടി നടത്താറുണ്ട്. ഈ പിരിവുകള് സാധാരണ മറ്റു ആവശ്യങ്ങള്ക്കാണ് ഉപയോഗിക്കാറുള്ളത്. പള്ളികളുടെ ആവശ്യത്തിന് എല്ലാ ആഴ്ചകളിലും പിരിവെടുക്കുന്നതാണല്ലോ. എന്നാല് അടുത്ത ആഴ്ചത്തെയോ അതിനടുത്തയാഴ്ചത്തെയോ പിരിവ് മുഴുവനും കേരളത്തിലെ ദുരിതമനുഭവിക്കുന്നവരെ സഹായിക്കാന് മുഖ്യമന്ത്രിയുടെ ദുരിതാശ്വാസനിധിയിലേക്ക് നല്കാന് ഒരു തീരുമാനമെടുക്കാമോ? ഒരു കാര്യം ഉറപ്പിച്ചു പറയാം അത്തരമൊരു തീരുമാനം മുന്കൂട്ടി അറിയിച്ചാല് ആ ഞാറാഴ്ചത്തെ നേര്ച്ചപ്പെട്ടി നിറഞ്ഞു കവിയും എന്ന കാര്യത്തില് സംശയം വേണ്ട.
ഞായറാഴ്ചകളില് ഭക്ഷണം പല പള്ളികളില് നല്കാറുണ്ട്. അതില് നല്ലൊരു ഭാഗം 'വെയ്സ്റ്റ്' ആകാറുമുണ്ട്. ഒരു ഞായറാഴ്ചത്തെ ഭക്ഷണം വേണ്ടെന്നു വച്ചാലുംഒരു സംഖ്യ ലഭിക്കും
കൊടുക്കുമ്പോഴല്ലേ ഇരട്ടിയായി തിരിച്ചു കിട്ടുന്നത്. പള്ളികള്ക്കു നേര്ച്ച പിരിവുകള് ഇനിയും വരും. കേരളത്തിലെ പ്രളയ ദുരിതമനുഭവിക്കുന്നവരെ സഹായിക്കാനുള്ള അവസരം ഇപ്പോള് മാത്രമാണ്. കണ്ണുള്ളവര് കാണട്ടെ . കാതുള്ളവര് കേള്ക്കട്ടെ എന്നാണല്ലോ വചനം പഠിപ്പിക്കുന്നത്. ഇക്കാര്യത്തില് മതനേതാക്കന്മരുടെ ആഹ്വാനം ഒരു വിശ്വാസിയും തിരസ്കരിക്കില്ലെന്നു ഉറപ്പാണ്.
ചിക്കാഗോയില് രണ്ടു യുവാക്കള് ചേര്ന്ന് ആരംഭിച്ച ധനസമാഹാരണം ഈ റിപ്പോര്ട്ട് തയാറാക്കുമ്പോള് എട്ടു ലക്ഷം ഡോളറിനടുത്തു. അതിനിയും മുന്നേറുകയാണ്,. അവര്ക്കു പിന്തുണയായി ഉണ്ടായിരുന്നത് ക്നാനായ കാത്തലിക്ക് യുവജന വേദി ഓഫ് ചിക്കാഗോ എന്ന മത സമുദായ സംഘടനയാണ്. അങ്ങനെയെങ്കില് എന്തുകൊണ്ട് അമേരിക്കയിലെ മറ്റു മത-സാമുദായിക സംഘടനകളും മുന്നോട്ടു വരുന്നില്ല?
ഇതൊരാഭ്യര്ത്ഥനയാണ്. ഉണര്ന്ന് പ്രവ്യത്തിക്കാന് സമയം ഇനിയുമുണ്ട്. നമുക്ക് കൈകോര്ക്കാം. ജന്മനാടിന്റെ പുനര്നിര്മാണത്തി;ല് പങ്കാളികളാകാം. അതിനായി കേരളത്തിലെ നമ്മുടെ സഹോദരങ്ങള്ക്കു ഇപ്പോള് വേണ്ടത് പണം മാത്രമാണ്. നമുക്കൊത്തു ചേര്ന്നുകൊണ്ട് നമ്മുടെ സഹോദരങ്ങള്ക്ക് കൈത്താങ്ങാകാം.
രണ്ട് യുവാക്കള് ഒത്തു ചേര്ന്നപ്പോള് ഏഴു കോടി രൂപയോളം സമാഹരിക്കാനായെങ്കില് മത സംഘടനകള് വിചാരിച്ചാല് എത്ര കോടി സമാഹരിക്കാനാവും?
മത നേതാക്കള് എന്നും ചൂഷകര് ആയിരുന്നു, ചൂഷകരുടെ ചാരിറ്റി; കൈയും കാലും തുമ്പികൈയും ഉള്ള ചിലന്തി അമ്പലം അല്ലേ?.
അഹം ബ്രംമ്മം അല്ലേ, നിന്നിലെ നീ അല്ലേ മറ്റുള്ളവനും. നിനക്ക് നീ എന്ത് ചെയ്യുമോ അതുപോലെ നീ മറ്റുള്ളവര്ക്കും ചെയ്യുക. അത് തന്നെ അല്ലേ സഞ്ചരിക്കുന്ന ഗുരുക്കള് തന് സുവിശേഷം. നീ, നിന്റെ അയല്ക്കാരന് നഷ്ടപെട്ട വീടും കുടിലും ആഹാരവും ഉടുതുണിയും കൊടുക്കുക. നിന്നിലെ സ്നേഹംനിറഞ്ഞ മനോഭാവം മത നേതാക്കള് ചൂഷണംചെയ്യാന് നീ അനുവദിക്കരുതേ.