വി.എസ്. ശിവകുമാര്
ആരോഗ്യ കുടുംബക്ഷേമ ആയുഷ് വകുപ്പ്
മന്ത്രി
ആഗോള മാനവരാശി നേരിടുന്ന ഏറ്റവും മാരകമായ
രോഗങ്ങളിലൊന്നാണ് കാന്സര്. ഇതിന്റെ വ്യാപനം അനുദിനം
വര്ധിക്കുകയാണ്. സംസ്ഥാനത്ത് ഒന്നര ലക്ഷത്തോളം കാന്സര്
രോഗികളുണ്ടെന്നാണ് കണക്കാക്കപ്പെടുന്നത്. അമ്പത്തിഅയ്യായിരത്തോളം
കാന്സര് രോഗികള് ഓരോ വര്ഷവും പുതുതായി രജിസ്റ്റര് ചെയ്യുന്നു.
ഇവരില് പതിനാറായിരത്തിലധികംപേര് തിരുവനന്തപുരം റീജിയണല്
കാന്സര് സെന്ററിലാണ് ചികിത്സയ്ക്കെത്തുന്നത്. ഈ സാഹചര്യമെല്ലാം
കണക്കിലെടുത്ത്, ബോധവത്ക്കരണം, മുന്കൂര് രോഗനിര്ണ്ണയം, ചികിത്സ,
സാന്ത്വന ചികിത്സ, പഠനഗവേഷണങ്ങള് എന്നീ മേഖലകളിലെല്ലാം
സര്ക്കാര് അതീവജാഗ്രത പുലര്ത്തുന്നുണ്ട്. അതോടൊപ്പംതന്നെ,
കാന്സറിനെതിരേ സമൂഹമൊന്നടങ്കം ഒത്തൊരുമിച്ച് മുന്നേറേണ്ട
സാഹചര്യമാണുള്ളത്.
നമ്മുടെ സംസ്ഥാനത്ത് കാന്സറിനെതിരായ
സര്ക്കാര് സംവിധാനം മുമ്പെങ്ങുമുണ്ടാകാത്തവിധം ശക്തമാണ്. ദേശീയ
ശ്രദ്ധനേടിയ കേരളത്തിന്റെ സുകൃതം പദ്ധതിയിലൂടെ,
ഒട്ടേറെപേര്ക്ക് സൗജന്യ കാന്സര് ചികിത്സ ലഭ്യമാക്കാന് കഴിഞ്ഞു.
ആര്.സി.സി, മലബാര് കാന്സര് സെന്റര്, തിരുവനന്തപുരം, ആലപ്പുഴ,
കോട്ടയം, കോഴിക്കോട് മെഡിക്കല് കോളേജുകള്, എറണാകുളം ജനറല്
ആശുപത്രി എന്നിവിടങ്ങളിലെല്ലാം പദ്ധതിയുടെ ആദ്യഘട്ടത്തില്
സൗജന്യ ചികിത്സ ലഭ്യമാക്കിയിട്ടുണ്ട്. ഈ ഘട്ടത്തില് 35 ലക്ഷം
കുടുംബങ്ങള്ക്ക് ചികിത്സാസഹായം എത്തിക്കുകയാണ്
ലക്ഷ്യം.
കുടുംബശ്രീയുടെ സഹകരണത്തോടെ, സംസ്ഥാനത്ത്
നടപ്പിലാക്കിവരുന്ന “സ്വാസ്ഥ്യം’ എന്ന ബൃഹത്തായ
കര്മ്മപരിപാടിയുടെ രണ്ടാംഘട്ടവും പുരോഗമിക്കുകയാണ്. 41.5 ലക്ഷം
സ്ത്രീകളുടെ പങ്കാളിത്തമുള്ള മഹാപ്രസ്ഥാനമായ കുടുംബശ്രീയും
തിരുവനന്തപുരം ആര്.സി.സിയും സംയുക്തമായാണ്, ഈ ഘട്ടത്തില് കാന്സര്
ബോധവത്ക്കരണ-പ്രതിരോധ-നിയന്ത്രണ പ്രവര്ത്തനങ്ങള്ക്ക്
നടത്തിവരുന്നത്. കാന്സര് രോഗത്തെ തടയുക, രോഗബാധയുണ്ടായാല്
നേരത്തേ കണ്ടുപിടിച്ച് ചികിത്സിക്കുക. രോഗവിമുക്തി
നേടാനാവാത്തവര്ക്ക് സാന്ത്വനചികിത്സയിലൂടെ ശിഷ്ടജീവിതം
വേദനാരഹിതമാക്കുക എന്നീ കാര്യങ്ങളിലെല്ലാം കുടുംബശ്രീയുടെ
സന്നദ്ധപ്രവര്ത്തകര്ക്ക് അതുല്യമായ സേവനം ലഭ്യമാക്കുവാനാകും.
ആര്.സി.സി, തലശ്ശേരി മലബാര് കാന്സര് സെന്റര്, അഞ്ച്
ഗവണ്മെന്റ് മെഡിക്കല് കോളേജുകള്, എറണാകുളം ജനറല് ആശുപത്രി
എന്നിവിടങ്ങളിലെല്ലാം കാന്സര് ചികിത്സാ സൗകര്യം ലഭ്യമാണ്. മറ്റ്
ജില്ലകളിലെ രോഗികള്ക്കും ഇവയെ ആശ്രയിക്കേണ്ട സാഹചര്യമാണ്
മുമ്പുണ്ടായിരുന്നത്. ആരോഗ്യവകുപ്പ് 2013 ല് ആരംഭിച്ച ജില്ലാ
കാന്സര് കെയര് പദ്ധതിയിലൂടെ അതിന് പരിഹാരം കാണുവാന്
സാധിച്ചിട്ടുണ്ട്. ഇപ്പോള് എല്ലാ ജില്ലകളിലും കാന്സര് ചികിത്സാ
സൗകര്യം ലഭ്യമാണ്. പ്രധാനപ്പെട്ട ആശുപത്രികള് തിരഞ്ഞെടുത്ത്
അടിസ്ഥാന സൗകര്യങ്ങള് വികസിപ്പിക്കുകയും അവശ്യ സാമഗ്രികള്
സജ്ജീകരിക്കുകയും ചെയ്തിട്ടുണ്ട്. കാന്സര് രോഗവിദഗ്ദ്ധരുടെ
ദൗര്ലഭ്യം കണക്കിലെടുത്ത്, അസിസ്റ്റന്റ് സര്ജന്മാര്ക്കും
നഴ്സുമാര്ക്കും വിദഗ്ദ്ധ പരിശീലനം നല്കിയിട്ടുമുണ്ട്.
സംസ്ഥാനത്ത് ഗുഡ്ക്കയും പാന്മസാലയും നിരോധിച്ചത് കാന്സര്
നിയന്ത്രണപ്രവര്ത്തനങ്ങള്ക്ക് ഏറെ സഹായകമായിട്ടുണ്ട്.
കഴിഞ്ഞവര്ഷം, ലോക കാന്സര് ദിനത്തില് സംസ്ഥാനത്താരംഭിച്ച
കേരള കാമ്പയിന് എഗന്സ്റ്റ് കാന്സര് എന്ന ബൃഹത്തായ കാന്സര്
ബോധനനിയന്ത്രണ ചികിത്സാപദ്ധതി വിജയകരമായി പുരോഗമിക്കുകയാണ്.
തദ്ദേശസ്വയംഭരണ സ്ഥാപനങ്ങളുടെയും, ആര്.സി.സിയുടെയും, ദേശീയ
ഗ്രാമീണ ആരോഗ്യ ദൗത്യത്തിന്റെയും സഹകരണത്തോടെയാണ് ഈ പദ്ധതി
നടപ്പിലാക്കിവരുന്നത്. പത്തനംതിട്ട, ആലപ്പുഴ, ഇടുക്കി, തൃശ്ശൂര്
ജില്ലകളിലാണ് പദ്ധതി പുരോഗമിക്കുന്നത്. കേരളത്തിലെ സ്ത്രീകളില്
കൂടുതലായി കണ്ടുവരുന്നത് ബ്രസ്റ്റ് കാന്സറും ഗര്ഭാശയ
കാന്സറുമാണ്. വായിലെ കാന്സറാണ് പുരുഷന്മാരില് കൂടുതല്. ഇവ
തുടക്കത്തിലേ കണ്ടുപിടിച്ചാല് 90 ശതമാനത്തോളം പൂര്ണ്ണമായും
ചികിത്സിച്ചു മാറ്റാവുന്നതാണ്. അത് ലളിതവും ചെലവുകുറഞ്ഞതുമാണ്.
ഇതിനാണ് ഈ ബൃഹത് പദ്ധതി ഊന്നല് നല്കുന്നത്. ആദ്യഘട്ടത്തില് ഏഴ്
ലക്ഷംപേര്ക്ക് സഹായമെത്തിക്കുകയാണ് ലക്ഷ്യം.