നര്മ്മം നല്ലതാണ്. വേണ്ടിടത്ത് വേണ്ടതുപോലെ പ്രയോഗിക്കണമെന്ന് മാത്രം.
അവാര്ഡുകള് നിര്ണ്ണയിക്കുന്നതിന് അവാര്ഡു ജൂറികള് കണ്ടെത്തുന്ന മാനദണ്ഡത്തെ നര്മ്മ രചനയിലൂടെ ഒരു പ്രവാസി മലയാളി സാഹിത്യകാരന് അപലപിച്ച് കണ്ടു. അദ്ദേഹം, സ്ത്രീകള്ക്ക് അവാര്ഡ് നല്കുന്ന ജീവികളെ കേവലം സ്ത്രീലമ്പടന്മാരായി ചിത്രീകരിച്ചിരുന്നു.. സ്ത്രീകളുടെ സാരിയും ചുരിദാറും മെയ്യഴക് പ്രദര്ശിപ്പിക്കുന്ന ആകര്ഷണീയമായ ഫോട്ടോകളും ജൂറികളെ സ്വാധിച്ച് അവര്ക്ക് അവാര്ഡുകള് നല്കാന് പ്രലോഭിപ്പിക്കുന്നുപോലും! സൗന്ദര്യ മത്സരത്തിനെ കുറിച്ചായിരുന്നു പരാമര്ശമെങ്കില് വേണ്ടില്ലായിരുന്നു. സാഹിത്യ മത്സരത്തില് ഇതൊക്കെയാണ് മാനദണ്ഡമെന്ന, നര്മ്മമാണെങ്കില് തന്നെയും, പരാമര്ശം ബാലിശയും സ്ത്രീ എഴുത്തുകാരെ ചെളിവാരിയെറിയുന്ന പ്രവര്ത്തിയുമാണ് ഇങ്ങനെയൊക്കെ എഴുതുന്നവര് അവരുടെ അപകര്ഷതാബോധവും ഉള്ളില് തളം കെട്ടികിടക്കുന്ന അസൂയയുടെ വിഷവും കടലാസില് ഛര്ദ്ദിക്കുകയല്ലേ ചെയ്യുന്നത്?
അമേരിക്കയുടെ പല സംസ്ഥാനങ്ങളിലും മലയാള സാഹിത്യസംഘടനകളുണ്ട്. അതിലെ അംഗങ്ങള് കൂടിയിരുന്ന് ചര്ച്ചകള് നടത്താറുണ്ട്. മലയാള ഭാഷാ സാഹിത്യവുമായി ബന്ധപ്പെട്ട പ്രശ്നങ്ങള് ഉള്കൊണ്ട നിരീക്ഷണങ്ങള് വായിച്ച് അവതരിപ്പിക്കാറുണ്ട്. പക്ഷേ ഇത്തരം സംരംഭങ്ങളില് പങ്കെടുക്കാന് സമയവും സൗകര്യവും കിട്ടാത്തവര് സാഹിത്യകാരല്ലെന്ന വിലയിരുത്തല് തെറ്റാണ്. അവര് അവാര്ഡുകള്ക്ക് അര്ഹരല്ലെന്ന് വിധിയെഴുതുന്നത് ഭോഷത്തരവും.
കേരളത്തിലെ പ്രഗത്ഭരായ സാഹിത്യ ഭീഷ്മാചാര്യരായ എം.ടി.യും, മുരുകനും, വിജയനും മൊക്കെ അവരുടെ രചനകളില് കൂടി അംഗീകാരവും അഭിനന്ദനവും പിടിച്ച് പറ്റുന്നവരാണ്. അവര് സംഘടനകള് സൃഷ്ടിക്കുന്നില്ല. കൂട്ടായിരുന്ന് ചര്ച്ച ചെയ്യാറില്ല. കടലാസില് കൂടി അഭിപ്രായ പ്രകടനം നടത്താറില്ല. എന്നിട്ട് അവാര്ഡുകളുടെ പ്രവാഹം അവരെ ശ്വാസംമുട്ടിക്കുന്നില്ലേ?
അമേരിക്കയിലെ സാഹിത്യരചനകള്ക്ക് അവാര്ഡുകള് നിര്ണ്ണയിക്കുന്ന ജൂറികള്, സ്ത്രീകയ്ക്കായാലും, പുരുഷനായാലും, അവരുടെ സൃഷ്ടികളുടെ മികവും മേന്മയും കണക്കിലെടുത്തുകൊണ്ടാണ് അവാര്ഡുകള് നല്കുന്നത്. സ്ത്രീകളെ പരിഗണിക്കുമ്പോള് അവര് ധരിച്ചിരിക്കുന്ന സാരിയും ചുരിദാറും അവരുടെ ഫോട്ടോയിലെ ആകര്ഷണീയമായ മെയ്യഴകും ജൂറികളെ സ്വാധീനിക്കാറില്ല.
വിമര്ശനം സ്വാഗതാര്ഹമാണ്. ആരോഗ്യകരവും ആക്ഷേപരഹിതവുമായിരിക്കണമെന്ന് മാത്രം. ആക്ഷേപിക്കാന് മാത്രം കരുതികൂട്ടി കച്ചകെട്ടിയിറങ്ങുന്നവരെ സമൂഹം പുച്ഛിച്ച് തള്ളും തീര്ച്ച ചരിത്രം അതാണ് തെളിയിക്കുന്നത്.
Ratish