'മുലായം ദൈവ'ത്തെ ആരാധിക്കാന്‍ മുലായത്തിന്റെ പേരില്‍ അമ്പലം പണിയുന്നു.

അമ്പലത്തിന്റെ തറക്കല്ലിടല്‍ കഴിഞ്ഞ നവംബര്‍ 22-നു അതീവരഹസ്യമായ് നടത്തി. അദ്ദേഹത്തിന്റെ കുടുംബാംഗങ്ങളും വിശ്വസ്തരായ ചുരുക്കം ചില പാര്‍ട്ടി അണികളും മാത്രമേ ചടങ്ങില്‍ പങ്കെടുത്തിരുന്നുള്ളൂ. മനപ്പൂര്‍വം മാധ്യമങ്ങളെ ഒഴിവാക്കുകയായിരുന്നുവെന്നു റിപ്പോര്‍ട്ട്‌ ചെയ്യപ്പെടുന്നു. മാധ്യമപ്രവര്‍ത്തകര്‍ ഈ വാര്‍ത്തയെക്കുറിച്ചു ചോദിച്ചിട്ട് അദ്ദേഹമോ അദ്ദേഹത്തിന്‍റെ മകന്‍ അഖിലേഷ് യാദവോ വ്യക്തമായ മറുപടി നല്‍കാതെ ഒഴിഞ്ഞു മാറുകയാണുണ്ടായത് . പാര്‍ട്ടി സെക്രട്ടറിയും സമാജ്‌വാദി പാര്‍ട്ടിയുടെ അലിഗഡില്‍ നിന്നുള്ള നേതാവുമായ രാജേഷ് സൈനിയ്ക്കാണ് നിര്‍മ്മാണ പ്രവര്‍ത്തനങ്ങളുടെ പ്രധാന ചുമതലകള്‍. 

സമാജ് വാദി പാര്‍ട്ടിയിലെ അലിഗര്‍ ഗ്രൂപ്പ്‌ ഈ അമ്പലനിര്‍മ്മാണത്തിനു എതിരാണ്. ജീവിച്ചിരിക്കുന്ന സമാജ് വാദി പാര്‍ട്ടിയുടെ നേതാവിന്റെ പ്രതിമയും അമ്പലവും നിര്‍മ്മിക്കുന്നത് പാര്‍ട്ടി ചട്ടങ്ങള്‍ക്ക് വിരുദ്ധമാണെന്നാണ് അവരുടെ വാദം. അവരെ കൂടാതെ പാര്‍ട്ടിയിലെ പല പ്രമുഖര്‍ക്കും ഇതിനോട് വൈമുഖ്യം ആണുള്ളത്. പാര്‍ട്ടിയുടെ സംസ്ഥാന നേതാവ് രക്ഷ്പാല്‍ സിംഗിന്റെ പ്രതിഷേധത്തെ തുടര്‍ന്ന് അമ്പല നിര്‍മ്മാണം ഏതാണ്ടിപ്പോള്‍ നിര്‍ത്തിവെച്ച നിലയിലാണ്. എന്നിരുന്നാലും സമാജ് വാദി പാര്‍ട്ടിയുടെ ഭരണ വാര്‍ഷിക ദിനത്തിനു മുന്‍പേ അമ്പലത്തിന്റെ നിര്‍മ്മാണം പൂര്‍ത്തീകരിക്കുമെന്നാണ് സൈനി പറയുന്നത്.