Image

ഞാനൊരു നിലാവിന്റെ പക്ഷിയാണ് (കവിത: രമ പിഷാരടി)

രമ പിഷാരടി Published on 03 March, 2021
 ഞാനൊരു  നിലാവിന്റെ പക്ഷിയാണ് (കവിത: രമ പിഷാരടി)
എന്റെ കൈയിലുള്ളത് വാക്കിന്റെ

നിലാപ്പക്ഷിയെങ്കിലുമിടയ്ക്കിടെ-

വരാറുണ്ടമാവാസി.

ഇരുളിന്‍ ദുര്‍ഭൂതങ്ങളിടയ്ക്ക്

തേരും തെളിച്ചിടവിട്ടിടവിട്ട്

വരുമ്പോള്‍ മൗനത്തിന്റെ

ഗുഹയില്‍ ഒളിയ്ക്കുവാന്‍

ഞാനോടിപ്പോകും മുന്‍പേ!

വിളിയ്ക്കും പിന്നില്‍ നിന്ന്

കവിത, സമുദ്രത്തിന്‍ തിരയെ-

ഞങ്ങള്‍ മെല്ലെ കടന്നു പോകാറുണ്ട്

കനലിന്‍ സൂര്യന്‍ താഴും സാന്ധ്യ-

വാനത്തില്‍ നിന്നുമൊരു

നക്ഷത്രം തൂക്ക് വിളക്ക്

 കൊളുത്തിത്തരും മുന്നില്‍

എങ്കിലും എന്നും വീണ്ടും

ഭ്രാന്തസങ്കടങ്ങള്‍ തന്‍ വന്‍കയ-

മതില്‍പ്പെട്ട് വലയാറുണ്ടേയിന്നും.

ധ്യാനമൗനത്തില്‍ നിന്നുമൊരു

പാതിയില്‍ ഞാനീ പ്രാണനെ-

ശ്രമപ്പെട്ട് ചിറകില്‍ കൊരുക്കവെ!

ഇടയാറുണ്ടാപ്പക്ഷി കൂട്ടില്‍ -

നിന്നിറങ്ങുവാന്‍ മടി കാണിയ്ക്കും-

മിഴിപൂട്ടിയങ്ങിരുന്നിടും.

എത്രമേലായാസാമാണിതേ-

പോലെഴുത്തിന്റെ സ്‌നിഗ്ദ്ധമാം

ധ്യാനസ്ഥലവാസമെന്നാകില്‍ പോലും

അറിയാതെയറിയാതെ വാക്കുകള്‍

മുന്നില്‍ വന്ന് വിളിയ്ക്കും നേരം

പോകാതിരിക്കാനാവുന്നില്ല..

ഞാനതേ, നിലാപ്പക്ഷി പോലൊരു

ശരറാന്തല്‍ദീപവും കൊളുത്തിപ്പോം

ആകാശസഞ്ചാരിണി!

മേഘങ്ങള്‍ മുടിത്തുമ്പില്‍, കണ്ണിലോ

സ്വപ്നക്കൂട്, ഭൂമിയോ ഞാന്‍

തൂവുന്ന കണ്ണിരു കൈയേറ്റുന്നോള്‍

 ഞാനൊരു  നിലാവിന്റെ പക്ഷിയാണ് (കവിത: രമ പിഷാരടി)
Join WhatsApp News
രാജു തോമസ് 2021-03-03 20:04:07
കവിത നന്നായിട്ടുണ്ട് , പതിവുപോലെ. എങ്കിലും, അതെല്ലാം കേകയായിത്തന്നെ മര്യാദയ്ക്ക് എഴുതിയിരുന്നെങ്കിലെന്ന്! പുതിയ ഓരോ എഴുത്തുരീതി! ഇവിടെ ഇങ്ങനെ എഴുതിയതുകൊണ്ട് പ്രത്യേകിച്ച് ഗുണമെന്തുണ്ടായി? ഛന്ദോമുക്തമാണെന്നു ധരിച്ചോട്ടെ എന്നാകും!
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക