കൂരിരുട്ടിനെ വെല്ലും നനുത്ത വെളിച്ചം (കവിത: സന്ധ്യ എം)

kazhchapadu 17-Jan-2021

കൂരിരുട്ടിൽ വെളിച്ചം
വന്നു പതിക്കും
എത്ര കനത്ത കൂരിരുട്ടിനെയും
കീറിമുറിക്കാനായി കൊണ്ട്

അതൊരു പ്രകൃതി
പ്രതിഭാസമല്ലോ

ഇരുണ്ട ആകാശത്തിലെ
ചന്ദ്രപ്രഭയേയും താരകളേയും
മേഘത്തിന് തന്റെ
ചിറകിനടിയിൽ പൂർണ്ണമായി
ഒളിപ്പിക്കാൻ കഴിയില്ലല്ലോ

മേഘ പാളികളുടെ
ചിറകിനടിലൂടെ
നേർത്ത നനുത്ത മയമുള്ള
ചന്ദ്രപ്രഭ അരിച്ചിറങ്ങുക
തന്നെ ചെയ്യും മണ്ണിൽ

കണ്ണു മങ്ങികാത്ത
അമ്പിളി പൊൻവെളിച്ചം
മണ്ണിലെ ഇരുട്ടിന്‍
മറനീക്കിടും

പൊള്ളിക്കാത്ത ആ
നിലാവെളിച്ചത്തിനും മണ്ണിലെ
ഇരുൾ മയക്കം നീക്കാനുള്ള
കെൽപ്പ് ഉണ്ട്

ഇരുട്ടാണ് ഭൂലോകത്തിൽ
എറെ എങ്കിലും ആ ഇരുട്ടിനെ
വിഴുങ്ങാൻ ഇത്തിരി വെട്ടത്തിന്
ശക്തിയുണ്ട്

മിന്നാമിന്നി അൽപ്പ പ്രാണി
നിസ്സാരനല്ല ഞൊടിയിടയിൽ
ഒറ്റ മിന്നലിൽ മുന്നിലെ
കല്ലും മുള്ളും തെളിച്ചു തരും

മണ്ണും മനസ്സും
വെളിച്ചം വീഴുന്നതിൽ തുല്യം
പതിക്കുന്ന വെളിച്ചത്തിൽ
തെളിയുന്ന കാഴ്ചകൾ ആശ്ചര്യം
നിറയ്ക്കുന്നതായിരിക്കും

എല്ലാ മനസ്സിലേക്കും
വെളിച്ചം ഓരോ
നിലകളിൽ അന്ധകാരത്തെ
അകറ്റാനായി
അരിച്ചിറങ്ങുന്നുണ്ട്

ആ വെട്ടം തിരിച്ചറിഞ്ഞ്
വഴിതെളിച്ച്
മുന്നോട്ട് ഓരോ മനസ്സും
നീങ്ങിടുന്നതല്ലോ മനുജനു
പ്രാണശക്തി