രണ്ടാം വട്ടവും ഇമ്പീച്ച് ചെയ്യപ്പെട്ടതിനെ തുടര്ന്ന് പുറത്തുവിട്ട വിഡിയോയില് പ്രസിഡന്റ് ഡൊണാള്ഡ് ട്രംപ് ഐക്യത്തിനുള്ള ആഹ്വാനം നടത്തി. ക്യാപിറ്റോള് മന്ദിരത്തില് നടന്ന അക്രമത്തെ ശാസിക്കുകയും ചെയ്തു. വൈറ്റ് ഹൗസിന്റെ പടിയിറങ്ങുന്നതിനുള്ള തയ്യാറെടുപ്പിനിടയിലാണ് ട്രംപ്.
'ക്യാപിറ്റോള് ദുരന്തത്തില് ഞാന് ഞെട്ടിത്തരിച്ചു. കഴിഞ്ഞ ആഴ്ച കണ്ട അക്രമത്തെ നിശിതമായി അപലപിച്ചുകൊണ്ട് കാര്യങ്ങള് വ്യക്തമാക്കാന് ഞാന് ആഗ്രഹിക്കുന്നു. അക്രമത്തിനും നശീകരണത്തിനും നമ്മുടെ രാജ്യത്തും പ്രസ്ഥാനത്തിലും സ്ഥാനമില്ല 'ട്രംപ് പറഞ്ഞു.
ട്രംപ് അനുകൂലികള് നടത്തിയ ആക്രമണത്തില് ഒരു പോലീസ് ഉദ്യോഗസ്ഥന് ഉള്പ്പെടെ അഞ്ചു പേര് മരണപ്പെട്ടിരുന്നു.
'മേക്കിങ് അമേരിക്ക ഗ്രേറ്റ് എഗൈന് (അമേരിക്കയെ വീണ്ടും മഹത്തരമാക്കൂ) എന്നതുകൊണ്ട് നമ്മള് എപ്പോഴും നിയമവാഴ്ചയെ പ്രതിരോധിക്കാനും സ്ത്രീ-പുരുഷന്മാരെ നിയമപരമായി പിന്തുണയ്ക്കാനും രാജ്യത്തിന്റെ പവിത്രമായ പാരമ്പര്യവും മൂല്യവും ഉയര്ത്തിപ്പിടിക്കാനുമാണ് ശ്രമിച്ചിട്ടുള്ളത്. ആള്ക്കൂട്ട അക്രമം ഞാന് വിശ്വസിക്കുന്ന മൂല്യങ്ങള്ക്കും ഞാന് നിലകൊള്ളുന്ന പ്രസ്ഥാനത്തിന്റെ ലക്ഷ്യങ്ങള്ക്കും എതിരാണ്. എന്റെ യഥാര്ത്ഥ അനുയായികള് ഒരിക്കലും രാഷ്ട്രീയ അതിക്രമങ്ങള് പിന്തുണയ്ക്കില്ല. ' ട്രംപ് വ്യക്തമാക്കി.
കലാപത്തിന് പ്രേരിപ്പിച്ചെന്ന കുറ്റം ആരോപിച്ച് ട്രംപിനെ ഇമ്പീച്ച് ചെയ്യാന് ഹൗസ് അംഗങ്ങള് വോട്ട് ചെയ്ത് ഒരുമണിക്കൂര് കഴിയും മുന്പാണ് 5 മിനിറ്റ് ദൈര്ഘ്യമുള്ള വിഡിയോയില് പ്രത്യക്ഷപ്പെട്ട് പ്രസിഡന്റ് ഇക്കാര്യങ്ങള് പങ്കുവച്ചത്. ഇതോടെ ഇരുവട്ടം ഇമ്പീച്ച് ചെയ്യപ്പെടുന്ന ആദ്യ യു എസ് പ്രസിഡന്റ് ആയി ട്രംപ് മാറി. 10 റിപ്പബ്ലിക്കന് പ്രതിനിധികള് തനിക്കെതിരെ വോട്ട് ചെയ്ത ചരിത്രപരമായ നടപടിയെക്കുറിച്ച് വിഡിയോയില് പരാമര്ശമില്ല. വേറൊരു വീഡിയോ കൂടി അദ്ദേഹം ഉടനെ പുറത്തുവിടും എന്നാണ് പ്രതീക്ഷിക്കുന്നത്.
നിയുക്ത പ്രസിഡന്റ് ജോ ബൈഡന് സത്യപ്രതിജ്ഞ ചെയ്യുന്നതിനിടയില് പുതിയ അക്രമഭീഷണി തനിക്ക് ലഭിച്ചിട്ടുണ്ടെന്ന് ട്രംപ് സൂചിപ്പിച്ചു. ഇതിനെത്തുടര്ന്ന് അനുയായികള്ക്ക് പ്രക്ഷോഭങ്ങള്ക്കെതിരെ മുന്നറിയിപ്പ് നല്കിയിട്ടുണ്ടെന്നും അദ്ദേഹം പറഞ്ഞു.
' അക്രമമോ നിയമലംഘനമോ ഏതെങ്കിലും തരത്തിലെ നാശനഷ്ടങ്ങളോ ഉണ്ടാക്കരുത്. എല്ലാവരും നിയമങ്ങള് പാലിക്കുകയും നിയമപാലകരുടെ ഉപദേശങ്ങള് അനുസരിക്കുകയും വേണം.' ഇതാണ് ട്രംപ് നല്കിയ മുന്നറിയിപ്പ്.
' വാഷിംഗ്ടണ്, ഡി സി യില് നഗരത്തിന്റെ സംരക്ഷണത്തിന് ആയിരം നാഷണല് ഗാര്ഡ് അംഗങ്ങളെ ഏര്പ്പെടുത്തും. അധികാരക്കൈമാറ്റം സുരക്ഷിതമായി നടക്കുന്നതിനു വേണ്ടിയാണിത്.' ട്രംപ് വിശദീകരിച്ചു.
50 സ്റ്റേറ്റ് ക്യാപിറ്റോളുകളിലും സായുധ പ്രതിഷേധങ്ങള് പ്രതീക്ഷിക്കുന്നതായുള്ള എഫ് ബി ഐ ബുള്ളറ്റിന് ജനങ്ങള്ക്ക് ജാഗ്രതാനിര്ദേശം നല്കിയിരുന്നു.
' രാജ്യത്തിന്റെ താല്പര്യങ്ങള് കേന്ദ്രീകരിച്ച് മുന്നോട്ട് നീങ്ങണം. അത്ഭുതകരമായ വാക്സിന് എല്ലാവരിലും എത്തിച്ച് മഹാമാരിയെ ഉന്മൂലനം ചെയ്ത് സമ്പദ് വ്യവസ്ഥ പുനര്നിര്മ്മിക്കാനും ദേശീയ സുരക്ഷാ സംരക്ഷിക്കാനും നിയമവാഴ്ച് ഉയര്ത്തിപ്പിടിക്കാനും അണിചേരുക. നമ്മുടെ കുടുംബങ്ങള്ക്കും സമൂഹത്തിനും രാജ്യത്തിനും വേണ്ടി ഐക്യത്തോടെ മുന്നേറാം. ' ട്രംപ് നിര്ദ്ദേശിച്ചു.
ആശയ സ്വാതന്ത്ര്യത്തിനുമേല് കൈകടത്തി സംസാരാരിക്കാനുള്ള അവകാശം നഷ്ടപ്പെടുത്തുന്നെന്ന് ട്വിറ്ററിനെയും ഫേസ്ബുക്കിനെയും കുറിച്ച് ട്രംപ് അഭിപ്രായപ്പെട്ടു.
' സെന്സര് ചെയ്യുക, ക്യാന്സല് ചെയ്യുക, ബ്ളാക്ലിസ്റ്റില് പെടുത്തുക- ഇത് അപകടകരമാണ്.ഇതുപോലുള്ള സന്ദര്ഭങ്ങളില് മനസ്സിലുള്ള കാര്യങ്ങള് അന്യോന്യം പങ്കുവയ്ക്കുകയാണ് വേണ്ടത്. വാ അടപ്പിക്കുകയും നിശ്ശബ്ദരാക്കുകയുമല്ല. സ്വന്തം ഭാഗം എന്താണെന്നും അഭിപ്രായം വിശദീകരിക്കാനുമുള്ള ഇടം എല്ലാവരും കണ്ടുപിടിക്കും. ' ട്രംപ് കൂട്ടിച്ചേര്ത്തു.