ഖുശ്ബുവിന് പിന്നാലെ വിജയശാന്തിയും ബിജെപിയിലേക്ക്

ഹൈദരാബാദ്: ഖുശ്ബുവിന് പിന്നാലെ നടിയായ എം വിജയശാന്തിയും കോണ്‍ഗ്രസ് വിട്ട് ബിജെപിയിലേക്കെന്നാണ് പുറത്തുവരുന്ന റിപ്പോര്‍ട്ടുകള്‍. മുന്‍ എംപിയായ വിജയശാന്തി കോണ്‍ഗ്രസ് വിട്ട് ബിജെപിയിലേക്ക് പോകുമെന്ന് മുതിര്‍ന്ന കോണ്‍ഗ്രസ് നേതാവിനെ ഉദ്ധരിച്ച്‌ ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തു. നേരത്തെ ബിജെപി നേതാവായിരുന്നു വിജയശാന്തി. 

വിജയശാന്തി പാര്‍ട്ടി വിട്ടേക്കുമെന്ന് സൂചനകള്‍ ഒരാഴ്ച മുമ്ബ് ലഭിച്ചിട്ടുണ്ടെന്ന് കോണ്‍ഗ്രസ് നേതാവ് പറയുകയുണ്ടായി.

ദുബാക് മണ്ഡലത്തിലെ ഉപതെരഞ്ഞെടുപ്പ് ഫലം പുറത്തുവന്നാല്‍ വിജയശാന്തി ഔദ്യോഗികമായി പാര്‍ട്ടി വിട്ടേക്കുമെന്നാണ് അറിയുന്നത്. 

തെലങ്കാനയില്‍ ടിആര്‍എസ് കോണ്‍ഗ്രസിനെ തളര്‍ത്തിയെന്നും ഇതാണ് സംസ്ഥാനത്ത് ബിജെപിക്ക് വളരാന്‍ സാഹചര്യമൊരുക്കിയതെന്നും വിജയശാന്തി ട്വീറ്ററില്‍ കുറിക്കുകയുണ്ടായി. കഴിഞ്ഞ ലോക്‌സഭ തെരഞ്ഞെടുപ്പില്‍ സംസ്ഥാനത്ത് കോണ്‍ഗ്രസിന്റെ താരപ്രചാരകയായിരുന്നു വിജയശാന്തി.

പാര്‍ട്ടിയില്‍ അര്‍ഹമായ പരിഗണന ലഭിക്കുന്നില്ലെന്ന പരാതിയെ തുടര്‍ന്ന് കഴിഞ്ഞ കുറച്ച്‌ മാസങ്ങളായി ഇവര്‍ സജീവമായിരുന്നില്ല. തുടര്‍ന്ന് കഴിഞ്ഞയാഴ്ച കേന്ദ്രമന്ത്രി കിഷന്‍ റെഡ്ഡിയുമായി കൂടിക്കാഴ്ച നടത്തി. 1998ല്‍ ബിജെപിയിലൂടെയാണ് വിജയശാന്തി രാഷ്ട്രീയ പ്രവര്‍ത്തനത്തിന് തുടക്കമിട്ടത്.