എന്‍എച്ച്എസിലെ പിപിഇ പ്രതിസന്ധി പ്രധാനമന്ത്രിയുടെ ശ്രദ്ധയിലെത്തിച്ച ഡോക്ടര്‍ കൊറോണ ബാധിച്ചു മരിച്ചു

ലണ്ടന്‍: യുകെയിലെ എന്‍എച്ച്എസില്‍ പേഴ്സണല്‍ പ്രൊട്ടക്ഷന്‍ ഉപകരണങ്ങളുടെ (പിപിഇ) അഭാവത്തെക്കുറിച്ച് ഫേസ് ബുക്കില്‍ പോസ്റ്റ് ചെയ്ത കണ്‍സള്‍ട്ടന്റ് കൊറോണ വൈറസ് ബാധിച്ച് മരിച്ചു. കിഴക്കന്‍ ലണ്ടനിലെ ഹോമര്‍ട്ടണ്‍ യൂണിവേഴ്‌സിറ്റി ഹോസ്പിറ്റലില്‍ ജോലി ചെയ്തിരുന്ന യൂറോളജിസ്റ്റ് ഡോ. അബ്ദുല്‍ മബുദ് ചൗധരി (53)ആണ് കൊറോണ വൈറസ് രോഗ ബാധയെത്തുടര്‍ന്ന് ആശുപത്രിയില്‍ മരിച്ചത്. കൊറോണ രോഗം പിടിപെട്ടു രണ്ടാഴ്ചയോളം ആശുപത്രിയില്‍ ചികിത്സയിലായിരിക്കെയാണ് ഡോ.ചൗധരി മരിച്ചത്.

ആശുപത്രിയില്‍ പ്രവേശിപ്പിക്കുന്നതിന് അഞ്ച് ദിവസം മുമ്പ്, ഡോ.ചൗധരി പ്രധാനമന്ത്രി ബോറിസ് ജോണ്‍സണോട് ഓരോ എന്‍എച്ച്എസ് തൊഴിലാളിക്കും അടിയന്തരമായി വ്യക്തിഗത സംരക്ഷണ ഉപകരണങ്ങള്‍ (പിപിഇ) നല്‍കണമെന്ന് ആവശ്യപ്പെട്ട് ഒരു ഫേസ്ബുക്ക് പോസ്റ്റ് എഴുതിയത് സഹജോലിക്കാരുടെ ആവശ്യത്തിന്മേലുള്ള ഉല്‍ക്കണ്ഠയാണ് രേഖപ്പെടുത്തിയത്.

' ആരോഗ്യ പ്രവര്‍ത്തകര്‍ രോഗികളുമായി നേരിട്ട് സമ്പര്‍ക്കം പുലര്‍ത്തുന്നുണ്ടെന്നും അവരുടെ കുടുംബവുമായും കുട്ടികളുമായും രോഗരഹിതമായ ഈ ലോകത്ത് ജീവിക്കാന്‍ മറ്റുള്ളവരെപ്പോലെ അവര്‍ക്ക് മനുഷ്യാവകാശമുണ്ടെന്നും' അദ്ദേഹം പ്രധാനമന്ത്രിയോട് പറഞ്ഞു. 'ആളുകള്‍ ഞങ്ങളെ അഭിനന്ദിക്കുകയും ഞങ്ങളുടെ ജോലിക്ക് ഞങ്ങളെ അഭിവാദ്യം ചെയ്യുകയും ചെയ്യുന്നു, അത് വളരെ പ്രചോദനകരമാണ്, എന്നാല്‍ ഈ ആഗോള ദുരന്തത്തില്‍ നമ്മെയും ഞങ്ങളുടെ കുടുംബങ്ങളെയും കുട്ടികളെയും ഉചിതമായ രീതിയില്‍ സംരക്ഷിക്കണമെന്ന് ആഗ്രഹിക്കുന്നു. പിപിഇയും പരിഹാരങ്ങളും ഉണ്ടാവണം .'

ഡോ. ചൗധരി നേരിട്ട് കൊറോണ രോഗബാധിതരോട് ബന്ധപ്പെടേണ്ടതില്ലെങ്കിലും ഇതര ഡോക്ടര്‍മാരുടെ തിരക്കിനിടയില്‍ സഹായ ഹസ്തവുമായി വരാറുണ്ടായിരുന്നു. കൂടാതെ രോഗികളെ പരിചരിക്കുന്ന തന്റെ സുഹൃത്തുക്കളെ മാറ്റിനിറുത്തുകയുമില്ലായിരുന്നു.

20 വര്‍ഷമായി ഡോ. ചൗധരിയെ അറിയുന്ന 45 കാരനായ ഡോ. ഖാന്‍ അദ്ദേഹത്തെ 'ജീവിതസ്നേഹിയായ വ്യക്തി' എന്നാണ് വിശേഷിപ്പിച്ചത്.അദ്ദേഹം നന്നായി പാടുമായിരുന്നു. അദ്ദേഹം തന്റെ സ്വന്തം ബംഗാളി സംസ്‌കാരം ഇഷ്ടപ്പെടുകയും ഇംഗ്ലീഷ് പൈതൃകത്തെ ഇഷ്ടപ്പെടുകയും ചെയ്തു.

ഡോ.ചൗധരിക്കു ഭാര്യയും രണ്ടു മക്കളുമുണ്ട്. പിതാവിന്റെ മരണശേഷം ഭാവിയില്‍ ഡോക്ടര്‍മാരായി സേവനം ചെയ്യുവാന്‍ തങ്ങള്‍ക്ക് പ്രചോദനമായതായി മക്കളായ വരിഷയും ഇന്റ്റിസാറും പറഞ്ഞു.

റിപ്പോര്‍ട്ട്: അപ്പച്ചന്‍ കണ്ണഞ്ചിറ