മാഞ്ചസ്റ്റര്: യുകെയുടെ മലയാറ്റൂര് എന്നറിയപ്പെടുന്ന മാഞ്ചസ്റ്ററിലെ ദുക്റാന തിരുനാള് ജൂണ് 26 മുതല് 30 വരെ നടക്കും.
എല്ലാ ദിവസവും വൈകുന്നേരം അഞ്ചിന് ദിവ്യബലിയും മധ്യസ്ഥ പ്രാര്ഥനയും ലദീഞ്ഞും നടക്കും. പ്രധാന തിരുനാള് ദിനമായ ജൂലൈ ഒന്നിനു (വെളളി) വൈകുന്നേരം നാലിനു വിശുദ്ധ കുര്ബാനയും തുടര്ന്നു ആറു മുതല് വിഥിന്ഷോ ഫോറം സെന്ററില് ബിജു നാരായണന്റെ ഗാനമേളയും അരങ്ങേറും. രണ്ടിനു (ശനി) രാവിലെ 10നു നടക്കുന്ന വിശുദ്ധ കുര്ബാനക്ക് മാര് ജോര്ജ് പുന്നക്കോട്ടിലും ബിഷപ് മാര്ക്ക് ഡേവിസും കാര്മികത്വം വഹിക്കും.
ഷ്രൂഷ്ബറി രൂപതയുടെ സംയുക്ത തിരുനാള് ആഘോഷമായിട്ടാണ് ഈ വര്ഷം മുതല് മാഞ്ചസ്റ്റര് തിരുനാള് അറിയപ്പെടുക. രൂപതയുടെ മാസ് സെന്ററുകളായ സ്റ്റോക്ക് പോര്ട്ട്, ബര്ക്കിന്ഹെഡ്, ടെല്ഫോര്ഡ്, ക്രൂ, മാക് ലസ് ഫീല്ഡ്, നോര്ത്ത് വിച്ച്, ചെസ്റ്റര്, വിഥിന്ഷോ എന്നിവിടങ്ങളില് നിന്നുളള വിശ്വാസികളും സകുടുംബം തിരുനാള് ആഘോഷ പരിപാടികളുടെ വിജയത്തിനു നേതൃത്വം നല്കുന്നു. യുകെ കണ്ട ഏറ്റവും വലിയ തിരുനാള് ആഘോഷമാക്കി മാറുവാനുളള ഒരുക്കത്തിലാണ് രൂപത വിശ്വാസികള്.
തിരുനാളിന്റെ വിജയത്തിനായുളള ആദ്യ പ്രമോ വീഡിയോ പുറത്തിറക്കി. ഇടവക വികാരി റവ. ഡോ. ലോനപ്പന് അരങ്ങാശേരിയാണ് ആദ്യ വീഡിയോ പുറത്തിറക്കിയത്.
ഷ്രൂഷ്ബറി രൂപത സീറോ മലബാര് ചാപ്ലെയിന് റവ. ഡോ. ലോനപ്പന് അരങ്ങാശേരിയുടെ നേതൃത്വത്തില് പ്രവര്ത്തിച്ചുവരുന്ന വിവിധ കമ്മിറ്റികളാണു തിരുനാള് ആഘോഷങ്ങള്ക്ക് നേതൃത്വം നല്കി വരുന്നത്.
റിപ്പോര്ട്ട്: സാബു ചുണ്ടക്കാട്ടില്