കൊച്ചി: കന്യാസ്‌ത്രീയെ പീഡിപ്പിച്ച കേസില്‍ ബിഷപ്പ്‌ ഫ്രാങ്കോ മുളയ്‌ക്കലിനെ ചോദ്യം ചെയ്യാന്‍ ആധുനിക സംവിധാനങ്ങള്‍. ബിഷപ്പിന്റെ മൊഴി രേഖപ്പെടുത്താന്‍ ആധുനിക രീതിയിലുള്ള ചോദ്യം ചെയ്യല്‍ മുറികളാണ്‌ തയ്യാറാക്കിയിട്ടുള്ളത്‌.

 അഞ്ച്‌ ക്യാമറകള്‍ മുറിയില്‍ സജ്ജമാക്കിയിട്ടുണ്ട്‌.
ഭാവവ്യത്യാസങ്ങളടക്കം പരിശോധിച്ച്‌ പറയുന്നത്‌ നുണയാണോ എന്നതടക്കം മനസിലാക്കാനുള്ള സംവിധാനങ്ങളാണ്‌ പൊലീസിന്റെ പക്കലുള്ളത്‌.ചോദ്യം ചെയ്യലിനായി രണ്ട്‌ മുറികളാണ്‌ സജ്ജീകരിച്ചിരിക്കുന്നത്‌.

ആദ്യത്തെ മുറിയില്‍ അന്വേഷണ ഉദ്യോഗസ്ഥന്‍ മുഖാമുഖമിരുന്ന്‌ ബിഷപ്പിന്റെ മൊഴിയെടുക്കും രണ്ടാമത്തെ മുറിയിലിരിക്കുന്ന സംഘം ബിഷപ്പിന്റെ മുഖഭാവങ്ങള്‍ പരിശോധിക്കും.
മുമ്പ്‌ നടിയെ ആക്രമിച്ച കേസില്‍ നടന്‍ ദിലീപിനെ ചോദ്യം ചെയ്‌തതും ഇതേ സ്ഥലത്തുവെച്ചാണ്‌.







മൊഴികളിലെ വൈരുദ്ധ്യങ്ങളും വ്യത്യാസങ്ങളും ദൂരീകരിക്കുന്നതിനാണ്‌ ബിഷപ്പിന്റെ മൊഴിയെടുക്കുന്നത്‌. തെളിവുകള്‍ ഉണ്ടെന്ന്‌ ബോധ്യപ്പെട്ടാല്‍ അറസ്റ്റുണ്ടാകും. എന്നാല്‍ അറസ്റ്റുമായി ബന്ധപ്പെട്ട കാര്യം ചോദ്യംചെയ്യലിനു ശേഷം മാത്രമേ അന്തിമ തീരുമാനം ഉണ്ടാകൂ. ഹൈക്കോടതി അറസ്റ്റ്‌ തടഞ്ഞിട്ടില്ല. ഇന്നത്തെ ചോദ്യംചെയ്യലിനു ശേഷം മാത്രമേ തുടര്‍ ചോദ്യംചെയ്യല്‍ ആവശ്യമുണ്ടോ എന്ന്‌ പറയാന്‍ കഴിയൂ എന്നും അദ്ദേഹം പറഞ്ഞു.

അന്വേഷണ സംഘത്തിന്‌ മേല്‍ സമ്മര്‍ദ്ദങ്ങളൊന്നുമില്ല. നാലു വര്‍ഷം പഴക്കമുള്ള കേസില്‍ ശസ്‌ത്രീയ തെളിവുകള്‍ പരിമിതമായിരിക്കും. അന്വേഷണത്തില്‍ സാക്ഷിമൊഴികളാണ്‌ പ്രധാനം. അതുകൊണ്ടുതന്നെ കൂടുതല്‍ സാക്ഷികളെ ചോദ്യംചെയ്യേണ്ടിവരും. അതിന്‌ കൂടുതല്‍ സമയം വേണ്ടിവരും. കേസില്‍ വളരെ വേഗതയിലാണ്‌ അന്വേഷണം നടന്നത്‌. ഇതുവരെയുള്ള അന്വേഷണത്തില്‍ അന്വേഷണ സംഘത്തിന്‌ പൂര്‍ണ തൃപ്‌തിയാണുള്ളതെന്നും അദ്ദേഹം പറഞ്ഞു.