സൈ്വര്യമായ് ഇമയടച്ചീടുവാനാകാതെ,
ഇരവുപകലൊഴുകി നീങ്ങീടുന്നതറിയാതെ,
ഇഷ്ടങ്ങള് നഷ്ടമായീടുന്നതോര്ക്കാതെ,
ശിഷ്ടകാലത്തെക്കുറിച്ചൊന്നുമോര്ക്കാതെ,
അല്പ്പം തനിക്കെന്നു ചൊല്ലി നീക്കീടാതെ,
കഷ്ടങ്ങള് പേറിടാന് ചുമലുകാട്ടുന്നോന്.
അഷ്ടിക്കായ് അറിയാത്ത ദിക്കുകള് പൂകുവോന്,
ഇഴ മുറിഞ്ഞീടാതെ ബന്ധങ്ങള് കാക്കുവോന്.
കല്മഷലേശമില്ലാത്തതാം വാത്സല്ല്യം,
കണ്മണിക്കായ് കാത്തു വച്ചിടുന്നോന്.
പഞ്ചേന്ദ്രിയങ്ങളുമുണര്ന്നിരിക്കുന്നുറ്റ
ജന്മങ്ങള് ഭദ്രമാണാക്കരത്തില്.
അതിരറ്റ സ്നേഹമുണ്ടകതാരിലെന്നാലും,
അതു കാട്ടിടാന് തെല്ലു മടി കാട്ടുവോന്.
ആത്മസംഘര്ഷങ്ങള് ഉള്ളിലേറ്റുമ്പൊഴും,
ആത്മവിശ്വാസം പകര്ന്നിടുന്നോന്.
പ്രാരാബ്ദഭാരം ചുമന്നവശനാകിലും,
ആശ്വാസവചനം ചൊരിഞ്ഞിടുന്നോന്.
സങ്കടക്കനലെരിഞ്ഞീടിലും ഒരുതുള്ളി
കണ്ണുനീര് വാര്ത്തിടാ ധീരനച്ഛന്.
അഴലേതുമറിയാതെ അരുമകള് വളരുവാന്
രക്തം വിയര്പ്പായൊഴുക്കുന്ന താതന്.
ആശ്രിതര്ക്കശ്രു പൊഴിച്ചിടാനവസരം
സൃഷ്ടിച്ചിടാത്ത നല്പുരുഷനച്ഛന്.