രാഗശിഞ്ജിതം (കവിത: ജി. പുത്തന്‍കുരിശ്)

ഓര്‍മ്മകള്‍ മാടി വിളിച്ചു എന്നെ

പ്രേമത്തിന്‍ മഞ്ചലിലേറ്റി

തൊട്ടരികത്തങ്ങിരുത്തി എന്നോ

ടൊട്ടു കഥകള്‍ പറഞ്ഞു

മന്മഥന്‍ കെട്ടിപുണര്‍ന്നു ഹാ!ഹാ!

എന്മനമാകെ – തുടിച്ചു

മാറോട് ചേര്‍ത്തു പിടിച്ചു മുഖം

വാര്‍മുടിക്കുള്ളിലമര്‍ന്നു

അംഗുലി മെല്ലെ ചലിച്ചു – എന്റെ

അംഗങ്ങള്‍ കോരിതരിച്ചു

കല്പന കോള്‍മയിര്‍ക്കൊണ്ടുഉള്ളില്‍

സ്വപ്നം ചിറകടിച്ചേറ്റു

ഗുപ്തമോഹമുണര്‍ന്നുഎന്നില്‍

തപ്തനിശ്വാസമുയര്‍ന്നു

ചെംചുണ്ടില്‍ ചുണ്ടൊന്നമര്‍ന്നുനെഞ്ചില്‍

മഞ്ജിരശിഞ്ജിതം കേട്ടു

പെട്ടന്നു വന്നൊരുതെന്നല്‍തോളില്‍

തട്ടിയിട്ടൂറിചിരിച്ചു

ചുറ്റും പരിമളം വീശികള്ളന്‍

തെറ്റന്നു പോയിമറഞ്ഞു

(ഹൃദയത്തില്‍ പ്രണയം സൂക്ഷിക്കുന്ന ഏവര്‍ക്കും ഉല്ലാസകരമായ ഒരു വാലന്റ്റെന്‍ ദിനം നേരുന്നു)