ന്യൂഡല്‍ഹി: മുല്ലപ്പെരിയാര്‍ വിഷയത്തില്‍ ഇടപെടണമെന്ന് ആവശ്യപ്പെട്ട് ദേശീയ മനുഷ്യാവകാശ കമ്മിഷന് കേരളത്തില്‍ നിന്നുള്ള എം.പിമാര്‍ നിവേദനം നല്‍കി. ഇക്കാര്യം പരിശോധിക്കാമെന്ന് എം.പിമാര്‍ക്ക് ദേശീയ മനുഷ്യാവകാശ കമ്മീഷന്‍ അധ്യക്ഷന്‍ ജസ്റ്റിസ്് കെ.ജി. ബാലകൃഷ്ണന്‍ ഉറപ്പുനല്‍കുകയും ചെയ്തതായാണ് വിവരം.

അടുത്ത തിങ്കളാഴ്ച്ച ചേരുന്ന കമ്മിഷന്റെ സമ്പൂര്‍ണ യോഗമാകും വിഷയം പരിഗണിക്കുക. മുല്ലപ്പെരിയാര്‍ ഡാമിന്റെ ദുര്‍ബലാവസ്ഥയുടെ പശ്ചാത്തലത്തില്‍ ജനങ്ങളുടെ സുരക്ഷ സംബന്ധിച്ച പ്രശ്‌നം അനുഭാവപൂര്‍വ്വം പരിഗണിക്കാമെന്ന് മനുഷ്യാവകാശ കമ്മീഷന്‍ അധ്യക്ഷന്‍ എം.പിമാര്‍ക്ക് ഉറപ്പുനല്‍കിയതായി സംഘത്തിലുണ്ടായിരുന്ന പി.കരുണാകരന്‍ എം.പി. പറഞ്ഞു.