കോഴിക്കോട്‌: മരണാനന്തരം മഹത്വം പറയുക എന്ന കള്ളത്തരമാണ്‌. തിലകന്‌ ചെറിയ കാലത്തേക്കായാലും അവസരം നിഷേധിച്ചതില്‍ ഖേദിക്കുകയാണ്‌ മലയാള സിനിമ ചെയ്യേണ്ടതെന്ന്‌ സംവിധായകന്‍ രഞ്‌ജിത്‌. തിലകന്റെ വേര്‍പാടില്‍ അദ്ദേഹത്തെ അനുസ്‌മരിക്കുകയായിരുന്നു രഞ്‌ജിത്‌. ജീവിച്ചിരിക്കെ ആ കലാകാരന്റെ മഹത്വം തിരിച്ചറിയാത്തവരുണ്ട്‌. വിദ്വേഷം മനസില്‍ കൊണ്ടുനടക്കുന്ന വ്യക്‌തിയായിരുന്നില്ല അദ്ദേഹം. മനസ്സില്‍ തോന്നുന്നത്‌ മുഖത്തുനോക്കി പറയുമെന്നു മാത്രം. ഇന്ത്യന്‍ റുപ്പീയില്‍ തിലകനെ അഭിനയിപ്പിക്കുക എന്നത്‌ തന്റെ തീരുമാനമായിരുന്നു. തന്റെ കഥാപാത്രത്തിന്‌ തിലകനോളം അനുയോജ്യനായ മറ്റൊരു നടന്‍ ഇല്ല എന്നാണ്‌ താന്‍ കരുതിയത്‌. ആ പ്രതീക്ഷ തിലകന്‍ തെറ്റിച്ചതുമില്ല എന്നും രഞ്‌ജിത്‌ നടന്‍ തിലകനെ അനുസ്‌മരിച്ച്‌ പറഞ്ഞു.