കണ്ണൂര്‍: മാഹിയില്‍ വാഹനപരിശോധനക്കിടെ 18 കിലോ സ്വര്‍ണം പിടികൂടി. പൂഴിത്തല ചെക്ക്‌പോസ്റ്റില്‍ വെച്ചാണ് സ്വര്‍ണം പിടികൂടിയത്. 9 കോടിയോളം രൂപയുടെ സ്വര്‍ണമാണ് പിടികൂടിയത്. കേരളത്തിലെ പ്രമുഖ ജ്വല്ലറികളിലേയ്ക്ക് വിതരണം ചെയ്യാന്‍ കൊണ്ടുപോകുകയാണെന്നാണ് വാഹനത്തിലുള്ളവര്‍ പറഞ്ഞത്. രേഖകള്‍ പരിശോധിച്ചുവരികയാണെന്ന് മാഹി അഡ്മിനിസ്‌ട്രേറ്റര്‍ അറിയിച്ചു.

മഹാരാഷ്ട്ര രജിസ്‌ട്രേഷനിലുള്ള മഹീന്ദ്രാ വാഹനത്തില്‍ നിന്നാണ് സ്വര്‍ണം പിടികൂടിയത്. തെരഞ്ഞെടുപ്പ് അടുത്തതിനാല്‍ സംസ്ഥാനത്ത് പോലീസ് പരിശോധന ശക്തമാക്കിയിരിക്കുകയാണ്. വാഹന പരിശോധനയും റെയില്‍വേ സ്‌റ്റേഷനുകളിലെ പരിശോധനയുമെല്ലാം ശക്തമായി തുടരുകയാണ്. അടുത്തിടെ കോഴിക്കോട്, പാലക്കാട് റെയില്‍വേ സ്റ്റേഷനുകളില്‍ നിന്നും രേഖകളില്ലാതെ കടത്താന്‍ ശ്രമിച്ച ലക്ഷക്കണക്കിന് രൂപയുടെ കള്ളപ്പണം പിടികൂടിയിരുന്നു.