തിരുവനന്തപുരം: കോണ്ഗ്രസ് നേതൃത്വം ആവശ്യപ്പെട്ടാല് കോട്ടയം ജില്ലയില് മത്സരിക്കുമെന്ന് കോണ്ഗ്രസ് നേതാവ് കെ.സി. ജോസഫ്. ഇരിക്കൂറില് മത്സരിക്കാനില്ലന്നും ഇരിക്കൂറില് നിന്ന് മാറുന്നത് മലബാറിലെ നേതാക്കള്ക്ക് അവസരം നല്കാനാണെന്നും അദ്ദേഹം പറഞ്ഞു.
സര്ക്കാരിനെതിരായ അഴിമതി ആരോപണങ്ങള് ജനങ്ങള് കാണുന്നുണ്ടെന്നും നിലവില് യുഡിഎഫിന് അനുകൂല സാഹചര്യമാണ് സംസ്ഥാനത്ത് എന്നും ജോസഫ് പറഞ്ഞു. പ്രതിപക്ഷ നേതാവ് രമേശ് ചെന്നിത്തല നയിച്ച ഐശ്വര്യ കേരള യാത്ര വന്വിജയമായിരുന്നുവെന്നും അദ്ദേഹം കൂട്ടിച്ചേര്ത്തു.
അതേസമയം, നിയമസഭാ തിരഞ്ഞെടുപ്പില് താന് മല്സരിക്കുന്നത് പാര്ട്ടി തീരുമാനിക്കുമെന്ന് മുന് മുഖ്യമന്ത്രി ഉമ്മന് ചാണ്ടി പറഞ്ഞു. അര്ഹിക്കുന്നതിലേറെ പാര്ട്ടി എനിക്ക് തന്നുവെന്ന അഭിപ്രായക്കാരനാണ് ഞാന്. പാര്ട്ടി നിര്ദേശിച്ചാല് മാത്രം മല്സരിക്കും. രമേശ് ചെന്നിത്തല നിശ്ചയമായും മല്സരിക്കും, അദ്ദേഹം പ്രതിപക്ഷനേതാവാണ്. പ്രതിപക്ഷ നേതാവെന്ന നിലയില് രമേശ് ചെന്നിത്തലയുടെ പ്രവര്ത്തനം പ്രശംസനീയമാണ്. കോണ്ഗ്രസിന്റെ മുഖ്യമന്ത്രിയെ തീരുമാനിക്കുന്നത് ഹൈക്കമാന്ഡ് ആണെന്നും ഉമ്മന് ചാണ്ടി പറഞ്ഞു