ക്രിസ്ത്യൻ
ദേശീയത എന്നത് ഒരു രാഷ്ട്രീയ പ്രത്യയശാസ്ത്രമാണ്,- “അമേരിക്കൻ
രാഷ്ട്രത്തിൻറ്റെ അടിസ്ഥാനം ക്രിസ്തുമതമാണ്, അതിനാൽ നമ്മുടെ ക്രിസ്തീയ
പൈതൃകം നിലനിർത്തുന്നതിനുള്ള ഉത്തരവാദിത്തം സർക്കാരിൽ നിക്ഷിപ്തമാണ്''-.
ഇതാണ് അവരുടെ നിലപാട്. എന്നാൽ അമേരിക്കൻ ഭരണഘടനയിൽ ഇങ്ങനെ വല്ലതും
വിവക്ഷിക്കുന്നുണ്ടോ എന്ന് നോക്കിയാൽ ഇല്ല എന്ന് കാണാം. അമേരിക്ക ഒരിക്കലും
ഒരു ക്രിസ്ത്യൻ രാജ്യം ആയിരുന്നില്ല.
ക്രിസ്ത്യൻ ദേശീയവാദം ഒരു വിഹഗ വീക്ഷണം:
ദൈവത്തിൻറ്റെ
പ്രത്യേക നിയോഗമാണ് അമേരിക്കയെ കണ്ടുപിടിക്കാൻ ഉള്ള കാരണം. അമേരിക്കൻ
കിസ്ത്യൻ ദേവാലയങ്ങളിൽ വിശുദ്ധ സ്ഥലത്തു അമേരിക്കൻ പതാക കാണാം. ഒറ്റ
നോട്ടത്തിൽ നിഷ്കളങ്കമായ രാജ്യ സ്നേഹം എന്ന് എല്ലാവരും തെറ്റിദ്ധരിക്കുകയും
ചെയ്യും. മതവും രാഷ്ട്രീയവും തമ്മിലുള്ള അതിര് തിരിക്കലും അല്ല അത്.
ക്രിസ്തിയാനിറ്റിയും അമേരിക്കൻ ഭരണവും രണ്ട് അല്ല ഒന്നാണ് എന്ന് അത്
നിഗൂഡമായി പ്രഖ്യാപിക്കുന്നു. അതാണോ ക്രിസ്തീയത? അല്ല. വിശ്വാസത്തേക്കാൾ
പ്രാധാന്യം അധികാരത്തിനുതന്നെ. അതിനാൽ രാഷ്ട്രീയ അധികാരത്തിനുവേണ്ടി
നിലനിൽക്കുന്ന പ്രസ്ഥാനങ്ങളുടെ സമാഹാരം ആണ് ക്രിസ്ത്യൻ ദേശീയത.
ക്രിസ്ത്യൻ
ദേശീയവാദം പുതിയത് അല്ല, കഴിഞ്ഞ 200 വർഷമായി ക്രിസ്ത്യൻ ദേശീയത അമേരിക്കൻ
ഭരണത്തെ നിയന്ത്രിക്കുന്നു. എന്നാൽ വ്യക്തമായ ആദർശങ്ങൾ, തത്വസംഹിത,
നിയമങ്ങൾ, പൊതു ലീഡർ ഒന്നും ക്രിസ്ത്യൻ ദേശീയവാദികൾക്ക് ഇല്ല.
വെള്ളക്കാരായ ക്രിസ്തിയാനികളുടെ അന്നത്തെ ആവശ്യങ്ങൾ ന്യായികരിക്കാൻ
ബൈബിളിനെ അവലംബിക്കുന്നു എന്ന് മാത്രം. കൂലി കൊടുക്കാതെ പണി ചെയ്യിക്കുവാൻ
അവർ അടിമ സമ്പ്രദായം കൊണ്ടുവന്നു. പൂർവ പാട്രിയാർക്കുകൾ അടിമ ഉടമകൾ
ആയിരുന്നു, പൗലൂസിൻറ്റെ ലേഖനങ്ങൾ അടിമത്തം പ്രോൽത്സാഹിപ്പിക്കുന്നു
പ്രത്യേകിച്ചും തെസ്സലോനിക്കർ, ഫിലോമോൻ എന്നിവ. അടിമത്തത്തിൽനിന്നും
രക്ഷപെട്ട് ഒളിച്ചോടി പൗലൂസിൻറ്റെ അഭയം തേടിയ ഒനേസിമൊസിനോട് തിരികെ ഉടമ
ഫിലോമോൻറ്റെ അടുക്കൽ പോകുവാനാണ് പൗലോസ് നിർദേശിക്കുന്നത്. അത്തരം മുടന്തൻ
ന്യായങ്ങൾ അടിമകളെ അടക്കി ഭരിക്കാൻ അവർ ഉയോഗിച്ചു.
തെക്കേ
അമേരിക്കക്കാർ വടക്കേ അമേരിക്കയിൽ വരുവാനുള്ള കാരണങ്ങളിൽ പ്രധാനമായത്
അമേരിക്കൻ മുതലാളികൾക്കു ചീപ് ലേബർ വേണമായിരുന്നു. അവർ ചെയ്യുന്ന ജോലികൾ
ചെയ്യുവാൻ ഇന്നും വെള്ളക്കാർ തയ്യാറല്ല. അവർ എല്ലാവരും തന്നെ ഏതെങ്കിലും
ക്രിസ്ത്യൻ വിഭാഗങ്ങളിൽ പെട്ടവരും ആണ്. അനധിക്രിത കുടിയേറ്റത്തിനു കാരണം
ക്രിസ്ത്യൻ വിഭാഗങ്ങൾ അവരെ പ്രോൽസാഹിപ്പിച്ചു എന്ന സത്യം ആണ്.
ക്രിസ്തിയാനികളുടെ എണ്ണം കൂട്ടുക എന്നത് ആയിരുന്നു പള്ളികളുടെ ലക്ഷ്യം.
ഇത്തരം കുടിയേറ്റക്കാർ പൊതുവെ ക്രിസ്ത്യൻ ദേശീയവാദികളുടെ കൂടെ നിൽക്കുന്നു.
ക്രിസ്ത്യൻ ദേശീയത അമേരിക്കൻ സമൂഹത്തിൻറ്റെ സാധാരണ അടിസ്ഥാന ഭാഗമായി
മാറിയതോടെ അധികമാരും അതിനെ ശ്രദ്ധിച്ചില്ല. എന്നാൽ അമേരിക്കൻ ക്രിസ്തീയ
ദേശീയവാദം ട്രമ്പിസമായി പരിണമിക്കുകയും ജനാധിപത്യത്തിൻറ്റെ ശ്രീകോവിൽ തല്ലി
തകർക്കുകയും ശുദ്ധ സ്ഥലത്തു കാളകൾ സംഹാര താണ്ഡവം നടത്തുകയും ചെയ്യ്തപ്പോൾ
മാത്രമാണ് ജനശ്രദ്ധ ആകർഷിച്ചത്.
ആൻഡ്രൂ എൽ. വൈറ്റ്ഹെഡ്,
സാമുവൽ പെറി എന്നിവർ രചിച്ച - ടേക്കിങ് അമേരിക്ക ബാക്ക് - വായിക്കുന്നത്
രസകരം ആയിരിക്കും. അവർ ക്രിസ്ത്യൻ ദേശീയതയെ നിർവചിക്കുന്നത് നോക്കുക:
അമേരിക്കൻ നാഗരിക ജീവിതവും സംസ്കാരവും ക്രിസ്ത്യൻ വിശ്വാസങ്ങളുമായി ഇണ
ചേർന്ന ഒരു പ്രത്യയശാസ്ത്രമാണ് ക്രിസ്ത്യൻ ദേശീയത. "യുഎസ് വ്യക്തമായ ഒരു
ക്രിസ്ത്യൻ രാഷ്ട്രമായിട്ടാണ് സ്ഥാപിതമായതെന്ന് ക്രിസ്ത്യൻ ദേശീയവാദികൾ
വിശ്വസിക്കുന്നു രാജ്യത്തിൻറ്റെ വിജയം ലോകത്തിനായുള്ള ദൈവത്തിൻറ്റെ
ആത്യന്തിക പദ്ധതിയുടെ പ്രതിഫലനമാണ്. പൊതുവിദ്യാലയങ്ങളിൽ പ്രാർത്ഥന
അനുവദിക്കണം. ഫെഡറൽ സർക്കാർ യുഎസിനെ ഒരു ക്രിസ്ത്യൻ രാഷ്ട്രമായി
പ്രഖ്യാപിക്കുകയും ക്രിസ്ത്യൻ മൂല്യങ്ങൾ പ്രചരിപ്പിക്കുകയും വാദിക്കുകയും
പൊതുസ്ഥലങ്ങളിൽ മതപരമായ പ്രദർശനങ്ങൾക്ക് പിന്തുണ നൽകുകയും വേണം. ഉദാഹരണമാണ്
പത്തു കൽപ്പനകൾ പൊതു സ്ഥലങ്ങളിൽ പ്രദർശിപ്പിക്കുന്നത്.
കൂടാതെ,
ക്രൈസ്തവ ദേശീയതയുടെ "ക്രിസ്ത്യാനിറ്റി" യിൽ ദേശ നിവാസികൾക്ക് പ്രാധാന്യം,
വൈറ്റ് മേധാവിത്വം, പുരുഷാധിപത്യം, സ്ത്രീയും പുരുഷനും തമ്മിൽ മാത്രമുള്ള
വിവാഹം എന്നിവ മാത്രമേ ആകാവൂ. സ്വേച്ഛാധിപത്യ ഭരണം, സൈനിക നിയന്ത്രണം
എന്നിവക്ക് ദൈവം അനുമതി നൽകുന്നു. കുറെ സ്പെഷ്യൽ വംശീയ കൂട്ടം
മനുഷ്യരുടെ സ്പെഷ്യൽ മതപരവും വംശീയവും ആയ രാഷ്ട്രീയമാണ് ക്രിസ്ത്യൻ
ദേശീയവാദം. വെള്ളക്കാരുടെ വംശത്തിന് ചുറ്റുമുള്ള ഗ്രൂപ്പ്
വംശങ്ങളിൽനിന്നും മാറി നിൽക്കുവാനും അംഗത്വത്തിൻറ്റെ അതിരുകൾ
സൃഷ്ടിക്കാനുള്ള അധികാരം അവർക്ക് മാത്രമുള്ളതുമാകുന്നു. ന്യൂനപക്ഷങ്ങൾക്ക്
വെള്ളക്കാരുടെ അമേരിക്കയിൽ യാതൊരു അവകാശങ്ങളും ഇല്ലാത്ത ഭരണം. ഇവരിൽ
ഏറിയ ശതമാനം പേരും അടിമത്തം തിരികെ കൊണ്ടുവരണം എന്ന് വാദിക്കുന്നു.
പൊതു
കലയും മത കലയും ഒന്നായിരിക്കണം, അതായത് കലകൾ എല്ലാം മത പരമായിരിക്കണം.
പത്ത് കൽപ്പനകൾ പ്രദർശിപ്പിക്കുക, നോഹയുടെ പെട്ടകം ദേശീയ മ്യൂസിയം
ആയിരിക്കുക, "ഇൻ ഗോഡ് വി ട്രസ്റ്റ്" എന്ന ദേശീയ മുദ്രാവാക്യം
പ്രദർശിപ്പിക്കുക, മുൻ സോവിയറ്റ് യൂണിയൻറ്റെ നിരീശ്വരവാദത്തിൽ നിന്ന്
അമേരിക്കയെ വേർതിരിക്കുക. [ഉദാഹരണത്തിന്, 2003 ൽ റോയ് മൂർ സ്ഥാപിച്ച -
ഫൗണ്ടേഷൻ ഫോർ സദാചാര നിയമം]-. ഒന്നാം ദിവസത്തെ ശബ്ബത്ത്
തത്വങ്ങൾക്കനുസൃതമായി ഞായറാഴ്ച ആചരിക്കുക, പ്രൊ ലൈയിഫ് പ്രത്യയശാസ്ത്രം
ഇവയൊക്കെ ക്രിസ്തീയ ദേശീയ വാദം ഉൾക്കൊള്ളുന്നു. (ഇവയൊക്കെ ബ്രാഹ്മണീയ കേരളം
പോലെ തന്നെ)
അമേരിക്കൻ ഭരണഘടനയിൽ ക്രിസ്ത്യൻ ഭേദഗതികൾ
ഉൾക്കൊള്ളിക്കാൻ വെമ്പൽ കൊണ്ട് 1864 ൽ രൂപംകൊണ്ട സംഘടനയാണ് -നാഷണൽ റിഫോം
അസോസിയേഷൻ. അമേരിക്കയെ ഒരു ക്രിസ്ത്യൻ രാജ്യമായി കാണുന്ന ഒരു രാഷ്ട്രീയ
പാർട്ടിയാണ് ക്രിസ്ത്യൻ ലിബർട്ടി പാർട്ടി. അമേരിക്കൻ ഐക്യനാടുകൾ ഒരു
ക്രിസ്ത്യൻ രാഷ്ട്രമായിരിക്കണമെന്നും ദൈവത്തിനായി യുഎസിനെ
"തിരിച്ചെടുക്കാൻ" ആഗ്രഹിക്കുന്നുവെന്നും ക്രിസ്ത്യൻ ദേശീയവാദികൾ
വിശ്വസിക്കുന്നു. അതിനായി ദൈവം തിരഞ്ഞെടുത്ത പ്രസിഡണ്ട് ആണ് ട്രംപ് എന്നവർ
വിശ്വസിക്കുകയും പ്രചരിപ്പിക്കുകയും പ്രവചിക്കുകയും ചെയ്തു.
കുടിയേറ്റം,
തോക്ക് നിയന്ത്രണം, മുസ്ലിംനിരോധനം, അഭയാർഥികൾ, തുടങ്ങിയ വിഷയങ്ങളിൽ
ട്രംപിനെ പിന്തുണയ്ക്കുന്നവരും അല്ലാത്തവരും ക്രിസ്ത്യൻ ദേശീയവാദികളിൽ
ഉണ്ട്. പൊളിറ്റിക്കലി
കറക്റ്റ്, ഒപിയോയിഡ് ആസക്തി, പൊതു
വിദ്യാഭ്യാസം, പൊലീസിംഗിലെ വംശീയ അനീതി, 'കുടുംബ മൂല്യങ്ങൾ,' ട്രാൻസ്ജെൻഡർ
അവകാശങ്ങൾ, മതേതരത്വം ' തോക്ക് നിയന്ത്രണം , വംശം, കുടിയേറ്റം, ദാരിദ്ര്യം
എന്നിവയെക്കുറിച്ചുള്ള ട്രംപിൻറ്റെ വീക്ഷണങ്ങളിൽ ഇവർക്ക് താല്പര്യം ഇല്ല.
പള്ളിയിൽ പോയി പ്രാർത്ഥിക്കുകയും ബൈബിൾ വായിക്കുകയും ചെയ്യുന്ന ആളുകളും
ട്രംപിസത്തിൽ ഉത്സാഹം കാണിക്കുന്നില്ലെന്ന് 2020 തിരഞ്ഞെടുപ്പ് ഫലം
വ്യക്തമാക്കി.
എന്നിരുന്നാലും, ദേശീയതയില്ലാത്ത ഇവാഞ്ചലിക്കലുകൾ
കുടുംബം, ലിംഗഭേദം, ലൈംഗികത തുടങ്ങിയ മേഖലകളിലെ ക്രിസ്ത്യൻ
ദേശീയവാദികളുമായി യോജിക്കുന്നു. അമേരിക്കൻ ഐക്യനാടുകളിലെ ക്രിസ്ത്യൻ
ദേശീയതയെ വ്യജ പ്രചരണങ്ങളിൽ കൂടി സംയോജിപ്പിക്കുവാൻ ട്രംപ് അനുകൂലികളായ
മെഗാ മില്യൺ പാസ്റ്റേഴ്സിനു സാധിച്ചു.
2016 ൽ ട്രംപ്
വിജയിക്കാനുള്ള കാരണങ്ങളിൽ ഒന്നാണ് ഇത്. എന്നാൽ ഇ മെഗാമില്യൺ പാസ്റ്റെർസ്
ട്രമ്പിൻറ്റെ തലയിൽ കൈവച്ച് പ്രാർത്ഥിച്ചിട്ടും കു അനോൻ കുപ്രചരണവും
ഗൂഢാലോചനയും നടത്തിയിട്ടും എല്ലാ ക്രിസ്ത്യൻ ദേശീയവാദികളെയും ഇത്തവണ
കബളിപ്പിക്കാൻ ട്രംപ് പരാജയപ്പെട്ടു. ശേഷിച്ചവരിൽ കുറേപേർക്ക് കിട്ടിയ
കനത്ത തിരിച്ചടി ആയിരുന്നു കാപ്പിറ്റൽ അക്രമിച്ചതിന് അറസ്റ്റ്
ചെയ്യപ്പെട്ടത്. അവരും ഇപ്പോൾ ട്രംപിനെതിരെ തിരിഞ്ഞു, വധ ഭീഷണി വരെ നടത്തി.
ക്രിസ്ത്യൻ ദേശീയത അമേരിക്കൻ ജനാധിപത്യത്തിന് അപകടകരമാണ്. മതവും
ദേശീയതയും എവിടെ ഒന്നിച്ചാലും അത് അപകടകരമാണ്. മതത്തിൻറ്റെ പുറകിൽ ദൈവം
ഉണ്ട് എന്ന തോന്നൽ മാത്രംമതി ഏതുതരം ഹീനതയും മനുഷൻ ചെയ്യുവാൻ. രാഷ്ട്ര
നിയമങ്ങളും കോടതികളും പോലീസും പട്ടാളവും,കോടതിയും എല്ലാം ദൈവത്തെക്കാൾ
ഉന്നതിയിൽ അല്ല, അതിനാൽ മത ദേശീയവാദികൾക്ക് ആരോടും അനുവാദം ചോദിക്കാതെ
എന്തും ചെയ്യാം എന്നവർ കരുതുന്നു. 'ആരുണ്ടിവിടെ ചോദിക്കാൻ' അതാണ് അവരുടെ
മനോഭാവം.
ഇത്തരക്കാർ ആണ് ട്രംപ് പറഞ്ഞതിൻ പ്രകാരം കാപ്പിറ്റൽ
തകർത്തത്. ഇവരിലെ സ്ത്രീകൾ തലേദിവസം കൊമ്പുകൾ ഊതി കാപ്പിറ്റലിനു ചുറ്റും
നടന്നു. ജെറിക്കോയുടെ മതിലുകൾ കാഹളം ഊതി വീഴിച്ചതുപോലെ കാപ്പിറ്റൽ
വീഴ്ത്തുവാൻ. അൽപ്പം എങ്കിലും വിവരം ഉള്ളവർ കാപ്പിറ്റൽ തകർക്കാൻ പോകുമോ!.
അതുതന്നെയാണ് മത ദേശീയത എത്തിക്കുന്ന അവസ്ഥ. അതാണ് മത ദേശീയത വിഭാവനം
ചെയ്യാൻ ആവാത്തവിധം അപകടകരം ആണ് എന്ന സത്യം.
ഇന്ത്യയിലും ഇസ്ലാമിക
രാജ്യങ്ങളിലും ഇതുതന്നെയാണ് അവസ്ഥ. ഭൂഗോളത്തിൻറ്റെ ഏതു ഭാഗത്തുനിന്നും
എപ്പോൾ വേണമെങ്കിലും മുന്നറിയിപ്പു ഒന്നും ഇല്ലാതെ മത ദേശീയ തീവ്രത കത്തി
പടരാനുള്ള എല്ലാ സാധ്യതയും നിലവിലുണ്ട്.
മത ദേശീയ തീവ്ര വാദിയുടെ
കമാൻഡർ ദൈവം ആണ് എന്ന് അവൻ തെളിവുകൾ ഇല്ലാതെ വിശ്വസിക്കുന്നു അവന് പിന്നെ
ആരെ പേടിക്കണം!. അല്ലാഹുവിൻറ്റെയും, റാമിൻറ്റെയും, യഹോവയുടെയും പേരിൽ
നടക്കുന്ന പോർ വിളികൾ തമ്മിൽ എന്ത് വിത്യാസം?. എല്ലാം മനുഷ വർഗത്തിൻറ്റെ
അന്ത്യ കാഹളം.
ദൈവത്തിൻറ്റെ പേരിൽ അക്രമം അഴിച്ചുവിടുന്നവരുടെ
ക്രൂരതയുടെ ഉത്തരവാദിത്തം ഇന്നേവരെ ഒരു ദൈവവും മുന്നോട്ടുവന്നു
ഏറ്റെടുത്തിട്ടില്ല. അതുകൊണ്ടാണ് ഇ പിടികിട്ടാപുള്ളികളുടെ പേരിൽ ക്രൂരത
നിറഞ്ഞവർ ക്രൂരത പ്രവർത്തിക്കുന്നത്. ഇവർ എന്തോ വലിയ മഹത്തരമായ പ്രവർത്തി
ചെയ്യുന്നു എന്ന് അവർ കരുതുന്നു. അവർക്കു പരിശുദ്ധൻ, ഷെവലിയാർ
എന്നിങ്ങനെയുള്ള അർത്ഥ ശൂന്യമായ പദവികളും മതം കൊടുക്കും. മത ഭ്രാന്ത്
മൂക്കുമ്പോൾ അവർ ആക്രോശിക്കും '' എൻ്റെ മതത്തിൻറ്റെ വിശേഷ ദിവസങ്ങളിൽ
രാഷ്ട്രീയ പ്രചരണം പോലും പാടില്ല''. മറ്റു ചിലർ അലറും, 'ഞാൻ
ഭക്ഷിക്കുന്നത് നീയും ഭഷി ക്കണം, ഞാൻ കുനിയുമ്പോൾ നീയും കുനിയണം. അതാണ് മത
ദേശീയ തീവ്രവാദം.
മത ദേശീയവാദിക്ക് രാഷ്ട്ര നിയമങ്ങളെക്കാൾ
ഉപരിയാണ് മത വിശ്വാസം. അവിടെ ശരിയും തെറ്റും ഇല്ല ശരി മാത്രമേയുള്ളു,
അവരുടെ മത വിശ്വാസം മാത്രം ശരി. അവർ പൊതു നിയമങ്ങളെ കാറ്റിൽ പറത്തുന്നു,
എന്തും തോന്നിയതുപോലെ ചെയ്യുന്നു. അവർ മറ്റുള്ളവർക്കു നീതി നിഷേധിക്കുന്നു,
ആരുണ്ട് ചോദിക്കാൻ എന്ന ഭാവത്തിൽ. ഒരേ ലിംഗക്കാരുടെ വിവാഹം
നടത്തിക്കൊടുക്കാൻ വിസമ്മതിച്ച കെൻറ്റക്കികാരിയും ഇത് തന്നെയാണ് ചെയ്തത്.
രാഷ്ട നിയമങ്ങളെ പാലിക്കാൻ സമ്മതം ഇല്ലാത്തവർ അത്തരം ജോലിക്കു പോകരുത്.
എന്നാൽ മത ദേശീയ വാദത്തിൽ അങ്ങനെ ഒരു ഓപ്ഷൻ ഇല്ല.
പല കോടതികളും 61
തവണ വിധി നടത്തിയിട്ടും ഇലക്ഷൻ 'കൊള്ള ചെയ്യപ്പെട്ടു' എന്ന്
പ്രചരിപ്പിച്ചവർ മത ദേശീയ തീവ്രവാദികൾ ആണ്. കോടതി അവർക്ക് വെറും പുല്ല്.
അവസാന തുള്ളി രക്തം വീഴും വരെയും പൊരുതി മരിക്കുവാൻ അവർ തയ്യാർ ആയിരുന്നു.
'രക്തംകൊണ്ട് മുദ്ര ഇടപെട്ട ജനം ഒന്നിച്ചു കാഹളങ്ങൾ ഊതിടുമ്പോൾ ഭൂതലം
വിറക്കുമെ, സൈന്യത്തിൻറ്റെ നായകനായി യേശു രാജൻ [ ട്രംപ്] ഉള്ളതിനാൽ ജയം
ജയം നിശ്ചയം''.
വെകിളി പിടിച്ച വെളിപാടുകാരൻ ഇപ്രകാരം പ്രവചിച്ചു
എന്ന തെറ്റിദ്ധാരണയിൽ ആണ് ഇവർ ട്രംപിനെ വിശ്വസിച്ചത്. ''നിങ്ങൾ നേരെ
കാപ്പിറ്റലിലേക്കു പോകുക, ഞാനും നിങ്ങളുടെ കൂടെ ഉണ്ടാവും. നമ്മളിൽനിന്നും
മോഷ്ടിക്കപ്പെട്ട വിജയം ഏതു മാർഗം ഉപയോഗിച്ചും നമ്മൾ പിടിച്ചെടുക്കും''.
ഇതിൻ പ്രകാരം ആണ് അവർ കാപ്പിറ്റൽ അക്രമിച്ചതു. എന്നാൽ ട്രംപിന് വോട്ട്
ചെയ്തവർ എല്ലാം ഇത്തരം ക്രിസ്ത്യൻ തീവ്ര വാദികൾ അല്ല. വോട്ട് ചെയ്തവർ
റിപ്പപ്ലിക്കൻ സ്ഥാനാർഥിക്കു ആണ് വോട്ട് ചെയ്തത്. അവരിൽ നേരിയ ചെറു വിഭാഗം
മാത്രമേ ജനുവരി 6 ലെ റാലിയിൽ എത്തിയുള്ളു. അവരിൽ കുറേപ്പേർ മാത്രമേ
വേണ്ടിവന്നുള്ളൂ കാപ്പിറ്റൽ തകർക്കാൻ. ഏതാണ്ട് 200 പേരെ മാത്രമേ ഇപ്പോൾ
പിടികൂടിയിട്ടുള്ളു. എന്നാൽ ഇ ചെറിയ വിഭാഗം ആൾക്കാർ വെടിക്കോപ്പുകളും,
ആയുധങ്ങളും, ആൾക്കാരെ പിടിച്ചു കെട്ടുവാൻ ടൈ, തൂക്കുമരം ഒക്കെ
കരുതിയിരുന്നു. വൈസ് പ്രസിഡണ്ട്, ഹൗസ് സ്പീക്കർ, മറ്റു ഡമോക്രാറ്റുകൾ ഇവരെ
കൊല്ലുവാൻ ആണ് അവർ വന്നത്. വധിക്കേണ്ടവരുടെ ലിസ്റ്റും അവരുടെ കൈയിൽ
ഉണ്ടായിരുന്നു. അവരുടെ സംരംഭം വിജയിച്ചിരുന്നു എങ്കിൽ ട്രംപ് ഏകാധിപതിയായി
ഭരണം പിടിച്ചെടുക്കുമായിരുന്നു. ട്രംപിനെ നീക്കം ചെയ്തു മിലിട്ടറി ഭരണം
ഏറ്റെടുക്കുമായിരുന്നോ?. രണ്ടും ക്രിസ്ത്യൻ തീവ്വ്രവാദികളുടെ പോളിസിയാണ്.
ശേഷമുള്ള ദുരന്തം നിങ്ങൾ തന്നെ ചിന്തിക്കുക.
ട്രമ്പിൻറ്റെ
ഏകാധിപത്യ ഭ്രാന്തിൽ നിയമം നടപ്പാക്കുന്നത് വെള്ളക്കാരായ തീവ്ര വാദികൾ ആണ്.
ട്രമ്പിൻറ്റെ ആർമി എന്നതുപോലെ അവർ വളരെക്കാലം മുൻപുതന്നെ ഭരണം
പിടിച്ചെടുക്കാൻ തയ്യാർ ആയിരുന്നു. യേശുവിൻറ്റെ രാജ്യം പുനർസ്ഥാപിക്കാൻ അവർ
എന്ത് ചെയ്യുവാനും തയ്യാർ ആയിരുന്നു. കാപ്പിറ്റൽ അക്രമിച്ചവരിൽ മുൻ
മിലിട്ടറിക്കാർ, പോലീസുകാർ ഒക്കെ ഉണ്ടായിരുന്നു. വെള്ളക്കാർ അല്ലാത്തവരെ
കൊന്നൊടുക്കി യേശുവിൻറ്റെ രാജ്യം വീണ്ടെടുക്കാൻ ആണ് അവർ വന്നത്.
ഇത്തരക്കാരുടെ പ്രചോദനവും വെളിവ് ഇല്ലാത്ത വെളിപാടുകാരൻ തന്നെ.
കുഞ്ഞാടിൻറ്റെ രക്തത്തിൽ ശുദ്ധം ആക്കപ്പെട്ട വെള്ള നിലയങ്കി ധരിച്ച,
സ്ത്രീകളാൽ മലിനീകരിക്കപ്പെടാത്ത പുരുഷൻമ്മാർ ഇവരാണ്. ഇത് മറ്റാർക്കും
ചോദ്യം ചെയ്യുവാൻ അവകാശമോ അധികാരമോ ഇല്ലാത്ത പ്രത്യേക പടയാളികൾ. ഇവരാണ്
കാപ്പിറ്റൽ ആക്രമിച്ച ക്രിസ്ത്യൻ ദേശീയ വാദികൾ. ഇവർ രാജ്യത്തിന്
അപകടകാരികളോ?. ക്രിസ്ത്യൻ ദേശീയ വാദികളെ ദേശ സ്നേഹികൾ എന്ന്
തെറ്റിദ്ധരിക്കരുത്. അമേരിക്കൻ ക്രിസ്ത്യൻ ദേശീയ വാദികൾ കാണിക്കുന്നത്
രാജ്യ സ്നേഹം ആണെന്ന് തെറ്റിദ്ധരിപ്പിക്കാൻ ആണ് തുടക്കം മുതൽ അവർ
ശ്രമിക്കുന്നത്. അതേ പ്രവണതയാണ് ഇന്ത്യയിലും ഹിന്ദു ദേശീയ വാദികൾ
ശ്രമിക്കുന്നത്. - ആൻഡ്രു
{രണ്ടാം ഭാഗത്തിൽ തുടരും}