കൊച്ചി: സംസ്ഥാനത്തെ തീയറ്ററുകള് ഉടന് തുറക്കേണ്ടെന്ന് ഫിലിം ചേംബര് യോഗത്തില് തീരുമാനം. സിനിമ മേഖലയ്ക്ക് സമഗ്രപാക്കേജ് നടപ്പാക്കണം. വിനോദ നികുതി ഒഴിവാക്കണം.
ഇതുസംബന്ധിച്ച് മുഖ്യമന്ത്രിക്ക് നല്കിയ നിവേദനത്തില് തീരുമാനം ഉണ്ടാകാതെ തിയറ്ററുകള് തുറക്കാനാകില്ല എന്നും ഫിലിം ചേംബര് ഭാരവാഹികള് വ്യക്തമാക്കി.
50 ശതമാനം കാഴ്ചക്കാരെ വച്ച് തീയറ്ററുകള് പ്രവര്ത്തിപ്പിക്കാന് കഴിയില്ലെന്ന് യോഗം വിലയിരുത്തി. തീയറ്ററുകള് തുറക്കാന് സര്ക്കാര് സഹായം ആവശ്യമാണെന്നും നിര്മാതാക്കളുടെയും വിതരണക്കാരുടെയും സംഘടന വ്യക്തമാക്കി.
ഇളവുകള് നല്കാത്തതില് കഴിഞ്ഞ ദിവസം മുഖ്യമന്ത്രിക്കെതിരെ ഫിലിം ചേമ്ബര് രംഗത്തെത്തിയിരുന്നു. ഉടമകളുടെ ആവശ്യങ്ങള് പരിഗണിക്കാമെന്ന് സര്ക്കാര് ഉറപ്പ് നല്കിയിരുന്നെന്നും എന്നാല് മുഖ്യമന്ത്രി വാക്ക് പാലിച്ചില്ലെന്നുമായിരുന്നു സംഘടനയുടെ കുറ്റപ്പെടുത്തല്.
അന്യഭാഷ ചിത്രങ്ങളുടെ റിലീസിനോട് അനുബന്ധിച്ചും തീയറ്ററുകള് തുറക്കില്ല. ചൊവ്വാഴ്ച മുതല് സംസ്ഥാനത്തെ തീയറ്ററുകള് തുറക്കാന് സര്ക്കാര് അനുമതി നല്കിയിരുന്നു.