ന്യൂഡല്‍ഹി: ജമ്മു കശ്​മീര്‍ പൊലീസ്​ തന്നെയും മകളെയും അനധികൃതമായി വീട്ടുതടങ്കലില്‍ വെച്ചിരിക്കുകയാണെന്ന്​ മുന്‍ മുഖ്യമന്ത്രിയും പി.ഡി.പി നേതാവുമായ മെഹബൂബ മുഫ്​തി. 

കഴിഞ്ഞദിവസം എന്‍.ഐ.എ അറസ്​റ്റ്​ ചെയ്​ത മുതിര്‍ന്ന പി.ഡി.പി നേതാവ്​ വഹീദ്​ പരയുടെ തെക്കന്‍ കശ്​മീരിലെ പുല്‍വാമയിലെ വീട്ടില്‍ ബന്ധുക്കളെ സന്ദര്‍ശിക്കാന്‍ അനുമതി നല്‍കിയില്ലെന്നും മെഹബൂബ മുഫ്​തി ട്വിറ്ററില്‍ കുറിച്ചു.

'എന്നെ വീണ്ടും അനധികൃതമായി തടഞ്ഞുവെച്ചു. കഴിഞ്ഞ രണ്ടുദിവസമായി ജമ്മു കശ്​മീര്‍ ഭരണകൂടം പുല്‍വാമയിലെ വഹീദ്​ പരയുടെ വീട്ടി​ല്‍ ബന്ധുക്കളെ സന്ദര്‍ശിക്കാന്‍ അനുമതി നല്‍കിയില്ല. ബി.ജെ.പി മ​ന്ത്രിമാര്‍ക്കും അവരുടെ പാവകള്‍ക്കും കശ്​മീരി​െന്‍റ എല്ലാ കോണിലും സന്ദര്‍ശിക്കാന്‍ അനുമതിയുണ്ട്​. എന്നാല്‍ എ​െന്‍റ കാര്യത്തില്‍ മ​ാത്രം സുരക്ഷ ഒരു പ്രശ്​നമാകുന്നു' -വെള്ളിയാഴ്​ച രാവിലെ മെഹബൂബ മുഫ്​തി ട്വീറ്റ്​ ചെയ്​തു.

മകള്‍ ഇല്‍തിജ മുഫ്​തിയെയും വീട്ടുതടങ്കലിലാക്കിയതായി മെഹബൂബ മുഫ്​തി പറഞ്ഞു. 'അവരുടെ ക്രൂരതക്ക്​ അതിരുകളില്ല. അടിസ്​ഥാന രഹിതമായ വകുപ്പുകളില്‍ ചുമത്തി വഹീദിനെ അറസ്​റ്റ്​ ചെയ്​തു. കുടുംബത്തെ ആശ്വസിപ്പിക്കാന്‍ പോലും അനുമതി നല്‍കിയില്ല.മെഹബൂബ മുഫ്​തി പറഞ്ഞു.