നിവാര്‍ ശക്തിയോടെ കരയിലേക്ക്; തമിഴ്‌നാട്ടില്‍ അതിശക്തമായ മഴ; ചെന്നൈയില്‍ വെള്ളപ്പൊക്കം

നിവാര്‍ ചുഴലിക്കാറ്റ് കരയിലേക്ക് കൂടുതല്‍ അടുക്കുന്നതോടെ തമിഴ്‌നാട്, പുതുച്ചേരി തീരങ്ങളില്‍ മഴ അതിശക്തമായി. തീരപ്രദേശത്ത് മണിക്കൂറില്‍ 130 കിലോമീറ്റര്‍ വേഗതയിലധികം കാറ്റ് വീശുമെന്നാണ് മുന്നറിയിപ്പ്. 

ജാഗ്രത കണക്കിലെടുത്ത് തമിഴ്‌നാട്ടിലെ 13 ജില്ലകളില്‍ നാളെയും പൊതു അവധി പ്രഖ്യാപിച്ചു. തമിഴ്‌നാട്ടില്‍ പൊതുഗതാഗതം സ്തംഭിച്ച നിലയിലാണ്. 

ചെന്നൈ നഗരത്തിന്റെ താഴ്ന്ന പ്രദേശങ്ങളിലെല്ലാം വെള്ളം കയറി. ചെന്നൈയില്‍ നിന്നുള്ള 27 ട്രെയിനുകള്‍ റദ്ദാക്കി. എറണാകുളം-കാരയ്ക്കല്‍ ട്രെയിന്‍ ട്രിച്ചിയില്‍ സര്‍വീസ് അവസാനിപ്പിക്കും. തിരുവനന്തപുരം-ചെന്നൈ മെയില്‍, ആലപ്പുഴ-ചെന്നൈ എക്‌സ്പ്രസുകള്‍ ഈറോഡ് സര്‍വീസ് അവസാനിപ്പിക്കും

ഇന്ന് വൈകുന്നേരത്തോടെ തമിഴ്‌നാട്ടില്‍ മഴ ശക്തമാകുമെന്നാണ് റിപ്പോര്‍ട്ടുകള്‍. 

നിവാര്‍ അതിതീവ്ര ചുഴലിക്കാറ്റായി മാറുമെന്നും മുന്നറിയിപ്പുണ്ട്. ദേശീയ ദുരന്തനിവാരണ സേനയുടെ വിവിധ ടീമുകള്‍ ചെന്നൈയില്‍ ക്യാമ്ബ് ചെയ്യുകയാണ്.

കനത്ത മഴയില്‍ ചെന്നൈ ചെമ്ബരപ്പാക്കം തടാകം നിറഞ്ഞു. ഏഴ് ഷട്ടറുകള്‍ തുറന്ന് വെള്ളം അഡയാറിലേക്ക് ഒഴുക്കുകയാണ്. 2015ന് സമാനമായ വെള്ളപ്പൊക്കം നഗരത്തെ വിഴുങ്ങുമോയെന്ന ഭീതിയിലാണ് പ്രദേശവാസികള്‍.