ന്യു യോർക്കിൽ ജനുവരി പത്താം തീയതിയും പതിനഞ്ചാം തീയതിയും രോഗവ്യാപനനിരക്ക് എട്ടോ ഒൻപതോ  പത്തോ ശതമാനം ആയി ഉയർന്നാലും താൻ ഞെട്ടില്ലെന്നാണ് കോമോ പത്രസമ്മേളനത്തിൽ പറഞ്ഞത്. ഏഴുമാസങ്ങൾക്ക് മുൻപത്തെ നിരക്കും  നിലവിലേതും  വച്ചുള്ള നിഗമനമാണ് അദ്ദേഹം വ്യക്തമാക്കിയത്. 

' നിരുത്തരവാദപരമായ സമീപനം നമ്മുടെ ഭാഗത്തുനിന്നുണ്ടായാൽ അത് വേഗം തന്നെ സംഭവിച്ചേക്കാം. അക്കങ്ങൾ മാറുന്നത് നമ്മൾ എന്ത് ചെയ്യുന്നു എന്നതിനെ ആശ്രയിച്ചായിരിക്കും.  അവധിക്കാലത്ത് ന്യൂയോർക്കിലുള്ളവരുടെ ഭാരം കൂടുമെന്നതുപോലെ കോവിഡ് നിരക്കും  കൂടുമെന്ന് ഞാൻ വിശ്വസിക്കുന്നു.  അവശേഷിക്കുന്ന ചോദ്യം, എത്രത്തോളം കൂടും, എത്ര വേഗം കൂടും എന്ന് മാത്രമാണ്. അതിന്റെ ഉത്തരം ആർക്കുമറിയില്ല. എനിക്ക് ആകെ കഴിയുന്നത് ജനങ്ങൾക്ക് മുന്നറിയിപ്പ് തരാൻ മാത്രമാണ്. ഓരോ ദിവസതിയും രോഗവ്യാപന തോതും അറിയിക്കാം. " കോമോ പ്രസ്താവിച്ചു.

താങ്ക്സ്ഗിവിങ്ങിന് ജനങ്ങൾ നടത്തുന്ന യാത്രകളുടെ  പ്രതിഫലനം കോറോണനിരക്കിൽ ഡിസംബർ ഒന്ന് മുതൽ പത്തുവരെയും ക്രിസ്മസ് ഷോപ്പിങ്ങിന്റേത്  ജനുവരി ഒന്നിനും പത്തിനും ഇടയിലും താൻ പ്രതീക്ഷിക്കുന്നു എന്നും കോമോ കൂട്ടിച്ചേർത്തു. പത്തിൽ കൂടുതൽ ആളുകൾ ഒത്തുകൂടുന്നത് അദ്ദേഹം മുൻപേ വിലക്കിയതാണ്.  താങ്ക്സ്ഗിവിങ്ങിന് യാത്രകൾ ഒഴിവാക്കാനും നിർദ്ദേശിച്ചിരുന്നു. 

ന്യൂ യോർക്ക് സിറ്റി മേയർ ബിൽ ഡി ബ്ലാസിയോയും ആഘോഷങ്ങൾ വീടുകളിൽ പരിമിതപ്പെടുത്താൻ ഉപദേശിച്ചിരുന്നു. 

"ഈ വർഷം  ഞാനെന്റെ പ്രിയപ്പെട്ട ചിലരുമായുള്ള ഒത്തുചേരൽ ഒഴിവാക്കുന്നത് അടുത്ത വർഷം  അവർക്കൊപ്പം ഉണ്ടാകണമെന്ന ആഗ്രഹം കൊണ്ടാണെന്നും പരസ്പരം സംരക്ഷിക്കാനുള്ള ശക്തി നമുക്കുണ്ടെന്നും മേയർ പറഞ്ഞു.

അപ്പർ മൻഹാട്ടൻ, സ്റ്റാറ്റൻ ഐലൻഡ്, ലോങ്ങ് ഐലൻഡ് തുടങ്ങിയ പ്രദേശങ്ങൾ നിയന്ത്രിത മേഖലകളാണെന്നും കോമോ മുന്നറിയിപ്പ് നൽകി. സ്റ്റാറ്റൻ ദ്വീപിൽ അവസ്ഥ ഗുരുതരമാണ്. ഏഴ് ദിവസങ്ങളിലെ രോഗവ്യാപന നിരക്കുകൾ നഗരത്തിലെ ഏറ്റവും ഉയർന്ന ശതമാനം  രേഖപ്പെടുത്തിയത് ഇവിടെയാണ്- 4.5 ശതമാനം. ആശുപത്രികളും രോഗികളെക്കൊണ്ട് നിറഞ്ഞിരിക്കുകയാണ്. 

യെല്ലോ സോണിൽപെട്ട പ്രദേശങ്ങളിൽ ഇരുപത്തിയഞ്ച് ആളുകൾക്കാണ് പരമാവധി ഒത്തുചേരാൻ അനുവാദമുള്ളത്. ഗവർണർ കഴിഞ്ഞ ആഴ്ച പ്രഖ്യാപിച്ച പത്തുപേരെന്നത് ഇരുപത്തിയഞ്ചായി ഉയർത്തിയിരിക്കുകയാണ്. ഈ സോണിലെ ആരാധനാലയങ്ങളിൽ 50 പേർക്ക് ഒത്തുചേരാം. 

ഓറഞ്ച് സോണുകളിൽ റെസ്റ്റോറന്റിലിരുന്ന് ഭക്ഷണം കഴിക്കാൻ അനുവാദമില്ല. ജിമ്മുകളും സലൂണുകളും പ്രവർത്തിക്കില്ല. പരമാവധി പത്തുപേർക്ക് ഒത്തുചേരാം. ആരാധനാലയങ്ങളിൽ സീറ്റിങ് പരിധിയുടെ 33 ശതമാനം വരെയാണ് അനുവദിച്ചിട്ടുള്ളത്.