വാഷിങ്ടൻ ഡിസി ∙ പൊതുതിരഞ്ഞെടുപ്പിൽ വ്യക്തമായ ഭൂരിപക്ഷത്തോടെ ബൈഡൻ–കമല ഹാരിസ് തിരഞ്ഞെടുക്കപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്യപ്പെട്ടിട്ടുണ്ടെങ്കിലും കൗണ്ടിങ്ങ് ഇപ്പോഴും പൂർത്തീകരിച്ചിട്ടില്ലാത്ത സാഹചര്യത്താൽ ഔദ്യോഗീകമായി പരാജയം അംഗീകരിക്കരുതെന്ന് ട്രംപ് വിശ്വസ്തർ. സൗത്ത് കാരലൈനിൽ നിന്നും വൻ ഭൂരിപക്ഷത്തോടെ തിരഞ്ഞെടുക്കപ്പെട്ട യുഎസ് സെനറ്ററും, റിപ്പബ്ലിക്കൻ നേതാവുമായ ലിൻഡ്സി ഗ്രഹാം, ടെക്സസിൽ നിന്നുള്ള യുഎസ് സെനറ്റർ ടെഡ് ക്രൂസ്, പ്രമുഖ ട്രംപ് ലോയർ റൂഡി ഗുലാനിയുമാണ് ട്രംപിന്റെ നിലപാടുകൾക്ക് ശക്തമായ പിന്തുണ നൽകി രംഗത്തെത്തിയിരിക്കുന്നത്.
മുഴുവൻ സംസ്ഥാനങ്ങളിലേയും പോൾ ചെയ്ത വോട്ടുകൾ എണ്ണിതിട്ടപ്പെടുത്തി സർട്ടിഫൈ ചെയ്യുമ്പോൾ മാത്രമേ തിരഞ്ഞെടുപ്പു പ്രക്രിയ പൂർത്തീകരിക്കപ്പെടുകയുള്ളൂവെന്നും, മാധ്യമങ്ങളല്ല വിജയം പ്രഖ്യാപിക്കേണ്ടതെന്നും ഇവർ പറയുന്നു. നവംബർ 8 ഞായറാഴ്ച സെനറ്റ് ജുഡിഷ്യറി കമ്മിറ്റി ചെയർമാൻ ലിൻഡ്സി ഗ്രഹാമൂം, ടെക്സസ് സെനറ്റർ ടെഡ് ക്രൂസും ട്വിറ്റർ സന്ദേശത്തിലാണ് ട്രംപിനനുകൂലമായി പ്രതികരിച്ചത്.
തിരഞ്ഞെടുപ്പിനെ കുറിച്ചു ട്രംപ് ഉന്നയിച്ച ആരോപണങ്ങൾ ഇന്നും ട്രംപ് ആവർത്തിച്ചു പരാജയം അംഗീകരിക്കുകയില്ലെന്നും പറഞ്ഞു. ഔദ്യോഗീകമായി വിജയിയെ പ്രഖ്യാപിക്കണമെങ്കിൽ ഇനിയും ആഴ്ചകൾ വേണ്ടി വരുമെന്നും ട്രംപ് പറഞ്ഞു.