ന്യൂഡല്ഹി: ജമ്മു കശ്മീര് ക്രിക്കറ്റ് അസോസിയേഷന് സാമ്ബത്തിക തട്ടിപ്പ് കേസില് മുന് മുഖ്യമന്ത്രി ഫറൂഖ് അബ്ദുള്ളയെ എന്ഫോഴ്സ്മെന്റ് ഡയറക്ടറേറ്റ് ചോദ്യംചെയ്തു. ജമ്മുകശ്മീര് ക്രിക്കറ്റ് അസോസിയേഷന്െറ ഫണ്ട് വിനിയോഗവുമായി ബന്ധപ്പെട്ട കള്ളപ്പണം വെളുപ്പിക്കല് കേസിലാണ് ഫറൂഖ് അബ്ദുള്ളയെ വീണ്ട ചോദ്യംചെയ്യുന്നത്.
ജമ്മു കശ്മീര് ക്രിക്കറ്റ് അസോസിയേഷന് ചെയര്മാനായിരുന്ന ഫാറൂഖ് അബ്ദുല്ല 43 കോടി രൂപ ദുരുപയോഗം ചെയ്തുവെന്ന ആരോപണത്തില് ബാങ്ക് രേഖകളെ അടിസ്ഥാനമാക്കിയാണ് ചോദ്യം ചെയ്യല് നടക്കുന്നതെന്ന് ഇ.ഡി വൃത്തങ്ങള് അറിയിച്ചു.
ജമ്മു കശ്മീര് ക്രിക്കറ്റ് അസോസിയേഷന് അഴിമതി കേസില് ഫറൂഖ് അബ്ദുല്ലയെ 2019ലും ഇ.ഡി ചോദ്യം ചെയ്തിരുന്നു.
അടിസ്ഥാനസൗകര്യങ്ങള് വികസിപ്പിക്കുന്നതിന് ജമ്മു കശ്മീര് ക്രിക്കറ്റ് അസോസിയേഷന് 2002 മുതല് 2011 വരെ ബി.സി.സി.ഐ 113 കോടി രൂപ ഗ്രാന്റായി നല്കിയിരുന്നു. ഇതില് 43.69 കോടി രൂപ ദുരുപയോഗം ചെയ്തുവെന്ന കേസിലാണ് അന്വേഷണം നടക്കുന്നത്.
2015 ല് ജമ്മു കശ്മീര് ഹൈകോടതി സി.ബി.ഐക്ക് കേസ് കൈമാറുകയും 2018 ല് ഫറൂഖ് അബ്ദുള്ളയുടെയും മറ്റു മൂന്ന് ആളുകളുടെയും പേരില് സി.ബി.ഐ. കുറ്റപത്രം സമര്പ്പിക്കുകയും ചെയ്തിരുന്നു.
ക്രിക്കറ്റ് അസോസിയേഷന് മുന് പ്രസിഡന്റ് ഫറൂഖ് അബ്ദുള്ള, മുന് ജനറല് സെക്രട്ടറി എം.ഡി. സലിം ഖാന്, ട്രഷറര് അഹ്സന് അഹമ്മദ് മിര്സ, എക്സിക്യൂട്ടീവ് കമ്മിറ്റി അംഗം ബഷീര് അഹമ്മദ് മിസഖര് എന്നിവര്ക്കെതിരെയായിരുന്നു സി.ബി.ഐ കേസ്. ഇതിന്െറ ഭാഗമായുള്ള കള്ളപ്പണം വെളുപ്പിക്കല് കേസാണ് എന്ഫോഴ്സ്മെന്റ് ഡയറക്ടറേറ്റ് അന്വേഷിക്കുന്നത്.