വാഷിംഗ്ടണ്, ഡി.സി: വിമാനത്തില് തന്നോടൊപ്പം ഉണ്ടായിരുന്ന കമ്യൂണിക്കേഷന്സ് ഡയറക്ടര് ലിസ് അല്ലന്, മറ്റൊരു സ്റ്റാഫ് അംഗം എന്നിവര്ക്ക് കോവിഡ് ബാധിച്ച പശ്ചാത്തലത്തില് വൈസ് പ്രസിഡന്റ് സ്ഥാനാര്ഥി കമലാ ഹാരിസ് ഈ വാരാന്ത്യത്തിലെ പൊതുപരിപാടികള് റദ്ദാക്കി.
ഇരുവരും ഹാരിസിന്റെ അടുത്ത് എത്തിയിരുന്നില്ല എന്ന് ഡമോക്രാറ്റിക് പാര്ട്ടി വക്താക്കള് പറഞ്ഞു. എങ്കിലും മുന് കരുതല് എന്ന നിലയിലും തങ്ങളുടെ രാഷ്ട്രീയ നിലപാടിനനുസരിച്ചുമാണിതെന്ന് അവര് വ്യക്തമാക്കി.
ഹാരിസ് ഇന്നലെയും (ബുധന്) കോവിഡ് ടെസ്റ്റ് നടത്തി. ഫലം നെഗറ്റിവ്.
കൊറോണ കേസുകൾ കൂടുന്നു
ഇതെ സമയം യു എസിൽ കൊറോണ കേസുകൾ വീണ്ടും ഉയരുകയാണ്. മധ്യപശ്ചിമ സംസ്ഥാനങ്ങളിൽ വേഗത്തിൽ കണ്ടുവരുന്ന രോഗവ്യാപനം ജനങ്ങളിൽ ഭീതി പരത്തുന്നു. ശൈത്യകാലം അരികിൽ നിൽക്കേ രോഗബാധയുടെ പുതുതരംഗത്തിന്റെ ആരംഭസൂചനയാണോ ഇതെന്ന ആശങ്ക മുറുകുന്നു. ഏകദേശം ഒരുമാസമായി യു എസിൽ കൊറോണ കേസുകളിൽ തുടർച്ചയായി വർദ്ധനവാണ് കാണുന്നത്.
തിങ്കളാഴ്ച പതിനേഴ് സംസ്ഥാനങ്ങൾ രോഗബാധിതരുടെ എണ്ണത്തിലുള്ള ഏഴുദിവസത്തെ ശരാശരി പരിശോധിച്ചപ്പോൾ ഉയർന്ന കണക്ക് രേഖപ്പെടുത്തി. ചൊവ്വാഴ്ച ഉച്ചയോടെ ഇതിൽ എട്ടു സംസ്ഥാനങ്ങളിൽ രോഗബാധിതരുടെ എണ്ണത്തിൽ റെക്കോർഡ് വർദ്ധനവുണ്ടായി.
വരണ്ട പ്രദേശങ്ങളിൽ താരതമ്യേന വൈറസിന് നിലനിൽപ്പ് കുറവാണെന്ന അറിവിന്റെ പശ്ചാത്തലത്തിൽ, വരാനിരിക്കുന്ന ശൈത്യത്തിൻ്റെ നാളുകളിൽ രോഗബാധിതർ ഇനിയും പെരുകുമോ എന്നും ചിന്തിക്കേണ്ടിയിരിക്കുന്നു. ഹാലോവീൻ, താങ്ക്സ്ഗിവിങ്, ക്രിസ്മസ് എന്നിങ്ങനെ ആഘോഷങ്ങളുടെയും ഒത്തുചേരലിന്റെയും ദിവസങ്ങളും പടിവാതിലിൽ നിൽക്കുന്നത് അമേരിക്കയിൽ കോവിഡ് വ്യാപനം ഉയർത്തിയേക്കാം.
സമീപകാലത്തുണ്ടായ വർദ്ധനവിന്റെ യഥാർത്ഥ കാരണം ഇനിയും കണ്ടെത്താനായിട്ടില്ല. സ്കൂളുകളും ബിസിനസുമെല്ലാം പുനരാരംഭിച്ചതാണോ കാരണമെന്ന് വ്യക്തമല്ല. സാമൂഹിക അകലം പാലിക്കാൻ ജനങ്ങൾ ശ്രദ്ധിക്കാത്തതാണ് രാജ്യത്തെ വലിയൊരു വെല്ലുവിളി. ദിവസവും രോഗബാധിതരുടെ എണ്ണത്തിൽ ഏറ്റക്കുറച്ചിലുകൾ ഉണ്ടാകുന്നതുകൊണ്ട് ഏഴ് ദിവസത്തെ ശരാശരി നോക്കിയാണ് വിദഗ്ദ്ധർ രോഗവ്യാപനത്തിന്റെ ഗതി വിലയിരുത്തുന്നത്.
മുൻ ആഴ്ചയുമായി നോക്കുമ്പോൾ, നാല്പത് സംസ്ഥാനങ്ങളിലാണ് രോഗബാധിതരുടെ എണ്ണത്തിൽ വർദ്ധനവ് കണ്ടത്. മധ്യ പശ്ചിമ സംസ്ഥാനങ്ങളിൽ കൂടുതലും ഐ സി യു കിടക്കകളോ മറ്റു സജ്ജീകരണങ്ങളോ ഇല്ലാത്ത ആശുപത്രികളാണുള്ളത്. അത്തരം പ്രദേശങ്ങളിൽ രോഗം പടർന്നുപിടിച്ചാൽ നിയന്ത്രിക്കാൻ സൗകര്യങ്ങൾ പര്യാപ്തമല്ല.
' ഈ വൈറസ് തന്ത്രശാലിയാണ്. എപ്പോൾ എന്തുചെയ്യുമെന്ന് അതിന് മാത്രമേ അറിയൂ. രോഗം ശമിച്ചെന്ന് നമ്മൾ വിചാരിക്കുന്ന നേരത്ത് , നില കൂടുതൽ വഷളായേക്കും. ഒഹയോ ഗവർണർ മൈക്ക് ഡിവൈൻ ട്വീറ്റ് ചെയ്തു. മാസ്ക് ധരിക്കുന്നതും സാമൂഹിക അകലം പാലിക്കുന്നതും ശുചിത്വം ഉറപ്പാക്കുന്നതും പോലുള്ള ചെറിയ ശ്രദ്ധ ജനങ്ങളുടെ ഭാഗത്തുനിന്നുണ്ടായാൽ അത് വലിയ മാറ്റം കൊണ്ടുവരുമെന്നാണ് ആരോഗ്യ വിദഗ്ദ്ധർ ഇപ്പോഴും പറയുന്നത്.