ഡാലസ്സ് ശ്രീ ഗുരുവായൂരപ്പന്‍ ക്ഷേത്രം- ഹോമാഗ്‌നിയില്‍ ഉണ്ണികൃഷ്ണന്റെ രൂപം
തീയോട് നമ്മെള്‍ക്കെല്ലാം എപ്പോഴും ഭയമാണ് . 5200 ഡിഗ്രി സെല്‍ഷ്യസില്‍ തിളച്ച് മറിയുന്ന അഗ്‌നിഗോളത്തിന് മുകളിലാണ് നമ്മള്‍ എല്ലാവരും ജീവിക്കുന്നത് എന്ന സത്യം നമ്മള്‍ വിസ്മരിക്കുന്നു. ഭൂമിയുടെ പുറം തോട് ആ അഗ്‌നിയെ ഉള്‍വലയത്തിലാക്കി നമുക്ക് പാര്‍ക്കാന്‍ പാകത്തില്‍ ഉപരിതലം രൂപപെടുത്തിയിരിക്കുന്നു. ഭൂമിയുടെ ഉപരിതല ത്തിന്റെ 71 ശതമാനം ജലമാണ്. മനുഷ്യ ശരീരത്തിലാകട്ടെ 60 ശതമാനവും വെള്ളമാണ്. എന്നിരുന്നാലും 37 ഡിഗ്രി സെല്‍ഷ്യസില്‍ താപം ശരീരത്തിനുണ്ടാകുന്നു. ജ്വലനം എന്ന പ്രക്രിയ ഭൂമിക്കുള്ളില്‍ സംഭവിക്കുന്നത് പോലെ തന്നെ മനുഷ്യ ശരീരത്തി നുള്ളിലും നടക്കുന്നു.
പ്രപഞ്ചത്തിലെ ഏറ്റവും ശുദ്ധമായ വസ്തു അഗ്‌നി ആകുന്നു. അതിലേക്ക് ഹോമിക്കുന്ന എല്ലാ പദാര്‍ത്ഥങ്ങളെയും വെണ്ണീറാക്കുവാനുള്ള കഴിവ് അഗ്‌നി ക്കുണ്ട്. ഋഗ്വേദത്തില്‍ ദേവന്മാരില്‍ ഒരാളായ അഗ്‌നിയാണ് മറ്റുള്ള ദേവന്മാര്‍ക്ക് വേണ്ടി ഹവിസ് സ്വീകരിക്കുന്നത് . അഗ്‌നിയില്‍ അര്‍പ്പിക്കപെടുന്ന വസ്തുക്കളെ ഈശ്വരനില്‍ എത്തിക്കുന്ന ദൂതനാണ് അഗ്‌നി. പ്രകൃതിയിലെ സൂക്ഷ്മ ശക്തികളെ മനുഷ്യനനുകൂലമായി മാറ്റുന്നതിനും, ശരീരമനോബുദ്ധികളുടെ വികാസത്തിനും വേണ്ടിയാണ് യജ്ഞo ചെയ്യുന്നത് .
ഹോമം ചെയ്യമ്പോള്‍ ജ്വലിക്കുന്ന അഗ്‌നിയുടെ നിമിത്ത സൂചനകള്‍ ഇവയൊക്കെ ആകുന്നു.
സ്വര്‍ണത്തിന്റെയോ ഉദയസൂര്യന്റെയോ നിറമുള്ള അഗ്‌നിയാണ് അതിശോഭനം. മുല്ലപ്പൂവിന്റെ നിറമുള്ള പുക ശുഭകരവും, കറുത്തതോ, കറുപ്പുകലര്‍ന്നതോ ആയ പുക ഹാനികരവുമാണ് . അഗ്‌നിജ്വാല കിഴക്കായി ചരിഞ്ഞാല്‍ അഭീഷ്ടസിദ്ധിയും, തെക്കോട്ടാണെങ്കില്‍ മരണവും, പടിഞ്ഞാറോട്ടാണെങ്കില്‍ ശാന്തിയും, വടക്കോട്ടാണെങ്കില്‍ മൃത്യുഞ്ജയവും, നേര്‍മുകളിലേക്കാണെങ്കില്‍ എത്രയും വേഗം അഭീഷ്ടസിദ്ധിയും ഫലം.
അമേരിക്കയിലെ ഡാലസ്സ് ശ്രീ ഗുരുവായൂരപ്പന്‍ ക്ഷേത്രത്തില്‍ സെപ്റ്റമ്പര്‍ മാസം 12 ന് ഒരു ഹോമം നടന്നു. ഭര്‍ത്താവിന്റെ അറുപതാം പിറന്നാളിന്, ദീര്‍ഘായുസ്സിനായി ഭാര്യ നേര്‍ന്നതായിരുന്നു ഈ ഹോമം. ഹോമാഗ്‌നി ഉയരാന്‍ ആരംഭിച്ചപ്പോള്‍ അവര്‍ ക്ഷേത്ര ഭാരവാഹിയോടനുവാദം വാങ്ങി ഹോമത്തിന്റെ ചിത്രങ്ങള്‍ എടുത്തു. സെല്‍ ഫോണില്‍ പതിഞ്ഞ ചിത്രം കണ്ട് അത്ഭുത സ്തംഭരായി അവര്‍ അറിയിച്ചു. പുല്ലാങ്കുഴല്‍ ഊതിക്കൊണ്ടുനില്കുന്ന ഉണ്ണികൃഷ്ണന്റെ രൂപം ഹോമാഗ്‌നിയില്‍ തെളിഞ്ഞു നില്കുന്നു. ആനന്ദാശ്രുക്കള്‍ പൊഴിച്ചുകൊണ്ട് അവര്‍ പൂജാരിയെ അറിയിച്ചു, ''ഈ ക്ഷേത്രത്തിനുള്ളില്‍ കൃഷ്ണചൈതന്യം നിറഞ്ഞു നില്കുന്നു, അങ്ങ് ഗുരുവായൂരപ്പന്‍ തന്നെ', പക്ഷെ സര്‍വ്വം ഖല്‍വിതം ബ്രഹ്മം എന്നറിയുന്ന പൂജാരി, 'നമ്മളെല്ലാവരും ഗുരുവായൂരപ്പന്‍ തന്നെയാകുന്നു', എന്ന് മറുപടിപറഞ്ഞു.
വാനില്‍ പഞ്ഞികെട്ടുകള്‍ പോലെ മന്ദം മന്ദം നീങ്ങുന്ന മേഘങ്ങളില്‍ പലരൂപങ്ങള്‍ കണ്ടിട്ടുണ്ട്. നിശയുടെ നിതാന്തതയില്‍ കണ്ണുമിന്നി, കണ്ണുമിന്നി, നില്‍ക്കുന്ന നക്ഷത്ര കൂട്ടങ്ങളെ ചേര്‍ത്തുവരച്ചാലും വ്യത്യസ്ത രൂപങ്ങള്‍ കാണാന്‍ സാധിക്കും. ഇതെല്ലാം തികച്ചും യാദൃഛികം! ഇതേപോലെ, അഗ്‌നിജ്വാല പുല്ലാങ്കുഴല്‍ ഊതിക്കൊണ്ട് നില്‍ക്കുന്ന ഉണ്ണിക്കണ്ണന്റെ രൂപമെടുത്തതും തികച്ചും യാദൃഛികമായിരിക്കാം.
ക്ഷേത്രത്തില്‍ ഹോമത്തിനെത്തിയ ഈശ്വര വിശ്വാസികളെ പരിചയപെട്ടു. പിറന്നാള്‍ ആഘോഷിക്കുന്ന 60 വയസ്സുകാരന്റെ നാമം കൃഷ്ണന്‍. അദ്ദേഹം ജനിച്ചത് അഷ്ടമി രോഹിണി ദിവസം, ശ്രീകൃഷ്ണന്‍ ജനിച്ച അതേ സമയത്ത്, ഹോമം നടക്കുന്ന സമയത്ത് ഹോമകുണ്ഡത്തിന് മുന്നിലിരുന്ന് അദ്ദേഹത്തിന്റെ പത്‌നി വായിച്ചുകൊണ്ടിരുന്നത് നാരായണീയം. അനേക വര്‍ഷങ്ങളായി എല്ലാദിവസവും തുടര്‍ച്ചയായി നാരായണീയ പാരായണം ഈ മഹതി ചെയ്തുകൊണ്ടിരിക്കുന്നു.
കോടാനുകോടി നക്ഷത്രങ്ങളുള്ള ഈ പ്രപഞ്ചത്തില്‍ ഭൂമിയെ പോലെയുള്ള ഒരു ഗ്രഹം രൂപപെടാനും, അവിടെ ജീവന്‍ ആവിര്‍ഭവിച്ച്, ചിന്താ ശേഷിയുള്ള ജീവികള്‍ ഉണ്ടാകുവാനുള്ള സാധ്യതയും തികച്ചും യാദൃഛികം. അങ്ങനെയുള്ള യാദൃഛികം, യാഥാര്‍ത്ഥ്യമായി, അനുഭവവേദ്യമായിരിക്കുന്നതു കൊണ്ട് അഗ്‌നിജ്വാലയില്‍ ഭഗവാന്‍ പ്രത്യക്ഷ പെട്ടു എന്ന് വിശ്വസിക്കാനേ സാധിക്കുന്നുള്ളൂ. പ്രത്യേകിച്ച്, ഈ ഹോമം നടന്നത്, ഭാരതത്തിലുടനീളമുള്ള 108 ല്‍ പരം ക്ഷേത്രങ്ങളിലെ പൂജാദി കര്‍മ്മങ്ങള്‍ ഏറ്റുവാങ്ങി ഡാലസ്സില്‍
എത്തിച്ചേര്‍ന്ന പുല്ലാങ്കുഴല്‍ പിടിച്ചു നില്‍ക്കുന്ന ഉണികൃഷ്ണ വിഗ്രഹത്തിന്റെ തൊട്ടു മുന്നിലാകുമ്പോള്‍.
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala