കോണ്ഗ്രസ് നേതാക്കളായ രാഹുല് ഗാന്ധിയും പ്രിയങ്കാ ഗാന്ധിയും യുപി പൊലീസിന്റെ കസ്റ്റഡിയില്. ഹാത്രസില് ക്രൂര ബലാത്സംഗത്തിനിരയായി കൊല്ലപ്പെട്ട ദളിത് യുവതിയുടെ കുടുംബത്തെ സന്ദര്ശിക്കാനുള്ള രാഹുല് ഗാന്ധിയുടേയും പ്രിയങ്കാ ഗാന്ധിയുടേയും യാത്രയ്ക്കിടെയാണ് യുപി പൊലീസ് നടപടി.
ഹഥ്റസില് ബലാത്സംഗത്തിനിരയായി കൊല്ലപ്പെട്ട ദളിത് പെണ്കുട്ടിയുടെ വീട്ടിലേക്ക് പുറപ്പെട്ട കോണ്ഗ്രസ് എംപി രാഹുല് ഗാന്ധിയുടെയും പ്രിയങ്കാ ഗാന്ധിയുടെയും വാഹനം ദില്ലി - യുപി അതിര്ത്തിയില് പൊലീസ് തടഞ്ഞതോടെ നാടകീയ സംഭവങ്ങള് അരങ്ങേറുകയാണ്.
ദില്ലിയിലെ ഡിഎന്ഡി ഫ്ലൈ ഓവറില് നിന്ന് യമുന എക്സ്പ്രസ് വേയിലേക്ക് എത്തിയപ്പോഴേക്ക് രാഹുലിന്റെയും പ്രിയങ്കയുടെയും വാഹനം ഉത്തര്പ്രദേശ് പൊലീസ് എത്തി തടഞ്ഞു. ഇരുവരെയും അല്പദൂരം നടന്നപ്പോഴേക്ക് പൊലീസ് കരുതല് കസ്റ്റഡിയിലെടുത്തു.
കരുതല് കസ്റ്റഡിയാണെന്ന് യുപി പൊലീസ് പ്രതികരിച്ചു. ഹാത്രസില് നിന്നും 142 അകലെ ഗ്രേറ്റര് നോയിഡയില് വെച്ചാണ് കോണ്ഗ്രസ് നേതാക്കളുടെ വാഹനങ്ങള് തടഞ്ഞിട്ടത്. ഇതോടെ യുപി മുഖ്യമന്ത്രി യോഗി ആദിത്യനാഥിനെതിരെ മുദ്രാവാക്യങ്ങള് മുഴക്കി ഇരുവരും രുവരും പ്രവര്ത്തകര്ക്ക് ഇടയിലേക്കിറങ്ങി. പൊലീസ് തന്നെ തള്ളിയെന്നും ലാത്തിയ്ക്കടിച്ചെന്നും രാഹുല് ഗാന്ധി പറഞ്ഞു.
തടഞ്ഞാലും യാത്രയില് നിന്ന് പിന്നോട്ടില്ലെന്ന് പറഞ്ഞ് രാഹുലും പ്രിയങ്കയും വാഹനത്തില് നിന്ന് ഇറങ്ങി നടക്കാന് തുടങ്ങിയതോടെ പൊലീസ് വീണ്ടും എത്തി ഇവരെ തടഞ്ഞു. യമുന എക്സ്പ്രസ് വേയില് ഗ്രേറ്റര് നോയിഡയില് നിന്ന് ഹഥ്റസിലേക്ക് ഏതാണ്ട് 168 കിലോമീറ്റര് ദൂരമുണ്ട്. തുടര്ന്ന് രാഹുലും പൊലീസും തമ്മില് രൂക്ഷമായ വാദപ്രതിവാദമുണ്ടായി. പരസ്പരം ഉന്തും തള്ളും നടക്കുന്ന സ്ഥിതിയിലേക്ക് കാര്യങ്ങള് നീങ്ങി.
പൊലീസിനെ എതിരിടാന് തുടങ്ങിയ കോണ്ഗ്രസ് പ്രവര്ത്തകര്ക്ക് നേരെ പൊലീസ് ലാത്തി വീശി. പ്രദേശത്ത് വലിയ ഗതാഗതക്കുരുക്കാണ് അനുഭവപ്പെടുന്നത്.