കോവിഡ് മഹാമാരി വീശിയടിച്ച ഈ കാലത്തു ജീവിത ക്രമം അകെ താളം തെറ്റി ലോക ജനത വലയുമ്പോള്‍ , അതില്‍  ഏറ്റവും അധികം കഷ്ടപ്പെടുന്ന ഒരു വിഭാഗം ആണ് കലാകാരന്മാര്‍ , പ്രത്യേകിച്ച് സ്‌റ്റേജ് ആര്‍ട്ടിസ്റ്റുകള്‍ . ഉത്സവകാലങ്ങളും  ഓണക്കാലവും മറ്റും  സാധാരണ കലാകാരന്മാര്‍ക്ക്  അല്പം വരുമാനം ലഭിക്കുന്ന സീസണ്‍ ആണ് .എന്നാല്‍ അനന്തമായി നീളുന്ന കോവിഡ് താണ്ഡവം ഇവരുടെ സ്വപ്നങ്ങളെ തല്ലിക്കെടുത്തിക്കളഞ്ഞു . കേരളത്തില്‍ കഴിഞ്ഞ 8  മാസത്തില്‍ അധികമായി വേദികളും പ്രോഗ്രാമുകളും ഇല്ലാതെ പ്രൊഫെഷണല്‍ കലാകാരന്മാര്‍ കഷ്ടപ്പെടുകയാണ് . മറ്റൊരു തൊഴിലും വശമില്ലാത്ത ഇവരെ രോഗാവസ്ഥയും ഭീമമായ സാമ്പത്തിക ബധ്യതകളും വല്ലാതെ  അലട്ടുന്നു .  പലരും ഉപജീവനത്തിനായി  മല്‍സ്യകച്ചവടവും , ചായ കച്ചവടവും മറ്റും   തുടങ്ങിയിരിക്കുന്നു  . അതിനും കഴിയാത്തവര്‍ , മുണ്ടു മുറുക്കിയുടുത്തു മുഴു പട്ടിണിയില്‍ രോഗാവസ്ഥകളോട് മല്ലിടുന്നു . ഈ ഒരു അവസ്ഥയില്‍ ആണ് ന്യൂയോര്‍ക്കിലെ നാടക കൂട്ടായ്മയായ 'തിയേറ്റര്‍ ജി 'ഈ തിരുവോണനാളില്‍ അവശത അനുഭവിക്കുന്ന ചിലര്‍ക്കെങ്കിലും ഒരു കൈത്താങ്ങായത് . മലയാള നാടക പ്രസ്ഥാനത്തിന് പുതിയ മാര്‍ഗ്ഗദീപം തെളിയിച്ച  നാടക ആചാര്യനായ പ്രൊഫ .ജി .ശങ്കരപ്പിള്ള യുടെ നാമധേയത്തിലുള്ള സംഘടനയാണ് തിയേറ്റര്‍ ജി ന്യൂയോര്‍ക് .   8 വര്‍ഷമായി പ്രൊഫഷണല്‍ നാടകങ്ങള്‍ അവതരിപ്പിക്കുന്ന ഒരു  കൂട്ടായ്മയാണെകിലും ,കഴിഞ്ഞ വര്‍ഷമാണ് തിയേറ്റര്‍ ജി ന്യൂയോര്‍ക് എന്ന പേരില്‍ ഒരു സംഘടനാ സ്വഭാവം കൈവരിക്കുന്നത് . കഴിഞ്ഞ വര്‍ഷം  ഒക്ടോബറില്‍  ന്യൂയോര്‍ക്കില്‍

അവതരിപ്പിച്ച 'ഭാരതീയം ' എന്ന നാടകം കാണാന്‍  വന്ന കാണികള്‍ നല്‍കിയ സംഭാവനയാണ് ഈ ദുരിത കാലത്തില്‍ കേരളത്തിലെ അശരണരായ നാടക പ്രവര്‍ത്തകര്‍ക്ക്  ആശ്വാസമായത് .

 

 പക്ഷാഘാതം മൂലം സംസാരശേഷി നഷ്ടപ്പെട്ട്  വേദിയോട് വിട പറഞ്ഞു സ്വന്തമായി ഒരു വീട് പോലും ഇല്ലാതെ  ഇപ്പോള്‍ സഹോദരിയുടെ വീട്ടില്‍ തന്റെ ജീവിത സായാഹ്നം തള്ളി നീക്കുന്ന പ്രശസ്ത ഹാസ്യ നടന്‍  കാഞ്ഞിരപ്പുഴ ശശി , അമ്പത്തഞ്ചു വര്‍ഷത്തിലധികമായി പ്രൊഫെഷണല്‍ നാടക രംഗത്ത് സജീവ സാനിധ്യവും ,എണ്‍പത്തഞ്ചോളം നാടകങ്ങള്‍ സംവിധാനം ചെയ്യുകയും , മികച്ച സംവിധാനത്തിനും , നടനുമുള്ള സംസഥാന അവാര്‍ഡുകള്‍ നിരവധി തവണ കരസ്ഥമാക്കുകയും ചെയത്  ഇപ്പോള്‍ ഹൃദ്രോഗ ബാധിതനായി  ശ്രീ ചിത്രയില്‍ ചികിത്സയില്‍ കഴിയുന്ന കൊല്ലം കൂട്ടിക്കട സ്വദേശി കബീര്‍ദാസ് എന്നിവര്‍ക്ക് ചികിത്സ സഹായമാണ് തിയേറ്റര്‍ ജി എത്തിച്ചത് . 

കൂടാതെ  അവശത അനുഭവിക്കുന്ന നിരവധി നാടക കലാകാരന്മാര്‍ക്ക് ഈ ഓണക്കാലത്തു സഹായമെത്തിക്കാന്‍ തിയേറ്റര്‍ ജി ക്കു കഴിഞ്ഞു .

ഒരു കാലത്തു നൃത്ത നാടക വേദികളിലെ നിറ സാന്നിധ്യം  ആയിരുന്നു ചിത്ര എന്ന മുനീറ .. ഇപ്പോള്‍ കയ്യിലും കാലിലും കമ്പി ഇട്ടിരിക്കുന്നു. മാനസിക രോഗി ആയിരുന്ന ഭര്‍ത്താവു മരിച്ചു. രണ്ടു പെണ്‍കുട്ടികളാണ് ചിത്രക്ക് .

ഒരു വശം ശരീരം തളര്‍ന്നു കിടപ്പിലായി പോയ നൃത്ത അദ്ധ്യാപകന്‍ അനന്തപുരം സുരേഷ് ,

സ്വന്തമായി ഒരു കൂരപോലുമില്ലാതെ രണ്ടു കുട്ടികളില്‍ ഒരാള്‍ക്ക് ഉള്ള  കാന്‍സര്‍ രോഗവുമായി മല്ലിടുന്ന നൃത്ത നാടക നടി സ്‌റ്റെല്ല ജോണി

25 വര്‍ഷമായി പ്രൊഫഷണല്‍ നാടക രംഗത്ത് അഭിനയിച്ചുകൊണ്ടിരുന്ന , 2018 ഇല്‍ നാടക വണ്ടി അപകടത്തെ തുടര്‍ന്ന് നടുവിന് ക്ഷതം പറ്റി രംഗം വിട്ടൊഴിഞ്ഞ പ്രദീപ് നൂറനാട് ,

40 വര്‍ഷത്തിലധികമായി പ്രൊഫെഷണല്‍ നാടകത്തില്‍ സജീവമായിരുന്ന ഇപ്പോള്‍ ശരീരം തളര്‍ന്നു വീട്ടില്‍ വിശ്രമിക്കുന്ന  ഗ ജ അ ഇ  ഗൗതമന്‍ ,   രംഗ വേദിയുടെ കണക്കു കുറിക്കുന്നതിനിടയില്‍ ജീവിതത്തിന്റെ കണക്കുകള്‍ തെറ്റിപ്പോയ പ്രശസ്ത നൃത്ത നാടക സംവിധായകനും ഡബ്ബിങ്  ആര്‍ട്ടിസ്റ്റുമായ  കവടിയാര്‍ സുരേഷ് എന്നിവര്‍ അവരില്‍ ചിലര്‍ മാത്രം .

വീല്‍ ചെയറില്‍ ഇരുന്നു നാടകവും ,കരോക്കേ ഗാനമേളയും ഒക്കെ നടത്തുന്ന വികലാങ്കരായ  നൂറോളം കലാകാരന്മാര്‍ക്ക്  'തണല്‍' എന്ന അവരുടെ സംഘടനയോടൊപ്പം ചേര്‍ന്ന്   പലവ്യഞ്ജനങ്ങളും  പച്ചക്കറികളും അടങ്ങിയ ഓണക്കിറ്റ്  വിതരണം നടത്താനും  'തിയേറ്റര്‍ ജി' ക്കു കഴിഞ്ഞു .

നോര്‍ത്ത് അമേരിക്കയിലെ പ്രശസ്ത ഗായകനും , സംവിധായകനും ആയ ശബരിനാഥ് ആണ് തിയേറ്റര്‍ ജി യുടെ അമരക്കാരന്‍ .തന്നോടൊപ്പം  പ്രവര്‍ത്തിക്കുന്ന ഒരു പറ്റം കലാകാരന്മാരുടെയും , െ്രെടസ്‌റ്റേറ്റ് ഏരിയയിലെ   കല ആസ്വാദകരുടെയും , മനുഷ്യ സ്‌നേഹികളായ കുറെ  സുഹൃത്തുക്കളുടെയും  സന്മനസ്സു കൊണ്ടാണ് ഇത്രയും സഹായം എത്തിക്കാന്‍ കഴിഞ്ഞത് എന്ന് ശബരിനാഥ് പറഞ്ഞു . തിയേറ്റര്‍ ജി ന്യൂയോക്കിന്റെ ഉപദേശകസമിതി അംഗങ്ങള്‍ ആയ ശ്രീ പദ്മകുമാര്‍ നായര്‍ , അറ്റോര്‍ണി  വിനോദ് കെആര്‍കെ , ശ്രീ അജിത് കൊച്ചുകുടിയില്‍ എന്നിവര്‍ എല്ലാ വിധ മാര്‍ഗ നിര്‍ദേശങ്ങളും നല്‍കി  'തിയേറ്റര്‍ ജി' യുടെ  ഭാവി പരിപാടികളില്‍ ബദ്ധശ്രദ്ധ പതിപ്പിക്കുന്നു . സെന്റര്‍ ഓഫ് ലിവിങ് സാരഥി ഡോ. മധു പിള്ള യുടെ മേല്‍നോട്ടത്തില്‍ ആണ് ന്യൂയോര്‍ക്കില്‍  'ഭാരതീയം' നാടകം അരങ്ങേറിയത് .ടിക്കറ്റ് ഇല്ലാതെ നടത്തിയ പരിപാടിയില്‍ , നാടകം കഴിഞ്ഞു പിരിഞ്ഞു പോയ കാണികള്‍ മനസു നിറഞ്ഞു സമര്‍പ്പിച്ച   ദക്ഷിണയായാണ്   ഈ ഓണ നാളുകളില്‍ അവശത നിറഞ്ഞ കലാകാരന്മാരുടെ ജീവിതത്തില്‍ വെളിച്ചമായി മാറിയത് . ചാരിറ്റി പ്രവര്‍ത്തനങ്ങള്‍ ഏകോപിപ്പിച്ചത്   ന്യൂയോര്‍ക്കില്‍ വ്യവസായ പ്രമുഖനായ ശ്രീ  പദ്മകുമാര്‍ നായരും , കേരളത്തില്‍ ഉണ്ണി മാക്‌സും , കണ്ണന്‍ രവീസുമാണ് .