ഇനിയും നല്ലൊരു ഭാര്യയായ്ത്തീരുക (കവിത: മാര്‍ഗരറ്റ് ജോസഫ്)
മാര്‍ഗരറ്റ് ജോസഫ് Published on 15 September, 2020
നീതി പീഠത്തിന്‍ വിധി കേട്ട മാത്രയില്‍,
ആധിപെരുത്തവള്‍ പൊട്ടിക്കരഞ്ഞുപോയ്
പ്രായം പതിനാലിലെത്തിയ ബാലിക
മരിയ ഷഹാബാസ്സെന്ന ഹതഭാഗ്യ
ഇനിയും നല്ലൊരു ഭാര്യയായിത്തീരുക
ഇനിയും നല്ലൊരു ഭാര്യയായിത്തീരുക
വെള്ളിടി വെട്ടിയ മട്ടിലീ വാക്കുകള്‍,
ഉള്ളം നടുക്കിയക്കാതില്‍ പതിക്കവെ,
ആ പ്രതിക്കൂട്ടില്‍ പ്രതിമയ്ക്കു തുല്യമായ്,
പാക്കിസ്ഥാന്‍ പുത്രീ, നീ ശപ്തയെന്നോര്‍ത്തുവോ?
ക്രൂരനായ് തന്നെ കശക്കിയെറിഞ്ഞൊരു-
കാമപ്പിശാചിനോടൊത്തു ജീവിക്കുക;
ആയിരം പാമ്പുകളാഞ്ഞുകൊത്തുവാന്‍;
പാഞ്ഞടുക്കുന്നപോല്‍ പേടിച്ചരണ്ടവള്‍;
യാത്രികര്‍ക്കൊപ്പമ,ന്നാവഴിത്താരയില്‍;
വീട്ടിലേയ്ക്കാമോദമോടെ നടന്നവള്‍;
മൂര്‍ച്ചയേറും മതവൈരമാം വാളിനാല്‍-
പോര്‍വിളിച്ചെത്തിയവര്‍ക്കിരയായവള്‍;
ആലംബമറ്റവളാക്കിയ ദുഷ്ടത,
രാപ്പകലൊപ്പം കളിപ്പാട്ടമാക്കിയോള്‍;
മരണം മാടിവിളിക്കും കരങ്ങളാല്‍-
മുള്ളില്‍ പടര്‍പ്പില്‍ ഞെരിഞ്ഞമരുന്നവള്‍;
സ്‌നേഹപ്രപഞ്ചത്തില്‍ നിന്നു വേര്‍പെട്ടവള്‍,
ശോകസമുദ്രത്തില്‍ നീന്തിക്കുഴഞ്ഞവള്‍,
എന്തൊരു ദുര്‍ഗ്ഗതി, യമ്പേ ഭയങ്കരം!
അന്ധകാരാവൃതമായോ മനസ്സുകള്‍?
ക്രിസ്ത്യാനിയായിപ്പിറന്ന കുറ്റത്തിന്-
ഇസ്ലാമാബാദില്‍ നിയമം കഠിനമോ?
ജാതി ഭ്രാന്താളുന്ന തീപ്പന്തമാക്കിയ-
സ്ത്രീ ജീവിതങ്ങളനേകമെന്നോര്‍ക്കുക.
പേടമാന്‍കുഞ്ഞിന് പീഡകനായവന്‍,
പേടിപ്പെടുത്താതെ രക്ഷകനാകുമോ?
വേട്ടമൃഗത്തിന് വേദം വഴങ്ങുമോ-
അക്രമാസക്തനായ്ത്തീരുവനല്ലാതെ?
'മുഹമ്മദ് നകാഷ'യെന്ന വിവാഹിതന്‍
കോടതി കല്‍പിച്ച മാതൃകാ പുരുഷന്‍
നീതി നിലവിളിക്കുന്നോ നിരന്തരം
നാരി ദുരന്തമാകുന്നോ നിരന്തരം?
(വീട്ടിലേക്ക് വരുന്നവഴിതട്ടിക്കൊണ്ടുപോയി പീഡിപ്പിച്ച് ഒളിവിലാക്കിയ പതിനാലുകാരിയായ മകളെ വിട്ടുകിട്ടുവാന്‍ മാതാപിതാക്കള്‍ പാക്കിസ്ഥാന്‍
കോടതിയില്‍ സമര്‍പ്പിച്ച കേസ്സിന്റെ വിധിയെകുറിച്ചാണ് ഈ കവിത.)
Facebook Comments
Comments
benny kurian 2020-09-19 05:21:12
Touching............
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala