ന്യൂയോര്ക്ക്: വാഷിംഗ്ടണിലെ വൈറ്റ് ഹൗസിനു മുന്നിലെ പരവതാനിയില് പാറിപ്പറക്കുന്ന അമേരിക്കന് പതാകകളാല് അലംകൃതമായി അലങ്കരിച്ച വിശാല മനോഹരമായ വേദിയായിരുന്നു അമേരിക്കന് പ്രസിഡന്റ് ഡൊണാള്ഡ് ട്രംപിനു സ്വാനാര്ത്ഥിത്വ സ്വീകരണത്തിനു ഒരുക്കിയിരുന്നത്.
ട്രംപിന്റെ പ്രിയ പുത്രി അവാങ്ക ട്രംപ് ആയിരുന്നു പിതാവിനെ വേദിയിലേക്ക് സ്വാഗതമേകിയത്. ഒരു മകള് അറിഞ്ഞിട്ടുള്ള ഒരു സ്നേഹ പിതാവിനെ - ഒരു നേതാവിനെ അമേരിക്കന് ജനങ്ങള്ക്ക് പരിചയപ്പെടുത്തുകയായിരുന്നു. പിതാവിന്റെ മനസ് അറിഞ്ഞിട്ടുള്ള ആ മകളുടെ വാക്കുകളില് നിറഞ്ഞുനിന്നിരുന്നത് അമേരിക്കയുടെ സുരക്ഷയ്ക്കും, ജനങ്ങള്ക്കുംവേണ്ടി രാപകല് അക്ഷീണം പ്രയത്നിക്കുന്ന ഒരു പ്രസിഡന്റിനെക്കുറിച്ചായിരുന്നു.
ഡൊണാള്ഡ് ട്രംപ് വാഷിംഗ്ടണില് എത്തിയത് ഏക ഉദ്ദേശത്തോടെ ആയിരുന്നു. അമേരിക്കയെ സമ്പന്നമാക്കുക- അമേരിക്കന് ജനങ്ങളെ സുരക്ഷിതരാക്കുക- അവരുടെ ജീവിതം വിജയപ്രദമാക്കുക എന്ന ലക്ഷ്യം മാത്രമായിരുന്നു.
അമേരിക്കയിലെ അധ്വാനിക്കുന്ന ജനവിഭാഗങ്ങള്ക്കുവേണ്ടി, അവരുടെ പ്രശ്ന പരിഹാരങ്ങള്ക്കുവേണ്ടി, അവരുടെ ഭാവി സുരക്ഷിതമാക്കാന് ചെയ്തുകൊണ്ടിരിക്കുന്നവ അടുത്ത നാലു വര്ഷത്തേക്കുകൂടി ചെയ്തു പൂര്ത്തിയാക്കാമെന്ന് അസന്നിഗ്ധമായി പ്രസ്താവിച്ചു.
റിപ്പബ്ലിക്കന് പാര്ട്ടിയുടെ ഐക്യകണ്ഠ്യേന നോമിനേഷന് സ്വീകരിച്ചുകൊണ്ട് അമേരിക്കയെ ഉയര്ന്ന തലങ്ങളിലേക്ക് നയിക്കാനുള്ള രണ്ടാമൂഴമായുള്ള പ്രസിഡന്റ് പദവി സ്ഥാനാര്ത്ഥിത്വം ഡൊണാള്ഡ് ട്രംപ് സ്വീകരിക്കുന്നതായി പ്രഖ്യാപിച്ചപ്പോള് സന്നിഹിതരായിരുന്ന ആയിരക്കണക്കിനാളുകള് ആവേശഭരിതരായി "4 വര്ഷംകൂടി' എന്നുള്ള ശബ്ദമുഖരിത ആഹ്ലാദ പ്രഘോഷണം ഹര്ഷാരവത്തോടെ അലയടിച്ചുയര്ന്നു.
ജോ ബൈഡന്റെ വിജയം അമേരിക്കയെ വര്ഗ്ഗീയ വിവേചനത്തിലെത്തിക്കുമെന്നും ഇരുളടഞ്ഞ തകര്ച്ചയില് അമേരിക്കയെ ചെന്നെത്തിക്കുമെന്നും ട്രംപ് അനുസ്മരിച്ചു.
ജോ ബൈഡന് ഒരു നാമമാത്ര രാഷ്ട്രീയക്കാരനാണെന്നും, അദ്ദേഹം ഇടതു പാളയത്തില് തളയ്ക്കപ്പെട്ടു കഴിഞ്ഞുവെന്നും അവിടുന്ന രക്ഷപെടാന് കഴിയില്ലെന്നും ട്രംപ് തുടര്ന്നു പറഞ്ഞു.
47 വര്ഷത്തെ രാഷ്ട്രീയ ജീവിത പരാജയത്തിന്റെ പര്യായമാണ് ബൈഡന് എന്നും ട്രംപ് കൂട്ടിച്ചേര്ത്തു. അമേരിക്കയുടെ ഭാവി നിര്ണ്ണയിക്കുന്ന ചരിത്രപ്രധാനമായ തെരഞ്ഞെടുപ്പാണ് ഈവരുന്ന നവംബര് മൂന്നിനു നടക്കുക.
ട്രംപ് വിഭാവനം ചെയ്യുന്ന സുശക്തമായ പാതയില് അമേരിക്കയും അമേരിക്കന് ജനങ്ങളും സുരക്ഷിതരായിരിക്കുമെന്നും, ബൈഡന്റെ ഭാരണകാലം ഇതിനു വിപരീതമായിരിക്കുമെന്നും ട്രംപ് വ്യക്തമാക്കി.