ഹ്യുസ്റ്റണ്‍: ടെക്‌സസിലെ ഏറെ മലയാളികള്‍ അധിവസിക്കുന്ന ഫോര്‍ട്ട് ബെന്‍ഡ് കൗണ്ടിയുടെ തിരഞ്ഞെടുക്കപ്പെട്ട ഏറ്റവും ഉന്നത ഉദ്യോഗസ്ഥനായ കൗണ്ടി ജഡ്ജ് കെ പി ജോര്‍ജിനെതിരെ വംശീയാധിക്ഷേപം. തന്റെ ഫേസ് ബുക്കിലൂടെ അദ്ദേഹം തന്നെയാണ് ഈ വിവരം പുറത്തു വിട്ടത്. ഫലപ്രദമായ കോവിഡ് പ്രതിരോധത്തിനായി ജഡ്ജ് ജോര്‍ജ് എടുക്കുന്ന പല നല്ല തീരുമാനത്തിനും എതിരെ വംശീയമായി ആക്രമണം അഴിച്ചുവിട്ടുകൊണ്ടാണ് ഈ കൂട്ടര്‍ പ്രതിരോധിക്കുന്നതെന്നു ജഡ്ജ് തന്റെ ഫേസ്ബുക്ക് പോസ്റ്റില്‍ കുറിച്ചു.

മാതൃ രാജ്യമായ ഇന്ത്യയെയും കേരളത്തെയും അപമാനിച്ചും, സഭ്യമല്ലാത്ത വാക്കുകള്‍ ഉപയോഗിച്ചുമാണ് ആക്രമണം. താന്‍ എടുക്കുന്ന പല തീരുമാനങ്ങളും അമേരിക്കയുടെ സ്വാതന്ത്ര്യത്തെ നശിപ്പിക്കുമെന്നും, താന്‍ ഇവിടെ നിന്നും തിരികെ പോകണം എന്നും അവശ്യപ്പട്ടാണ് അവര്‍ ആക്രമിക്കുന്നത്- അദ്ദേഹം പറഞ്ഞു.

ഇതിനെതിരെ ഫെയ്‌സ്ബുക്കില്‍ അമേരിക്കയുടെ മഹത്വവും ഇമ്മിഗ്രന്റ്‌സിന്റെ സംഭാവനയും എടുത്തു കാട്ടി അദ്ദേഹം അര്‍ഹമായ മറുപടി നല്കി. ഒരു തീരുമാനവും താന്‍ ലാഘവടോടെ എടുക്കുന്നതല്ല. വിദഗ്ദരും ശാസ്ത്രഞ്ജരും നല്‍കുന്ന നിര്‍ദേശങ്ങള്‍ പഠിച്ചാണു ഓരോ തീരുമാനഠിലുമെത്തുന്നത്. പൊതു നന്മ മാതര്‍മെ തന്റെ മനസിലുള്ളു.

ഫേസ് ബുക്ക് പോസ്റ്റിന്റെ പൂര്‍ണരൂപം താഴെ.

2019 ജനുവരിയില്‍ ഫോര്‍ട്ട് ബെന്‍ഡ് കൗണ്ടിയിലെ ഏറ്റവും ഉന്നത ഉദ്യോഗസ്ഥനായി തിരഞ്ഞെടുക്കപ്പെട്ട് അധികാരമേറ്റ ശേഷം, അതിവേഗം വളരുന്നതും വൈവിധ്യപൂര്‍ണ്ണവുമായ നമ്മുടെ കമ്മ്യൂണിറ്റിക്കായി സര്‍ക്കാരിനെ കൂടുതല്‍ കാര്യക്ഷമവും ഫലപ്രദവുമായി വിനിയോഗിക്കുന്നതിനു ഞാനും എന്റെ ടീമും 24/7 പ്രവര്‍ത്തിച്ചിട്ടുണ്ട്.

നിങ്ങള്‍ക്കറിയാവുന്നതുപോലെ, ഞാന്‍ അമേരിക്കയില്‍ ജനിച്ചവനല്ല, പക്ഷെ കഴിയുന്നത്ര വേഗത്തില്‍ എനിക്ക് ഇവിടെ എത്തുവാന്‍ സാധിച്ചു. എന്റെ നാച്ചുറലൈസേഷന്‍ സര്‍ട്ടിഫിക്കറ്റ്, ഞാന്‍ ഹൃദയത്തോട് ചേര്‍ത്തു നിര്‍ത്തുന്ന ഒന്നാണ്. ഞാനും ഭാര്യയും ഫോര്‍ട്ട് ബെന്‍ഡില്‍ ഞങ്ങളുടെ മക്കളെ വളര്‍ത്തി. ഈ സമൂഹത്തിലെ ഒരു സന്നദ്ധപ്രവര്‍ത്തകനായും പൊതുസേവകനായും ഇരിക്കുന്നത് എന്റെ ജീവിതത്തിലെ ഏറ്റവും വലിയ സന്തോഷമായി ഞാന്‍ കരുതുന്നു. സ്വാതന്ത്ര്യവും അവസരവും തേടി ഈ തീരങ്ങളിലേക്ക് ഒഴുകിയെത്തിയ കുടിയേറ്റക്കാരായ നമ്മുടെ പിതാക്കന്മാര്‍ സങ്കല്‍പ്പിച്ചതുപോലെയുള്ള അമേരിക്കന്‍ സ്വപ്നം യാഥാര്‍ഥ്യമാക്കി ജീവിക്കുവാന്‍ എനിക്കും കുടുംബത്തിനും ഭാഗ്യം ലഭിച്ചു.

നിങ്ങളുടെ കൗണ്ടി ജഡ്ജ് എന്ന നിലയില്‍, കോവിഡ് പ്രതിസന്ധി നേരിടാന്‍ കഴിഞ്ഞ കുറച്ച് മാസങ്ങളായി എനിക്ക് പലവിധ തീരുമാനങ്ങള്‍ എടുക്കേണ്ടിവന്നു. ഈ തീരുമാനങ്ങള്‍ വെറും നിസ്സാരമായി എടുത്തതല്ലെന്നു എല്ലാവരും അറിയണമെന്ന് ഞാന്‍ ആഗ്രഹിക്കുന്നു: അവ പ്രശസ്തരായ മെഡിക്കല്‍ പ്രൊഫഷണല്‍സില്‍ നിന്നും കമ്മ്യൂണിറ്റി നേതാക്കളില്‍ നിന്നും കൗണ്ടിയിലെ താമസക്കാരില്‍ നിന്നുമുള്ള വിവരങ്ങള്‍ ഉപയോഗിച്ചു കൂടിയാലോചിച്ചെടുത്തതാണ്. എല്ലാ സാഹചര്യങ്ങളിലും, എന്റെ ക്രിസ്തീയ വിശ്വാസവുമാണ് നല്ല തീരുമാനമെടുക്കാന്‍ എനിക്ക് വഴികാട്ടുന്നത്: എന്റെ തീരുമാനങ്ങള്‍ ഫോര്‍ട്ട് ബെന്‍ഡ് കൗണ്ടി നിവാസികളെ സഹായിക്കുമോ എന്നതു മാത്രമാണ് എന്റെ മനസില്‍

എന്റെ തീരുമാനങ്ങളെ വിമര്‍ശിക്കുന്നത് അമേരിക്കക്കാര്‍ എന്ന നിലയില്‍ അവരുടെ അവകാശമാണ്. എന്നിരുന്നാലും, എനിക്കും കുടുംബത്തിനും സഹപ്രവര്‍ത്തകര്‍ക്കും എതിരെ വംശീയവും കുടിയേറ്റ വിരുദ്ധവുമായ മാലിന്യങ്ങള്‍ വലിച്ചെറിയുമ്പോള്‍ - അത് പരിധികള്‍ ലംഘിക്കപ്പെടുന്നു.

ഈ രാജ്യത്തെ എപ്പോഴും മികച്ചതാക്കുന്നത് ഇവിടെ ആര്‍ക്കും വന്ന് സ്വയപരിശ്രമത്താല്‍ എന്തെങ്കിലും ആയിത്തീരാം എന്നതാണ്. ഭീതിപ്പെടുത്തുന്ന ചില അഭിപ്രായങ്ങള്‍ ഓണ്‍ലൈനില്‍ വായിക്കുമ്പോള്‍ അവ വരുന്നത് വളരെ അടിസ്ഥാനരഹിതമായ അവരുടെ ഭീതിയില്‍ നിന്നാണെന്നു ഞാന്‍ മനസ്സിലാക്കുന്നു (ചെറിയ ഒരു സാമ്പിള്‍ ഇവിടെ നല്‍കുന്നു): കുടിയേറ്റക്കാര്‍ 'ജോലികള്‍ എല്ലാം സ്വന്തമാക്കുന്നു' 'അവര്‍ തദ്ദേശീയ അമേരിക്കക്കാരുടെ അവസരങ്ങള്‍ തട്ടിയെടുക്കുന്നു' തുടങ്ങിയ ഭീതി.

ഈ രാജ്യത്തെ ഭൂമിയിലെ ഏറ്റവും മഹത്തായ രാജ്യമാക്കി മാറ്റുന്ന മൂല്യങ്ങളോടും അവസരങ്ങളോടും ആഴവും അചഞ്ചലവുമായ വിശ്വാസത്തോടും അഭിനിവേശത്തോടെയുമാണ് ഞാന്‍ ഒരു അമേരിക്കക്കാരനായത് എന്ന് നിങ്ങള്‍ അറിയണമെന്ന് ഞാന്‍ ആഗ്രഹിക്കുന്നു. ജനാധിപത്യത്തിലും സ്വാതന്ത്ര്യത്തിലുമുള്ള ഈ മഹത്തായ പരീക്ഷണത്തിന് കഠിനാധ്വാനികളായ കുടിയേറ്റക്കാര്‍ അര്‍ത്ഥവത്തായ സംഭാവന നല്‍കുന്നു. സ്വാതന്ത്ര്യത്തിന്റെയും സമൃദ്ധിയുടെയും അവിശ്വസനീയമായ കാഴ്ചപ്പാട് സാക്ഷാത്കരിക്കാന്‍ ശ്രമിക്കുന്ന കുടിയേറ്റക്കാരുടെ നാടാണ് അമേരിക്ക.

ഒരു അമേരിക്കക്കാരനെന്ന നിലയില്‍, ഞാന്‍ നിങ്ങളോട് ചോദിക്കുകയാണ്, അടുത്ത തവണ ആരെങ്കിലും കുടിയേറ്റ വിരുദ്ധ അല്ലെങ്കില്‍ വംശീയ വിദ്വേഷമുള്ള അഭിപ്രായം പറയുന്നത് നിങ്ങള്‍ കേള്‍ക്കുമ്പോഴോ കാണുമ്പോഴോ പ്രതികരിക്കുക. നിങ്ങളുടെ അയല്‍ക്കാര്‍ക്കും സഹപ്രവര്‍ത്തകര്‍ക്കും കുട്ടികളുടെ സഹപാഠികള്‍ക്കുമായി നിലകൊള്ളുക. നമ്മുടെ രാജ്യത്തെ ഏറ്റവും വൈവിധ്യമാര്‍ന്ന കൗണ്ടി ഫോര്‍ട്ട് ബെന്‍ഡിനായി നില്‍ക്കുക. അങ്ങനെ ചെയ്യുമ്പോള്‍, നിങ്ങള്‍ ധൈര്യശാലികളുടെ ഭവനവും സ്വതന്ത്രത്തിന്റെ നാടുമായ മികച്ച അമേരിക്കയ്ക്കായി നിലകൊള്ളും.

നന്ദി, യുഎസ്എയെ ദൈവം അനുഗ്രഹിക്കട്ടെ.
കെ പി ജോര്‍ജ്, കൗണ്ടി ജഡ്ജ്'

കെ പി ജോര്‍ജിന്റെ ഫേസ് ബുക്ക് പോസ്റ്റിനു താഴെ അദ്ദേഹത്തെ അനുകൂലിച്ചുകൊണ്ട് നൂറുകണക്കിന് കമന്റുകളാണ് വരുന്നത്.