Image

നടി പാര്‍വതി തിരുവോത്തിനെതിരെ ഗുരുതര ആരോപണങ്ങള്‍ ഉന്നയിച്ച്‌ സംവിധായിക വിധു വിന്‍സന്റ്

Published on 06 July, 2020
നടി പാര്‍വതി തിരുവോത്തിനെതിരെ ഗുരുതര  ആരോപണങ്ങള്‍ ഉന്നയിച്ച്‌ സംവിധായിക വിധു വിന്‍സന്റ്

ഡബ്ല്യൂസിസിയില്‍ നിന്നും രാജിവച്ചതിന് പിന്നാലെ സംവിധായക വിധു വിന്‍സന്റിന്റെ തുറന്നു പറച്ചില്‍ വലിയ വിവാദമായി മാറിയിരിക്കുകയാണ്. സംഘടനയില്‍ നിന്നും തനിക്കുണ്ടായ അനുഭവങ്ങളാണ് വിധു തുറന്നു പറഞ്ഞിരിക്കുന്നത്. 


നടി പാര്‍വതി, തിരക്കഥാകൃത്ത് ദീദി ദാമോദരന്‍ തുടങ്ങിയവരുടെ പേരുകള്‍ എടുത്തു പറഞ്ഞായിരുന്നു വിധുവിന്റെ വെളിപ്പെടുത്തല്‍. ഫെയ്സ്ബുക്ക് പോസ്റ്റിലൂടെയാണ് വിധു പ്രതികരിച്ചത്. അതേസമയം, നടി പാര്‍വതിയില്‍ നിന്നുമുണ്ടായ അനുഭവവും വിധു തുറന്നെഴുതുന്നുണ്ട്.


വിധു സംവിധാനം ചെയ്ത ചിത്രമായിരുന്നു സ്റ്റാന്‍ഡ് അപ്പ്. ചിത്രത്തിനായി വിധു പാര്‍വതിയെയായിരുന്നു നേരത്തെ സമീപിച്ചിരുന്നത്. എന്നാല്‍ തന്റെ തിരക്കഥ നല്‍കി, ആറുമാസത്തോളം കാത്തിരുന്നിട്ടും പാര്‍വതിയില്‍ നിന്നും മറുപടിയൊന്നും ലഭിച്ചില്ലെന്ന് വിധു പറയുന്നു.


 ''പാര്‍വ്വതിയെ കാസ്റ്റ് ചെയ്താല്‍ കുറച്ചു കുടി വലിയ ക്യാന്‍വാസില്‍ ഈ സിനിമ നിര്‍മ്മിക്കാം എന്ന് ചിലര്‍ അറിയിച്ചു. ഇതേ തുടര്‍ന്ന് പാര്‍വതിയ്ക്ക് തിരക്കഥ നല്‍കി ആറു മാസത്തോളം കാത്തിരുന്നു. ഒരു സംസാരത്തില്‍ അഞ്ജലിയോട് ഈ കാര്യം പറയുകയും അഞ്ജലി അത് പാര്‍വതിയോട് ചോദിക്കുകയും ചെയ്യുകയുണ്ടായി'' വിധു പറയുന്നു.


അഞ്ജലിയുടെ നിര്‍ദ്ദേശ പ്രകാരം പാര്‍വതിയെ വീണ്ടും ബന്ധപ്പെട്ടപ്പോള്‍ ഉയരെയുടെ സെറ്റില്‍ വെച്ച്‌ കാണാം എന്ന് മറുപടി കിട്ടി. അതില്‍ പ്രകാരം പാര്‍വ്വതിയെ ഉയരെയുടെ സെറ്റില്‍ പോയി കണ്ടു.സ്ക്രിപ്റ്റ് വായിച്ചിട്ട് പറയാം എന്നായിരുന്നു പാര്‍വതിയുടെ മറുപടി. ''മാസങ്ങള്‍ കഴിഞ്ഞിട്ടും ചെയ്യാമെന്നോ പറ്റില്ലെന്നോ ഉള്ള മറുപടി ഉണ്ടായില്ല എന്ന് കണ്ടപ്പോള്‍ അത് ഉപേക്ഷിച്ചു.


 ഒരു "നോ" പറയാന്‍ പോലും പരിഗണിക്കപ്പെടേണ്ട ആളല്ല ഞാന്‍ എന്ന് മനസിലാക്കിയപ്പോളുണ്ടായ അപമാനം ഓര്‍ത്തെടുക്കാന്‍ വയ്യ. ആ സമയത്ത് കൂട്ടിപ്പിടിക്കാവുന്ന ആത്മവിശ്വാസം മുഴുവന്‍ സംഭരിച്ച്‌ മുന്നോട്ട് പോകാന്‍ തീരുമാനിക്കുകയും നിമിഷയേയും രജിഷയേയും സമീപിക്കുകയും ചെയ്തു'' വിധു പറയുന്നു.


ഉയരെ എന്ന സിനിമയില്‍ പാര്‍വ്വതി സിദ്ദിഖിനൊപ്പം അഭിനയിച്ചതിന്‍്റെ പേരില്‍ WCC അംഗങ്ങള്‍ക്കിടയില്‍ ആശയക്കുഴപ്പം ഉണ്ടായോ? അക്കാര്യത്തില്‍ പാര്‍വ്വതിയോട് WCC വിശദീകരണം ആവശ്യപ്പെട്ടോ? എന്റെ അറിവില്‍ ഇല്ലെന്നും വിധു പറഞ്ഞു. ദീദി ദാമോദരന്‍ തന്നോടുള്ള എതിര്‍പ്പ് പരസ്യമായി തന്നെ പ്രകടിപ്പിച്ചിട്ടുണ്ടെന്നും വിധു പറയുന്നു.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക