കോഴിക്കോട്: തൊഴില് നഷ്ടപ്പെട്ട് തിരിച്ചെത്തുന്ന പ്രവാസികള്ക്ക് പിന്നാക്ക വികസന കോര്പറേഷന് 20 ലക്ഷം രൂപ വരെ വായ്പ അനുവദിക്കുമെന്ന് മന്ത്രി എ.കെ.ബാലന് അറിയിച്ചു. 6 ശതമാനമാണ് പലിശ. പിന്നാക്ക വികസന കോര്പറേഷന്റെ ജില്ലാ ഉപകേന്ദ്രം ഉദ്ഘാടനം ചെയ്യുകയായിരുന്നു മന്ത്രി. വടകര താലൂക്കിലെ പിന്നാക്ക, ന്യൂനപക്ഷ ജനവിഭാഗത്തിന് ഈ ഓഫിസിന്റെ പ്രയോജനം ലഭിക്കും.
ഗവ. യുപി സ്കൂളിന് സമീപത്തെ കെട്ടിടത്തിലാണ് ഓഫിസ്. ഇ.കെ.വിജയന് എംഎല്എ അധ്യക്ഷത വഹിച്ചു. തൂണേരി ബ്ലോക്ക് പഞ്ചായത്ത് പ്രസിഡന്റ് സി.എച്ച്. ബാലകൃഷ്ണന്, പഞ്ചായത്ത് പ്രസിഡന്റ് എം.കെ.സഫീറ, കോര്പറേഷന് എംഡി കെ.ടി.ബാലഭാസ്കരന്, ചെയര്മാന് ടി.കെ.സുരേഷ് എന്നിവര് പ്രസംഗിച്ചു.